Sarsilah Ngaran Patempatan Di Tatar Sunda

Oleh-oleh Priangan dilingkung gunung,
Majalaya, Soreang, Banjaran, Bandung...

Sempalan lagu "Borondong Garing" di luhur teh ngandung deskripsi sawatara ngaran tempat nu aya di Tatar Sunda. Demi nataan ngaran-ngaran tempat teh ilaharna sok disebut toponimi. Nurutkeun kajian folklore, toponimi teh bagian tina elmu onomastika (onomastics), anu ulikanana ngawengku di antarana bae: mere ngaran jalan, ngaran atawa jujuluk jalma, ngaran kadaharan, ngaran bubuahan, kaasup asal-usul (legenda) ngaran hiji tempat dumasar kana sajarah ngajanggelekna.

Nataan ngaran tempat tangtu bakal loba rambat kamalena lantaran ngajujut ngaran tempat mah teu cumpon ku nyawang ngan tina hiji aspek bae. Nya sawadina kudu dijujut deuih rupa-rupa informasi nu nyampak disatukangeun kaayaan eta tempat. Kumaha pakuat-pakaitna antara ngaran tempat jeung eta informasi? Ilustrasi di handap saeutikna baris mere gambaran anu eces.

Upamana, mun ti Subang rek ka Bandung keun urang tangtu bakal ngaliwatan Tanjakan Emen. Eta tempat teh pernahna di kebon enteh, memeh gerbang Tangkuban Parahu. Mun dititenan eta ngaran tempat teh ngandung sababaraha informasi. Kahiji, pangna disebutkeun Tanjakan Emen nurutkeun setting fisikal (morfogeologis atawa kontur permukaan bumi) lantaran eta jalan teh nanjak (nanjeur). Kadua, di eta tanjakan teh nurutkeun setting sosial, cek sakaol mah (kira-kira taun 70-an) kungsi aya kajadian nu matak geunjleung. Di eta tempat, kungsi aya supir omprengan Bandung-Subang cilaka, ngan duka alatan tabrakan duka tigebrus, nepi ka maotna. Ngaranna Emen. Ari cek mitos (setting kultural), lamun nu rek ngaliwat ka eta tempat kudu ngalungkeun roko ngarah salamet.

Kasus-kasus model kitu teh bisa bae kapanggih di unggal tempat. Tina rupa-rupa informasi nu diebrehkeun dina ilustrasi teh tetela ngaran tempat teh ngurung kana aspek-aspek fisikal, sosial, jeung kultural ngeunaan eta tempat.

Mun dijujut, di urang (Tatar Sunda) teu saeutik ngaran tempat nu diasosiasikeun jeung rupa-rupa talajak alam (setting fisikal) nu pernah aya. Aya sababaraha pola nu maneuh raket jeung asosiasi, biasana ku cara matalikeun ngaran tempat jeung talajak alam tea. Eta pola teh bisa dicirian ku: kahiji, pola linier nyaeta ngaran tempat sacara langsung diadaptasi tina talajak alam. Demi talajak alam teh bisa ngawengku aspek hidrologis, aspek morfogeologis (kontur permukaan taneuh), jeung aspek biologis. Ari nu dimaksud pola nu kadua nyaeta ngaran tempat nu dicokot tina dua atawa leuwih boh talajak alam boh aspek sosiokultural dibarungkeun jadi hiji ngaran (konsep).

Ngaran patempatan nu ngindung kana aspek hidrologis di urang mah teu wudu beungharna. Mun cek istilah Karl A. Witfogel (urang Jerman) mah urang Sunda teh kakolomkeun kana hydrolic society, masarakat nu teu leupas tina cai. Ari kituna mah geus pada-pada maphum yen tanah Sunda teh cenah kawentar daerah nu subur ma'mur. Ari salasahiji ciri suburna taneuh teh nyaeta ku cur-corna cai. Ceuk nu resep heureuy tea mah cenah diciptakeunana Tatar Sunda ku Gusti Alloh teh ngadamelna oge bari "marahmay, tur imut ngagelenyu".

Geura urang guar, aspek hidrologis nu patali jeung pola linier, ngaran Andir upamana. Eta kecap teh seuhseuhanana mah kalawan torojogan diadaptasi tina talajak alam aspek hidrologis, anu saharti jeung huluwotan (springs), seke, atawa cinyusu. Disawang tina jihat sajarah, munasabah Andir (lebah Bandara Husen Sastranegara) teh baheulana teu bina ti sumur. Ku lantaran eta tempat teh subur ku cai, Andir teh harita jadi tempat anu kagiridig. Jadi tempat pangimpungan jalma-jalma nu lumampah jauh boh nu badarat boh nu tumpak kuda pikeun ngaso jeung ngaleungitkeun hanaang. Lila-lila mah eta tempat teh jadi rame, jadi pangjugjugan ti mana-mana. Nilik kana talajak alam nu aya di tatar Sunda, bawirasa mun di unggal tempat aya lembur nu dingaranan Andir. Di eta tempat bakal manggihan kalawan langsung aspek hidrologis anu disebut cinyusu, seke nu pernahna di suku gunung atawa lamping. Conto pola linier nu pakait jeung aspek hidrologis sejenna upamana ngaran Empang, Parigi, Dano, Bendungan, Lengkong, Parung, Dermaga, jeung sajabana ti eta.

Ari pola nu kadua, lantaran gabungan tea tina dua aspek atawa leuwih (aspek hidrologis jeung aspek sejen kaasup rupaning istilah) di antarana: ci; cai (Cimalaka), seke (Sekeloa), leuwi (Leuwidaun), curug (Curugsigay), bantar (Bantarmara), muara (Muararajeun), balong (Balonggede), sawah (Sawahkurung), parakan (Parakansaat), situ (Situaksan), empang (Empangsari), solokan (Solokanjeruk), kali (Kalipucang), karang (Karangnini), ranca; rawa (Rancapurut, Rawabadak), sagara (Sagaraanakan), sumur (Sumurbarang), talaga (Talagawarna), tambak (Tambaksari), lebak (Lebaksiuh), parigi (Parigimulya), jeung rea-rea deui.

Tah lebah akumulasi tina ngaran-ngaran tempat di Tatar Sunda nu ditataan di luhur, bawirasa mun diprosentasekeun teh tangtu bakal didominasi ku ngaran nu dimimitian ku kecap "ci". Naon sababna? Perlu aya panalungtikan nu leuwih jero.

Lian ti aspek hidrologis, ngaran tempat teh sok dipatalikeun oge jeung aspek morfogeologis (dumasar kana kontur permukaan bumi) deuih. Ari pola linier nu patali jeung aspek morfogeologis di antarana: Punclut/Penclut, Legok, Tegal, Talun, Genteng, jeung sajabana ti eta. Sedengkeun pola nu ngindung ka nu kadua Lemah Neundeut, upamana. Eta ngaran teh diadaptasi tina kaayaan lemah (taneuh) anu neundeut akibat ayana rohang di jero taneuh anu kosong (tektonik) nu ahirna ngareunteutkeun struktur taneuh. Conto-conto sejenna ngaran tempat nu diadaptasi tina aspek morfogeologis nu ngindung kana pola nu kadua, upamana bae: tina kecap tegal jadi ngaran Tegalkalong, kebon (Kebonjukut), cadas (Cadasngampar), pasir (Pasirjati), batu (Batureok), guha (Guhapawon), legok (Legokhuni), bojong (Bojongmeron), ujung (Ujungkulon), geger (Gegerkalong), tanjung (Tanjungsari), pulo (Pulomajeti), jeung rea-rea deui.

Kasus nu spesifik, deskripsi ngaran tempat nu patali jeung aspek morfogeologis bakal leubeut kapanggih di daerah pakidulan Tatar Sunda nu manjang ka tebeh wetan. Eta tempat teh mangrupa kawasan pagunungan anu katelah Southern Mountains, nu nuduhkeun hiji daerah pagunungan (non vulkanik). Tina kontur taneuh model kitu munasabah mun di eta tempat loba nu dicokot tina talajak alam. Kota Tasikmalaya, apan salah sahiji cirina loba ngaran tempat nu make ngaran gunung, nepi ka sohor ku jujuluk the ten thousand hill of Tasikmalaya. Kesan pernah ayana talajak alam model kitu teh bisa diidentifikasi ngaliwatan ngaran tempat nu make kecap gunung. Upamana bagian wilayah kota nu dibere ngaran Gunung sabeulah, Gunung lipung, Gunungroay, Gunung sari, Gunung gadog, Gunung pereng, Gunung awi, Gunung jambe, Gunung putat, Gunung KiCau, Gunung Pongpok jeung rea-rea deui.

Sedengkeun aspek biologis sok dipatalikeun jeung lingkungan alam (sistem ekologis) nu aya di sabudeureunnana. Ngaran tempat biasana dicirian atawa ngarujuk kana aspek flora jeung fauna. Upamana flora, nyaeta tangkal nu aya atawa nu hirup di eta tempat. Geura urang pedar nu patali jeung pola linier dina aspek biologis. Upamana ngaran Kosambi. Mungkin bae eta tempat teh harita mah can boga ngaran. Pikeun kapentingan nuduhkeun eta tempat, kabeneran deuih di dinya teh aya tangkal kosambi nya tuluy ditarelah bae ngaran Kosambi, malah nepi ka ayeuna. Di tatar Sunda bawirasa asa loba pisan ngaran tempat nu make ngaran tutuwuhan/tangkal tina pola linier. Geura urang tataan ngaran-ngaranna, saperti: Garut, Bayongbong, Sentul, Kosar, Katapang, Dangdeur, Calingcing, Dukuh, Rambutan, Balingbing, Cangkuang, Baros, Loa, Menteng, Bintaro, Bencoy, Jati, Paseh, Kopo, Kirisik, Haramay, Petir, Kawista, Kroya, Gorda(h), Gempol; Gandasoli; Gambir; Gadog, Jamblang, Jambu, Jampang, Darangdan, Bugel, Bihbul. Gombong, jeung rea-rea deui.

Demi pola nu kadua, nyaeta Haurkoneng, Haur Pancuh, Haur Pugur, Buahdua, Warudoyong, Kalapanunggal, Kasomalang, Kiaracondong, Gintunglempeng, Jatitujuh, Kawungluwuk, Pakuhaji, Kadungora, Rengasdengklok, jeung rea-rea deui. Kaasup ngaran tempat sejenna, Dungusmaung (dungus atawa rungkun), Leuweungtiis (leuweung; tiis (aspek klimatologis)), Pengkolan Asem, Warung Toge, Leuwilaisah, jeung rea-rea deui.

Kumaha ari ngaran tempat nu dicokot tina aspek sosial? Ngaran Banceuy (lebah alun-alun Bandung beulah kaler) upamana. Banceuy teh sacara etimologis ngabogaan harti kompleks kuda, kaasup istal jeung nu ngurusna. Ieu patempatan teh gelarna sabada aya jalan raya pos (Grote Postweg) nu ngembat ti Anyer ka Panarukan tea. Ieu Banceuy teh sok dipake tempat pangreureuhan atawa bagantina kuda pikeun kapentingan transportasi jeung kaperluan pos (pasuratan) harita. Mun aya surat atawa barang ti Batawi kudu dianteurkeun ka Semarang, nya tangtu bae moal kuateun mun kudu meleter kuda hiji nepi ka Semarang. Munasabah pisan upama ngaran Banceuy teh aya meh di tempat (kota) nu kaliwatan ku eta jalan.

Conto sejen, Balubur. Apan eta oge teu leupas tina aspek sosial jaman pangawulaan. Harita balubur teh ngaran tempat aya dina kakawasaan bupati (boga hak istimewa). Mun cara ayeuna mah meureun sarua jeung kompleks perumahan pejabat (para menak) kabupaten. Conto sejenna nu patali jaman pangawulaan: Patrol, Karees, Regol, Pamagersari, Pungkur, jeung saterusna. Atuh ngaran-ngaran nu make kecap kekebonan luyu jeung tangkal nu dipelakna (lelewek Bandung), upamana Kebon Kalapa, Kebon Jukut, Kebon Kawung, jeung rea-rea deui. eta oge teu leupas tina aspek sosial harita. Kebon Kopi di Ciaruteun (Bogor), apan teu leupas tina setting sosial malah kaasup setting kultural, nyaeta tempat kapanggihna prasasti Batutulis Kebon Kopi. Eta tempat teh ngait kana jaman 'tanam paksa' Cultuurstelsel nu ngawajibkeun masarakatna marelak kopi. Harita leuweung dibabad pikeun dijadikeun kebon kopi. Nepi ka ayeuna eta tempat teh nelah kampung Kebon Kopi. Titinggal cultuurstelsel teh, nu abadi nepi ka kiwari sok dikarawihkeun, cenah:

Dengkleung dengdek, buah kopi raranggeuyan,
Ingkeun anu dewek ulah pati diheureuyan.

Ari ngababad leuweung pikeun kapentingan pitempateun ilaharna sok disebut ngababakan. Mun rek ngababakan tara leupas sistem kapercayaan masarakatna ngeunaan hade-gorengna hiji tempat. Tina sistem pangaweruh masarakatna kana panataan patempatan, nya lahir istilah-istilah topografi saperti galudra ngupuk, pancuran emas, satria lalaku, kancah nangkub, jeung sajabana. Tah lembur meunang muka anyar teh sok ditarelah we kampung babakan.

Di Bandung ge apan sakitu ngaleuyana ngaran tempat nu make kecap babakan, saperti Babakan Surabaya, Babakan Ciamis, Babakan Sumedang, Babakan Ciparay, jeung sajabana ti eta. Eta ngaran-ngaran tempat teh raket pisan patalina jeung talajak sosial waktu ngadegkeun eta tempat. Babakan Surabaya upamana, dalit pisan jeung talajak sosial, ku kajadian dipindahkeunana instalasi militer, pabrik senjata/mesiu nu sok disebut Artillerie Contructie Winkel (ACW) ti Ngawi jeung Surabaya ka lelewek Kiaracondong. Ayeuna mah eta pabrik senjata teh katelah PINDAD. Ti dinya loba pagawe ACW (urang Surabaya jeung Ngawi) nu pindah ngaradon "bedol desa" ka Tatar Sunda. Cek Haryoto Kunto, nya ti harita aya kacapangan dina wangun sisindiran keur ngageuhgeuykeun urang Jawa nu unina "Jawa Kowek dagang apu, datang poek teu diaku". Ieu geuhgeuyan teh lantaran loba "bedoler" datangna ka Bandung kapeutingan. Boa boa pedah naek spur "Si Kuik" kawasna mah, anu ngadided majuna jeung loba eureunna tea. Sadatangna ka Bandung, tuluy bae muka lembur, arimah-imah, nya katelah we babakan Surabaya.

Masih cek Haryoto, aya talajak sosial anu unik sabudeureun kota Bandung harita. Bawirasa ayeuna oge masih dipake. Nyaeta sebutan 'dayeuh'. Dayeuh teh mangrupa istilah anu populer pikeun ngarujuk kota Bandung. Jadi nyaba ka 'dayeuh' maksudna indit ka Bandung.

Ari setting kultural nyaeta ngurung kana ngaran tempat nu dipatalikeun jeung unsur-unsur gagasan atawa ide saperti aspek mitologi, folklore, sistem kapercayaan masarakatna. jsb. Najan dina emprona mah dalit jeung setting sosial. Saupama ngajujut ngaran tempat, teu kakobet ku cara boh setting fisikal, boh setting sosial nya tarekah pamungkas teh make setting kultural. Lamun loba ngaran tempat/kota di tatar Sunda nu teu bisa dijujut make perspektif fisikal, nya wayahna kudu dibantuan ku mitologi, folklore jeung sistem kapercayaan. Majalengka pan ngaitna teh jeung mitologi Nyi Rambut Kasih, Bandung nyantelna jeung carita legenda Sangkuriang, Sumedang jeung etimologi Insun Medal, jeung sajabana. Rea keneh ungkabeun mah saperti Tanjakan Sahrudin, Dago Jawa, Selagedang, Gado Bangkong, Curug Panganten, Gunung Tampomas, Gunung Galunggung, jeung rea-rea deui. Lebah dieu perlu metakeun jampe pamake teh. Dina nyukcruk ngaran tempat, informasina teh biasana nyamuni disatukangeun budaya nu jadi bagian integral tina kahirupan masarakatna.

Nyukcruk sarsilah ngaran Plumbon, Karapyak, Palimanan, jeung sajabana, mun kurang-kurangna urang apal kana kasangtukang budaya, tangtu bakal lebeng, bakal poekkeun. Nya cara maluruhna, kahiji ku jalan mesek eta kecap sacara etimologis. Nu kadua dipatalikeun jeung aspek sosial budaya jaman harita ngeunaan eta tempat, saperti conto kasus Tanjakan Emen nu geus dipedar di luhur.

Geura urang pesek, upamana Palimanan. Naon sababna bet dingaranan Palimanan? Singhoreng aya sasakalana. Kecap palimanan teh sacara etimologis asal kecap tina liman (kawi) nu hartina gajah, dibere rarangken barung (konfiks) 'pa-an' nu hartina tempat. Sabada dirarangkenan eta kecap ngandung harti tempat nu dicicingan ku gajah. Ceuk legegna mah komplek gajah.

Naha make aya gajah di eta tempat? Demi kota Palimanan, aya di daerah bawahan karajaan Cirebon (Sultan Cirebon). Ari Sultan teh nya raja tea. Demi nu jadi raja harita, (patalina jeung konteks sosiokultural mitis-magis) boga anggapan yen miara gajah (satwa kalangenan) mangrupa salahsahiji kasakten anu gede pisan pangaruhna kana kalungguhan jeung komara eta raja. Nurutkeun B. Anderson dina seuhseuhanana tradisi pikiran politik Jawa (Sunda) kacida muhit jeung mentingkeunana kana kamampuh museurkeun kasakten. Tah lebah miara satwa di lingkungan karaton/karajaan, dianggap bisa nepakeun karakter nu sarua ka raja. Mawat gajah (salaku mitos) dipercaya bisa ngalambangkeun kaagungan, kakuatan, sarta kasakten eta raja/sultan.

Tina pedaran di luhur, katiten yen ngaran-ngaran pilemburan husus di Tatar Sunda teu sagawayah. Unggal ngaran tempat teh ngabogaan kasangtukang kasajarahan (sasakala) nu patali jeung setting fisikal, setting sosial, jeung setting kultural. Nya kekecapan karuhun urang yen lembur matuh, dayeuh maneuh banjar karang pamidangan teh ninggang dina kekecrek. (*)

---

Dede Kosasih (Cupumanik No.17, 2004)