Sasakala Heulang Ngahakan Hayam

Baheula aya dua sobat nyaeta heulang jeung hayam jago. Duanana nyobat pisan, tara pahiri-hiri, malah sok silah tulungan. Unggal poe oge manehna sok babarengan neangan hakaneun.

Dina hiji poe, nalika keur neangan hakaneun teu kanyahoan aya ajag nyampeurkeun rek ngerekeb hayam jeung heulang. Heulang gancang luncat terus hiber. Tapi hayam najan lumpat ge da teu bisa hiber diudag-udag terus.

Nempo kitu, heulang buru-buru ngabantuan sobatna, nyakaran ajag ku kuku-kukuna nepikeun ka awak ajag teh garetihan. Hayam nyumput dina guha da ari geus garetihan mah ajag teh teu ngudag deui. Lila-lila mah ajag terus mulang ka baturna.

"Kaluar sobat, da ajag teh geus kabur," ceuk heulang ka sobatna.

"Nuhun pisan heulang geus mantuan kuring," ceuk hayam.

Ti harita hayam jago jadi borangan jeung resep nyorangan. Hayam karek sadar yen heulang boga pangabisa anu punjul ti manehna. Heulang bisa ngapung.

"Euh ngeunah pisan euy lamun bisa ngapung," gerentes hayam dina hatena.

Meunang sababarah poe hayam mikiran heulang anu bisa ngapung, basa manehna rek dikerewek ku ajag. Keur kitu teu kanyahoan heulang datang tina tatangkalan saluhureun tempat cicing hayam jago.

"Ku naon sobat, sigana anjeun keur boga kabaluweng atawa gering?"

"Henteu, teu kunanaon tapi kuring rek nanya ka anjeun, ku naon anjeun bet bisa ngapung luhur, ari kuring teu bisa luncat-luncat acan?"

"Baheula kuring ge teu bisa ngapung, tapi sanggeus kuring ngaputan kadua jangjang kuring ku jarum emas kuring jadi bisa ngapung jeung harampang."

"Atuh lamun kitu mah kuring nginjeum jarum emas tea, rek dipake ngaputan jangjang anu kuring."

"Teu nanaon, asal anu dikaputna dua jangjang anjeun ameh hampang. Ngan omat ulah incah balilahan jeung ulah diinjeumkeun ka nu lian!"

Heulang mikeun jarum emas ka hayam jago. Atuh hayam jago teh ajrag-ajragan ngarasa gumbira. Teu talangkee hayam jago ngaputan jangjangna, tapi hayam jago teu sabaran, can ge rengse ngaputna, hayam jago geus ngeplek-ngeplekeun jangjangna terus luncat kana luhur pager.

"Asik uing bisa ngapung...! Asik bisa ngapung...!"

Keur kitu teu kanyahoan aya hayam bikang nempoeun kalakuan hayam jago tea.

"Hey jago ku naon maneh bisa luncat kana pager jeung bisa ngapung deiuh?"

"Jangjang kuring teh dikaputan ku ieu jarum emas."

"Cing atuh jago kuring nginjeum da kuring ge hayang bisa ngapung kawas anjeun."

"Nya ieuh tapi mun geus bisa ngapung kudu luncat ka gigireun kuring."

Hayam bikang buru-buru ngaputan jangjangna. Can ge anggeus, hayam bikang geus luncat ka gigireun hayam jago. Hayam bikang keketok mani daria. Kitu deui hayam jago kongkorongok bari adigung.

"Mana jarum emas tadi? Hayam jago inget ka jarum emas."

"Eh tadi diteundeun dina taneuh," ceuk hayam bikang.

Hayam teh luncat ka handap neangan jarum emas. Hayam teh duanana bari cacakar neangan jarum emas tea. Kokoreh ka unggal tempat. Tapi maranehna teu manggihan jarum emas nu diteangan tea.

Hiji poe, heulang datang rek nagih jarum emas tea.

"Wah isuk keneh geus kokoreh, geus bisa ngapung acan?" ceuk heulang.

"Ah kuring mah ngan bisa luncat saluhur pager, ngan da nya eta jarumna kaburu leungit. Kuring neangan bari kokoreh angger teu kapanggih."

Heulang reuwas ngadenge laporan hayam teh. Heulang ambek kacida.

"Anjeun geus ingkar janji pajar moal incah balilahan jeung moal nginjeumkeun jarum emas tea. Kula haroream sosobatan jeung anjeun," heulang hiber.

Nya ti danget harita hayam sok risi mun inget kana amarahna heulang. Mun ningali heulang nu ngalayang di luhureunana, hayam teh sok taki-taki najan kapeungna mah sok nyamber anakna.

Tah eta nu jadi sabab hayam sok kokoreh jeung cacakar kana taneuh. Eta teh neangan jarum emas. Salila jarum emas can kapanggih, heulang jangji bakal nyamberan anak hayam. (*)

---

Galura