Mantri Palid (Bagean 2)

Mantri Pulisi nyinglidkeun calana panjang, terus muka sapatu. Nyoba-nyoba heula turun. Enya ngan ukur nengah bitis. Tapi lantaran boga pikiran boa ka tengah mah wahangan teh ngajeroan, manehna buru-buru hanjat deui muka calana panjang. Da kitu cenah ceuk tukang cue tadi oge. Mantri Kilinik jeung PLKB nurutan. Muka calana panjang jeung sapatu. Atuh barang turun teh sarerea angkaribung. Leungeun beulah kenca ngaheumpik calana panjang, ari nu katuhu ngajingjing sapatu. Komo da Mantri Kilinik mah bari jeung ngajingjing belat sagala. Mekel parabot paranti mariksa pasen cenah. Lamun di jalan panggih jeung jalma anu perlu ditulungan, teu kudu rampang-reumpeung deui.

Meuntasna pauntuy-untuy, lalaunan. Pangheulana PLKB, da bubuhan pangngorana. Sukuna digulusurkeun nyasar dasar wahangan, sieuneun nincak nu jero. Hadena cadas, teu matak bobolodog ku leutak, ngan leueurna nataku. Mantri Pulisi mah malah kungsi tiseureuleu. Kabeneran, ku sabab aya di tengah, kaburu kajewang ku nu duaan. Beuki tengah cai beuki ngajeroan, malah geus meh nepi kana luhureun tuur. Untung bae calana kolor ti tadi oge geus pada-pada disinglidkeun nepi kana pengpelangan. Sarerea nepi ka peuntas. Teu sakara-kara.

Teu kungsi tilu parapat jam, geus nepi ka nu dijugjug.

Mantri Pulisi jeung rombongan ditampi ku ajengan Selagombong di bumina, kalereun masigit nu sok dipake ngaos rotinan tea. Teu langsung ka masigit da rada beurang keneh. Ku Ajengan dihaturanan heula tuang. Jaman harita mah puguh oge resep ari ka pilemburan teh, teu weleh pada ngaku jeung pada nyaruguhan, moal matak peurih beuteung. Komo lamun nganteur semah ti kabupaten mah, susuguh teh sok medah-meduh. Da sok ngahaja nu rek katatamuan teh tatahar ti kamarina.

Acara mimiti bada Magrib. Mustamina awewe lalaki, leber nepi ka luareun masigit. Pangwadonan oge teu muat, sawareh ngariung di bumi Ibu Ajengan. Da make pangeras soara mah ka dinya oge atra kadengena teh.

Teu ngadagoan heula Jupen, da bisi peuting teuing. Acara langsung bae di buka ku PLKB. Manehna nu jadi protokol. Da jeung enyana, Mantri Memet mah nepi ka acara lekasan oge can tembong keneh.

Lancar pisan acara teh. Katambah da nu nyaritana ge ngan Mantri Kilinik jeung Mantri Pulisi wungkul, teu kungsi dua jam ge geus rengse. Matak pikabungaheun deuih, da dina sambutanana, mama Ajengan Selagombong teh kacida ngarojongna.

Sapanjang acara penyuluhan, rombongan Mantri Pulisi teu weleh lieuk deui lieuk deui ka lawang masigit, ngadagoan Mantri Memet. Sarerea oge boga itungan, ka Pa Mandor Sungapan atawa nepi ka Mang Karmi oge, paling-paling geseh waktuna teh ngan ukur dua puluh menit atawa satengah jam. Malah lamun leumpangna digancangkeun mah, di jalan oge rombongan teh bisa keneh kasusul, da teu jauh-jauh teuing.

Tapi, nepi ka acara lekasan, Pa Memet lebeng keneh bae. Sarerea salempang. Hariwang ku dua ku tilu. Kahiji bisi teu bisaeun meuntas da kudu ngaraas tea. Ari kaduana, lamun kapeutingan, manehna mah teu mawa batre, bisi ngatog. Katiluna ngan sorangan, euweuh batur keur pakumaha lamun aya kajadian naon-naon di jalan.

Barang rombongan geus pamitan, geus ka luar ti lingkungan pasantren, aya Hansip hariweusweus nepungan Mantri Pulisi. Manehna mawa surat ti Mandor Selagombong, cenah di hilir aya calana palid anu dina sakuna aya surat katerangan anu Mantri Memet. Atuh rombongan kacida reuwaseunana. Tetela kasalempang sarerea tadi teh kabuktian, Mantri Memet palid keur ngaraas lebah wates desa tea. Da apan Mantri Pulisi oge tadi meh-mehan jadi korban. Tiseureuleu.

Mantri Pulisi ngajak Mandor Selagombong jeung menta bantuan Hansip opatan. Maksudna rek ngararat wahangan Cibojong, rek nyusud nu palid. Sangkan henteu ngageumpeurkeun, Mantri Pulisi omat-omatan ka Hansip nu mawa surat sangkan ulah waka geruh.

Bring sarerea ka lebak. Leumpangna rada pagegeye, da batre ngan aya dua. Nu hiji bekel Mantri Kilinik, nu hiji deui nu Mandor Selagombong. Sanajan teu hujan, da baseuh sesa kamari, jalan masih keneh leueur, teu bisa gancang atuh laleumpangna teh, katurug-turug keur poek bulan deuih. Milihan tincakeun teh ngan ukur ngandelkeun caangna lampu senter nu ngan dua ese tea bae.

Barang nepi ka sisi wahangan Cibojong, lebah paranti ngaraas tea, di peuntas geus ngempray. Patromak aya kana opatna, oncor mah teu kaitung. Sihoreng beulah ditu geus nyampak Mandor Sungapan dibaturan ku RT jeung Hansip. Moal kurang ti lima welas jelema sigana mah. Sarerea keur nyingray-nyingraykeun kaso. Tayohna mah geus mapay ti hilir keneh.

"Tah geuning Mandor Sungapan!" cek Mantri Pulisi. "Kumaha geus panggih?"

"Manawi teu acan!" tembal mandor nyorowok, da papeuntas-peuntas. Sorana mawur kasilep ku seahna parung.

"Ke atuh Pa Mandor, bantuan heula meuntas bae ayeuna mah, asa teu puguh pacowong-cowong!" cek Mantri Pulisi bari muka sapatu jeung calana panjang. Kitu deui nu sejenna. Ari loba jelema mah, sanajan peuting oge, asa babari ngaraas teh. Komo da ieu mah katambah ku sumanget hayang buru-buru meunang beja ngeunaan nasib Mantri Memet tea.

Geus nepi ka peuntas, Mantri Pulisi ngajak mandor neangan tempat nu rada lega, ngarah laluasa. Rada beh girang kabeneran aya saung sisi sawah. Sarerea ngadon ngariung di dinya. Mantri Pulisi neruskeun deui nanyakeun papanggihan Mandor Sungapan.

"Nembe ieu be sapatuna sabeulah, nyangsang dina tunggul loa, lebakeun cukang. Ka hilirna mah da rembet pisan, katambih tos poek deuih, sesah milarianana oge. Kantenan ti lebah cukang ka hilir mah pan gupit, caina oge tangtos jero pisan. Rupina langkung ti dua meter lebah dinya mah!"

"Kumaha ari ka hilirna deui?" Mantri Pulisi panasaran.

"Sumuhun, ka hilirna deui mah nyambung kana toblongan tea. Upami teu lepat mah panjang toblongan teh moal kirang ti dua ratus meter. Hilireunana mah, di sungapan, ti tadi oge tos ngagimbung nu maregat, upyak sapertos aya nu hajat bae, da bilih ka luar teu kanyahoan."

"Ke lanan Pa Mandor! Naha Pa Mandor yakin Mantri Memet teh kabawa palid?" Mantri Pulisi was-was.

"Ah henteu ari yakin mah, sami sareng eusi serat abdi ka Bapa wae. Abdi teh mendakan serat katerangan nu aya dina lancingan panjangna. Da sidik pisan lancingan gidril eta teh nu tadi di anggo ku Pa Mantri. Abdi apal, margi tadi mesen mobil kanggo mulih Bapa tea saurna teh. Atuh serat kateranganana, eces kagungan Pa Mantri, margi pas potona teu pupul. Mung ari palid henteuna mah kapan abdi ge teu ngawartoskeun," Jawab mandor bari haruhah harehoh.

"Eta geuning make ngerahkeun jelema, mapay-mapay Cibojong?"

"Eta mah bilih bae. Margi ti tadi tos naros ka sababaraha urang nu warangsul ti girang, malih nu kantos nyimpang heula sakedap ka tempat penyuluhan di Selagombong, cenah teu kantos aya nu tepang atanapi ningali Mantri Memet. Atuh, sateuacan abdi ngutus Hansip masihkeun serat ka Bapa oge, tos bur-ber miwarangan ronda, nanaroskeun Mantri Memet ka ditu ka dieu. Malih dugi ka aya nu dipiwarang nyusulan ka bumina. Namung teu acan aya wewengan. Kumargi kitu, kantenan abdi teh hariwang pisan. Komo upami ngemutkeun caketna ti Sungapan ka Selagombong mah, da ku nu rusuh mah satengah jam ge dugi. Ari ieu, pan ti bada Asar dugi ka bada Isya teh teu aya nu nangenan dugi. Nya sadayana oge gaduh sangkaan awon. Mantri teh kacandak palid."

"Naha palid teh atuh ngan calanana wungkul, teu bareng jeung awakna?" Mantri Pulisi nyeleksek kawas mariksa sakitan.

"Emutan teh, sadaya nu ngaraas di dieu mah, sok ngudar heula lancingan panjang da bilih kabaseuhan. Janten Mantri Memet oge panginten kitu. Lancingan panjang sareng sapatuna dibuka, sedengkeun anggoan nu sanesna mah masih keneh dianggo. Upami leres tea mah palid, ku emutan, lancingan panjang mah rupina ti payun, da hampang."

Pa Mantri Pulisi ngahuleng, tapi terus unggeuk-unggeukan. "Bisa jadi enya kitu Ndor! Da Bapa ge bieu jeung babaturan nu sejen, kapan ngudar heula calana basa meuntas teh nya! Cik kumaha pamanggih nu sejen?" Mantri Pulisi malik ka rombongan nu tadi ti Selagombong.

Jawabanana meh bareng, "Rupina leres kana kitu!"

"Sok atuh ari kitu mah, Pa Mantri Kilinik sareng PLKB ka Cikembar, laporkeun ka Pa Camat. Pan mobil nu ka Bojongkeun tos dipesen tadi. Aya keneh Pa Mandor?" cek Mantri Pulisi bari ngareret ka Mandor Sungapan.

"Kantenan bae, tos disayagikeun. Supirna tos ditalatahan, upami aya rombongan Bapa kedah enggal mios."

"Pek atuh berangkat, tapi upami tos dugi ka Bojong, mobil mah kedah enggal sina wangsul deui ka dieu, bilih peryogi! Ka Cikembar mah nganggo motor bae!"

Nu duaan arindit. Sadatangna ka Bojong, ka imah Pa Memet, imahna dikonci, teu bisa nyokot motor. Kapaksa, bayawak teh dipake heula nganteurkeun ka kacamatan.

Barang nepi oge, buru-buru menta dianteur ka piket ngetrokan bumi dines nu aya gigireun kantor, rek laporan langsung ka Pa Camat. Atuh peuting-peuting oge, kapaksa Pa Camat nyampeur Dansek, make motor muru ka Sungapan. Milu ngokolotan neangan nu palid.

Sabada laporan, Mantri Kilinik jeung PLKB terus nelepon ka Wisma PGRI rek ngabejaan bojo Mantri Memet nu keur latihan.

Anu disebut nelepon teh, jaman harita mah teu gampang kawas kiwari. Komo ti kota kacamatan leutik mah. Bubuhan harita mah telepon teh masih keneh kaasup kana barang langka, can aya hape model ayeuna. Malah beunang disebutkeun, ngan ukur keur kaperluan dines wungkul bisa ngagunakeun telepon teh. Di sakacamatan Cikembar oge, harita mah telepon teh ngan aya sawelas sambungan. Kitu oge nu tilu mah paralel; Kantor Kacamatan, Kantor Koramil, jeung kantor Komsek. Ari sesana, nu hiji, sentral telepon Cikembang. Nu dua di pabrik aci. Nu lima deui, kabeh aya di apdeling perkebunan enteh jeung karet PTP Cibungur jeung Mandaling.

Ari prak-prakan nelepon, kudu diengkol. Pesen heula ka sentral telepon Cikembang, kakara ka nu dituju. Komo lamun ka Sukabumi mah, ti sentral telepon Cikembang teh kudu ka sentral telepon Sukabumi heula, karara ka nomer anu dituju. Mun kabeneran geus bisa nyambung dina waktu sapuluh menit teh, geus kaitung alus. Da sakapeung mah, nepi ka cangkeul ngagoel-goel engkol telepon oge, teu daekeun nyambung-nyambung. Nu disebut interlokal ka Bandung mah komo, matak nundutan manten nungguanana oge. Tapi Alhamdulillah harita mah, teu kungsi saparapat jam beja teh geus nepi ka panitia latihan nu kabeneran keur piket di Wisma PGRI. Atuh isukna Bu Mantri Memet teh geus aya di imahna, malahan mah kaburu nyampeur heula anakna nu keur di ninina.

Sanajan can aya kacindekan enya henteuna palid, ari nepi ka subuh can datang keneh bae mah, matak nagiwurkeun sarerea. Katurug-turug, kabiasaan Mantri Memet mah, ari tugas ka nu deukeut mah tara make ngendong di batur, sanajan tengah peuting oge sok maksakeun balik. Kapan Selagombong teh deukeut. Ti Bojong mah, tatangga desa. Atuh ti isuk-isuk, di imah Mantri Memet geus loba jelema. Ibu-ibu ngabeberah Bu Mantri, da ti barang jol oge, ceurik teu eureun-eureun. Bapa-bapana ngadon narungguan pada harayang nyaho kumaha geletuk batuna jeung kecebur caina. Mantri Pulisi mah terus ka Sungapan deui, bisi geus aya nu manggih raratanana. (*)

Sambungan ti Bagean 1

Nyambung ka Bagean 3

---

SundaMidang No. 53 (Maret 2009)