Goyang Maut

Bujur demplon, pikabitaeun nu nenjo. Imut jeung dilakna matak ngendagkeun jajantung para jajaka nu keur sumedeng beger.

Ditilik ti gigir lenggik, diteuteup ti hareup sieup. Ari ditingali ti tukang mah, cenah, meujeuhna mun ditalapung. Duka kunaon naha bisa kitu.

Asih, biduan wedalan kampung nu ngadadak nanjung, mindeng tampil dina tipi. Robah pangadatan. Indung jeung bapa dipopohokeun.

Dina hiji peuting. Aya pangagung nagara nu pesta ulang taun. Ngahaja ngondang manehna. Gutak-gitek, gual-geol badis panggal muter, motah dina panggung.

Duit saweran rabeng nyalampeurkeun, narapel saawak-awak.

Ustad Colmetan, salakina, ngarasa reueus nenjo sakadang bojo nu pada mencrong. Teu disangka-sangka, bujur nu keur digeolkeun teh ngadadak bitu. Sorana halimpu. (*)

---

Irman N Dimyatie