Ngaran Rupa-rupa Diuk

Basa Sunda mah estu beunghar ku kosakata. Jang urusan diuk oge, loba pisan sesebutanana. Di handap ieu urang pedar hiji-hijina.

• Andegleng » Diuk ajeg tumaninah dina korsi.
• Andeprok » Emok rekep (awewe).
• Anjeucleu » Diuk ngeunah-ngeunah di tempat nu rada luhur (dina tonggong munding, kuda, sapedah, jeung sajabana).
• Campego » Cingogo kawas aya nu didagoan.
• Candeluk » Diuk sababaraha lilana kawas aya nu didagoan. Di wewengkon sejen, candeluk sarua hartina jeung cendekul, cindukul, cindeluk.
• Cingogo; cangogo; nagog » Peta saperti nu keur bubuang.
• Emok » Cara diuk awewe dina lante (samak), pingpingna direndengkeun, bitisna patumpang, arahna sarua.
• Emok cabok » Sabangsa emok tapi bitis nu kenca kana pingping kenca, nu katuhu kana pingping katuhu.
• Nanggeuy gado » Diuk biasa ngan leungeun sabeulah dipake nanggeuy gado. biasana keur ngalamun atawa baringung pipikiran.
• Ngabaheuhay » Diuk nyanghunjar bari suku dipaanggangkeun, biasana lantaran cape.
• Ngabebengkung » Diuk lila rada semu bengkung, bari nganggur.
• Ngalageday; ngalegeday » Diuk nyangsaya, biasana dina korsi males jeung sajabana.
• Nyanghunjar; nangunjar » Diuk bari ngalonjorkeun suku sabeulah.
• Nyanghunjar lambar » Diuk bari ngalonjorkeun suku duanana.
• Nyangsaya » Diuk bari nyarandekeun awak kana tempat nu disarandean.
• Sidengdang » Diuk bari suku duanana dirumbaykeun (biasana diuk di imah panggung nu aya kolongan). Lamun suku duanana diayun-ayun disebutna ucang-ucangan. Lamun suku diayun-ayun bari didiukan budak disebutna ucang angge (sarupa kaulinan).
• Sideuha » Diuk emok atawa sila bari leungeun sabeulah dipake nulak awak.
• Sila » Diuk bari nikelkeun suku duanana handapeun pingping nu didengkakkeun.
• Sila andekak » Sila semu rubak, biasana bari nyanghareupan kadaharan.
• Sila ipis » Sila rubak, tuur anggang pisan tepi ka jebrag.
• Sila mando » Sila bari leungeun duanana aya di antara dua suku nu ditumpangkeun, awak biasana semu doyong ka hareup.
• Sila tumpang » Sila bari dampal suku duanana numpang dina pingping kenca katuhu.
• Sila tutug » Suku nu sebeulah sila, sedeng nu sabeulah deui ditutugkeun. (*)