Si Kabayan Kasemahan

Dina waktu kasemahan, sok rajeun bae manggih pikaeraeun. Boh dinu boga, atawa dinu walurat saperti nu kaalaman ku kulawarga Si Kabayan di handap ieu.

Hiji mangsa, Si Kabayan kasemahan ku babaturanana anu geus lila teu panggih.

Si Kabayan: "Aeh...aeh bagea! Ti mana wae mani ampleng-amplengan teuing. Geus sabaraha lila urang teu panggih?"
Semah: "Yaktos, aya manawi tilu taun mah."
Si Kabayan: "Naha ti mana atuh ngalalana teh?"
Semah: "Tebih, teras masantren ka Tasikmalaya."
Si Kabayan: "Euleuh, sukur teuing."

Si Kabayan tuluy ngageroan Si Iteung nu jadi pamajikanana. "Iteung buru geura nyangu, ieu aya dulur Akang jaman di pasantren."

Si Kabayan: "Mangga calik! Waas nya Kang, baheula jaman urang ngaliwet."
Semah: "Yaktos, asa jadi daging harita mah, sing sarwa ni'mat. Sanes, bet geus poek, hayang ka cai Akang mah."
Si Kabayan: "Mangga ka dieu bae ka pipir angkatna!"

Di dapur, Si Iteung nu tadi dititah nyangu tuluy nyokot beas anu ngan kari sakobokan deui, kitu ge keur isukan. Lantaran keuheul ka nu jadi salaki, bari ngelek boboko manehna teu eureun-eureun ngutruk.

Ari semah tea kabeneran kumisan, sarua jeung Si Kabayan. Lantaran waktu geus maju ka poek, Si Iteung teu nyahoeun yen anu keur anteng cingogo teh semah salakina. Disangka ku Si Iteung eta teh Si Kabayan. Jol we disampeurkeun bari dijenggutan kumisna dibarung ku ngomong ngaharewos, "Naha keur teu boga beas, make disina dahar semah teh!"

Ki semah teu ngajawab, ngan leos bae indit teu bebeja-bebeja acan bari nyabakan kumisna nu dibedolan ku Si Iteung. (*)