Kasirep Geol Tukang Karedok

Datang ka imah awak cape. Tapi di dapur teh ngan nyampak deungeun sangu sesa isuk-isuk. Pasti sakadang pamajikan teh sibuk ngadon ngarumpi di imah tatangga, nepi ka poho masak. Di geroan, anak mitoha teh teu elol-elol. Gejlig we kuring indit. Pakean gawe ge can ieuh disalin. Leos ka tungtung gang, muru ka warung karedok langganan.

"Geuning sepi, Wa?" tanya teh bari gek diuk.

Wa Yoyoh nu keur ngalamun tembong kaget.

"Wah karek pada bubar. Ti isuk mula rame," jawabna. "Karedok, Jang?"

Kuring unggeuk. "Tapi hayang Si Eneng lah nu ngarendosna," tembal teh.

Wa Yoyoh jebi. "Da euweuh Si Eneng na ge, Keur ka pasar. Pangna nu mareuli teh bubar kabeh."

"Deuh...," kuring ngangluh. "Lila keneh teu? Mun sakeudeung mah rek didagoan we."

"Moal lila sigana mah."

"Nya, sok atuh menta cikopi!"

Aya satengah jam mah ngadagoan. Cikopi ge beak sagelas. Jol nu dianti-anti teh datang.

"Euleuh geuning aya Kang Doni," cenah bari ngabelenyeh. Sok babawaanana ditunda.

Kuring males imut. "Muhun, tos kesel ngantosan yeuh."

"Euleuh karunya teuing."

"Muhun, tos sono deuih. Tos lami teu ngarasoan geol Eneng."

"Baruk? Tos hoyong digeol nyah. Nya mangga atuh! Nganggo lada teu?" pokna bari teu leupas ti imut.

"Sakedik we lah," jawab teh pondok.

Teu kungsi ngengkekeun deui, Si Eneng teh terus ngaladangan. Cengek jeung sabaturna diasupkeun kana cowet. Kacang panjang, kol, jeung kacambah terus nyusul. Leungeunna ngarendos, bujurna milu ngageol. Muter matak ratug angen. Kuring teu sirikna teu ngiceup ningalikeun geol Si Eneng teh. Ari pikiran mah geus kamana boa.

Karedok Si Eneng teh kasohor kamana-mana. Langgananana loba lantaran dicampur ku geolna eta. Nu ngageolna hade, geolna oge matak ratug jajantung tur hareuras otot. Kumplit we.

Tapi da tara lewih ti kitu. Si Eneng teh geus aya nu boga. Salakina, Kang Joni nu sok narik angkot. Para langganan warung teh ukur bati neuteup atawa ngaheureuyan ku omong. Tara leuwih ti kitu. Paling leuwihna teh ukur ngabayang-bayang nu teu pararuguh.

Siga kuring ayeuna. Beres ngadahar karedok teh kuring buru-buru balik, neangan pamajikan. Aya hasrat anu menta dibedahkeun.

"Sumi...! Sumi...! Dimana maneh...?" Kuring cocorowokan ti dapur. (*)

---

Diropea ti asmarasunda.wordpress.com