Di Kebon Pa Roesdi

"Aeh-aeh! koetan Kang Loerah Pareman teh beunghar, kěbon sampeu mani satoengtoeng deuleu, kěbon soeoek pirang loewoek. Ieu, lamoen didoeitkeun teh aja ratoes perakna, Kang!" tjeuk paman Roesdi.

"Ajeuna, keun bae koe koering oerang djoeal, asal poegoeh hasilna bae, Akang tampi laladangna."

"Ih soekoer ari sanggoep kitoe mah," tembal Pa Roesdi ka adina. "Hajoe oerang badami bari ngioehan di saoeng. Tjik Roesdi ngaraboet sampeu satangkal pek boeboej, toeh di ditoe dina doeroekan."

Bari ngioehan di saoeng, paman Roesdi njaritakeun deui panggilingan sampeu djeung ngampa soeoek. Kieu tjaritaannana:

"Sampeu teh saanggeusna digiling atawa diparoed pek digalĕjan sarta ditjaian sameudjeuhna. Ti dinja toeloej dipĕrĕs bari disaring, ari geus beunang njaring ditampĕrkeun dina sababaraha bak, diarah atjina. Ari hampasna atawa onggokna, eta oge didjoealan. Di Bandoeng onggok toehoer pajoe lima welas kĕtip sapikoel. Dĕmi atjina dikirimkeun ka nagara-nagara sabrang sarta hargana mahal. Prak-prakanana di panggilingan, koering hĕnteu pati tĕrang bĕnĕr, da geuning rea nakĕr parabotna teh. Mangga ĕngke bae ari sĕnang-sĕnang, oerang angkat kaditoe, ambeh oeninga atoeranana ongkoh. Oepami soeoek dikampa, diarah minjakna, babakoena koe oerang Tjiateul di kota Bandoeng. Ieu oge, prak-prakannana njieun minjak kawas moal pati tĕrang ditjaritakeun koe koering oetoeh, langkoeng sae ĕngke bae ari ka Bandoeng tea. Oerang sakalian ka pangampaan soeoek. Ari moelih ti pangampaan oerang ngagaleuh gĕbleg sarĕng ontjom."

"Gĕblegna keur parab laoek dibalong oerang." tjeuk Misnĕm.

"Heueuh Nĕm, tapi ontjomna mah keur aing!"

Keur waktoe baroedak ngaromong kitoe, geus mĕndoeng pihoedjaneun.

"Hajoe!" tjeuk pamanna. "Oerang baralik, bisi hoedjan." (*)