Kasilib (Bagean 3)

Geus deukeut pisan kana waktu akad - malah nu rek nyaraksian oge geus ngajibeng - Nyi Demang Warudoyong kaluar ti kobong panganten awewe, seselendep nyampeurkeun salakina. Beungeutna pias kawas nu manggih kareuwas jeung teu weleh bibirigidigan, tuluy kucuwas-kuciwes ka salakina. Demang Warudoyong jung nangtung, tuluy nuturkeun pamajikanana asup ka kobong panganten awewe. Teu lila geus kaluar deui, jamotrot bari teu eureun-eureun gogodeg. Nu ningal pada heran.

Panganten lalaki geus nyanghareup ka panghulu, Mas Ula geus muka buku gede, wali geus rek engab tindak. Jung Demang Warudoyong, bapana panganten lalaki, nangtung, pok ngomong sorana ngadegdeg, "Mas Panghulu, ulah waka prak, kaula arek nyarita heula!"

Nu kumpul pada curinghak.

"Hade lamun pada nyaho," Demang Warudoyong ngamimitian. "Ngarangkepna anak kaula ka anak Demang Tegal Ula teh, estu kahayang kolot pada kolot bae. Maksudna nya eta pikeun leuwih ngaraketkeun duduluran. Jinis jeung jinis mah nepi ka jam ieu oge tacan kungsi papanggih, sumawonna mun geus warawuh mah. Ari kaula, nyahona ka Cilacingrung teh, baheula bae jaman manehna masih keneh budak. Pikeun nyingkahan babasan manis tungtung pait, nu temahna baris ngabengkahkeun babarayaan, kaula menta, samemeh maranehna dikawinkeun supaya ditepung-lawungkeun heula sadengok mah!"

Sarerea teu aya nu teu panuju.

Tuluy panganten lalaki dituyun ngadeukeutan lawang kobong, tempat panganten awewe. Panganten awewe nu meunang ngahiasan sataker kebek, dituyun dibawa kaluar. Barang gok, panganten lalaki olohok, panonna molotot, sungutna calangap, undur-unduran, tuluy ngoceak, "Tobat Bapa! Tinimbang kudu kawin ka kelong mah, kajeun paeh bae!" bari bibirigidan jeung teterejelan arek lumpat.

"Ke, ke, naon ieu teh? Heran?" ceuk bakal mitohana, reup beureum ray pias nahan amarah. "Baruk kelong? Anak aing sademplon-demplon disebut kelong?"

"Karang dina tungtung irungna, ngagayot sagede terong peot. Susuna rayud!" jawab Bincurangherang bari bibirigidigan. Demang Tegal Ula nyerenteng rek nanganan bakal minantuna, tapi pada ngarejengan.

Ceuk Demang Warudoyong, ngomongna leuleuy, "Sabar Demang, urang badami!"

Demang Tegal Ula morongos. "Teu kudu rea carita. Memang andika ngahaja, rek ngahina jeung ngawiwirang kaula di pasamoan! Andika nyieun pucuk ti girang. Andika neangan lantaran."

"Andika anu salah!" jawab Demang Warudoyong. "Naha boga anak goreng sopak, uwar-awur pajah denok demplon?"

"Kumaha...?!" Demang Tegal Ula sasat ngagorowok. "Dedengean teh anak kaula goreng sopak? Na, aya tetenjoan...bolor sugan!"

Lain antepeun ceuk hate.

Kuring hanjat kana korsi, gorowok ngagorowok. "Kami utusan Nu Rukun, keur ngalanglang dunya siluman. Kami tukang ngarapihkeun papaseaan. Bisi teu palercaya ieu buktina!" gereyem kuring mapatkeun pituah Aki.

Heab hawa panas munggah nyongkab, beuki lila beuki panas.

"Percaya! Percaya!" raong saur manuk. "Ampun, ampun, teu kuat! Hareudang, hareudang! Panas, panas!"

Gereyem deui kuring mapatkeun jangjawokan pamepesna. Rep hawa panas rerep. Pepes teu sakara-kara.

"Mun geus palercaya, kami rek nuluykeun carita!"

"Mangga, mangga!"

"Dengekeun ku sarerea!" Kabeh marelong ka kuring.

"Ku nu lain jodona, najan geulis, katempona goreng patut. Sabalikna, ku nu jodona, najan kawas bedog perahaneun, katempona geulis jeung lucu bae. Nyi Putri Cilacingkrung lain jodona Bincurangherang!"

Gegeden jeung kokolot-kokolot arunggut-unggutan.

Ceuk kuring deui. "Anu rukun henteu widi, lamun maranehna ngarangkep! Sabab Bincurangherang boga tanda hideung nyumput, tanda bodasna henteu kabuka. Lamun manehna ngarangkep ka Cilacingkrung, bakal mawa sangar ka nagara. Tegal Ula jeung Warudoyong baris runtag. Jodona Bincurangherang mah kudu ka anak Kaliwon Tamiangropoh. Kaharti Ki Demang Warudoyong?"

"Kaharti, utusan! Kula atoh, Warudoyong moal tulus nyorang bahla."

"Tapi kumaha wiwirang kaula?" ceuk Demang Tegal Ula.

"Kami tacan perele nyarita," ceuk kuring. "Darengekeun!"

"Anu rukun geus netepkeun, Cilacingkrung kudu kawin ka Sabakangkang, anak Demang Limbungan, jeung kudu peuting ieu jeung jam ieu pisan, sabab Cilacingkrung boga karang dina irung, tanda watekna bale bandung. Sabakangkang boga karang dina tarang, tanda watekna bisa perang. Lamunna pinareng tepung, ku rayat dipunjung-punjung. Alam siluman alamat nanjung.

Nu karumpul kabeh jarempe.

Ceuk kuring deui. "He Demang Tegal Ula, cing ilikan tarang Sabakangkang, na enya aya karangan?"

"Enya aya!" ceuk Demang Tegal Ula, sanggeus ngawas-ngawas tarang Sabakangkang.

"Ayeuna Demang Limbungan, coba ilikan irung Cilacingkrung!"

"Aya...!" ceuk Demang Limbungan.

"Da tara Bohong Nu Rukun mah!" ceuk kuring.

"Nu Rukun, mustahil bohong!" ceuk kokolot-kokolot.

"Kumaha tuluyna, utusan?" Demang Tegal Ula geus teu sabar.

"Ke, urang tanya saurang-saurang," ceuk kuring.

"Kumaha Demang Limbungan, idin mun Sabakangkang ngagantian Bincurangherang, kawin ka Cilacingkrung ayeuna?"

"Idin utusan! Ngan kumaha, da kaula mah teu barang bawa geusan ngawinkeun!"

"Asal idin bae!" ceuk Demang Warudoyong. "Babawaan Ki Bincurangherang da moal dipenta deui."

"Kumaha andika Demang Tegal Ula, suka Bincurangherang dihilian ku Sabakangkang?"

"Suka pisan, asa ditutupan wiwirang," tembalna.

"Kumaha Sabakangkang, daek kawin ka Cilacingkrung?"

"Kumaha utusan bae," tembalna bari meureudeuy ka kuring.

"Cing tanya Cilacingkrung ku indungna, daek ka Sabakangkang atawa henteu?"

"Daek, cenah!" tembal indungna tina panto kobong.

"Beres ayeuna mah. Prak panghulu, kawinkeun!"

Sabakangkang maju ka hareup. Mas Ulis nyatetkeun ngaran-ngaran panganten jeung wali. Pok Mas Ulis merean kekecapanana dituturkeun ku wali. Ti dinya cag panghulu nyekel indung leungeun panganten lalaki, gereyem nungtun pokpokan akad dituturkeun ku Sabakangkang. Beres eta, tuluy Mas Ulis maca perjanjian-perjanjian panganten lalaki, sarengsena tuluy Sabakangkang ngajempol. Galantang panghulu ngado'a.

Borobot pepetasan, ger gamelan ditabeuh deui.

Panganten direndengkeun. Sung-song nu nyalametkeun, di antarana Bincurangherang. Malah Demang Warudoyong mah jeung mapatahan sagala.

Raramean terus-terusan beurang peuting, tilu poe tilu peuting. Rame rongkah teu aya papadana. Nu mabok arak unggal peuting pabalatak. Kamari rombongan Demang Limbungan, kakara marulang. Kuring teu kari. Boh di jalan boh di imah, Demang Limbungan pok deui pok deui muji karikipan akal kuring.

Tadi isuk, di Limbungan ngayakeun gempungan gede.

Sanggeus kabeh kokolot hadir, pok Demang Kalangburang ngomong. "Bareto kaula geus jangji ka Ki Malendra, lamun kahayang Sabakangkang laksana kalawan repeh-rapih, kaula rek nyumponan pamentana. Ayeuna anak kaula geus kawin ka Cilacingkrung kalawan lulus-banglus. Eta teh ku tipu demitna Ki Malendra."

"Bener, bener!" raong saur manuk.

"Jadi," omongna deui. "Pantes lamun kaula mulang tarima ka manehna, babakuna ku netepan jangji bareto. Memeh nanya naon kahayangna, kaula menta disaksian ku arandika, ti semet poe ieu ka hareup, Ki Malendra saturunanana meunang barang ala di pakarangan urang, boh nu mangrupa pepelakan, boh mangrupa ingon-ingon. Andika sarerea teu meunang ganggu!"

"Nyakseni, nyakseni!" raong deui saur manuk.

"Ayeuna kaula rek nanya, naon kahayang andika, Ki Malendra?"

"Kaula ngan hayang dijajapkeun balik ka kolot!" tembal kuring. Bener, kabisa kuring ngelehkeun kabisa siluman, tapi jalan mulang ka alam manusa, poek teu kapanggih.

Demang Kalangburang ngaheneng, katempo rada ngariuk.

Ceuk kuring deui. "Kaula lain teu betah cicing di dieu, da sakieu diarakuna, tapi kaula geus lila teuing ninggalkeun lembur, bisi laleungiteun!"

Omong Demang bangun susah. "Ari kahayang mah, andika teh tetep-tumetep bae di dieu, kula butuh keur kokolot. Tapi kusabab kaula embung disebut tukang jalir, nya dalah dikumaha da geus heula cak. Iraha niat mulang teh?"

"Engke pabeubeurang, ayeuna mah sono keneh," ceuk kuring ngolo hatena.

Ti dinya pak-pok, kokolot-kokolot nu menta dianjangan ka imah-imahna. Harayang ngaku heula cenah, samemeh kuring balik.

Kusiwel Demang Kalangburang ngaluarkeun bungkusan leutik tina bentenna, pokna ka kuring. "Saenyana mah kasaktian andika teh geus teu aya bandingna, tapi kaula keukeuh hayang aya kahadean ka andika. Ku lantaran eta, omat ieu kudu ditarima, itung-itung tanda mata jeung sugan bisa nambahan karongkahan andika!" bari song manehna mikeun bungkusan leutik tea ka kuring. Ku kuring ditampanan bari ditarimakeun.

"Tah ieu!" ceuk Ki Malendra. Ku nu karumpul piligenti diarilikan. Batu, kawasna mah.

Ki Malendra nuluykeun deui caritana.

Teu lila kumpulan bubar. Kuring dipagorenyangkeun ku nu harayang dianjangan ka imahna. Sanggeus ngunggahan tilu opat imah, kira-kira pukul dua welas, kuring amitan ka Demang Kalangburang rek balik tea. Demang Kalangburang tuluy nyalukan gulang-gulang Balaketa-Balaketu, nu kungsi nganteur kuring basa indit ka Tegal Ula tea.

Ceuk Demang, "Balaketa-Balaketu, geura jajapkeun ieu Ki Malendra ka lemburna!"

"Mangga, mangga...!" jawabna meh bareng.

Demang Kalangburang ngadeukeutean ka kuring. Omongna, "Engke mun geus nepi ka Haurpugur, geura ngucap kieu (gereyem diharewoskeun)."

Ti dinya mah tuluy kuring indit diiringkeun ku Balaketa jeung Balaketu. Mimitina mapay jalan gede ngabulungbung, jog ka jalan desa, bras ka jalan satapak tur tarahal. Tamba cape, leumpang teh sakapeung mah dibarung ku ngobrol. Eta deuih kayungyunna teh Balaketa sajajalan mapatahan jampe nyeri beuteung, cenah keur ngabangbrangkeun kacape. Sanggeus aya ratusna balik, kakara kuring apal. Kieu cenah:

Ratu Bangbung. Ratu Biung. Ratu Buyut nu milala.
Ulah milala di dieu, kudu milala di ditu, di walungan cukang dua.
Bral andika geura lugay, ulah ngeumbing kana peujit, ulah muntang kana bujal, nya muntang ka akar kujang.
Tiis jadina, ngeunah datangna, tiis dingin palipurna, hurip waras.

Barang geus nepi ka tungtung lembur Haurpugur - da lembur geuning Haurpugur teh lain tabet kawas nu katingal ku urang - pok Balaketa nyarita ka kuring, "Nepi ka dieu bae, kaula jeung Balaketu jajap teh, da geus deukeut. Ngan kaula menta, samemeh tujuh lengkah ti dieu, omat andika ulah ngalieuk ka tukang!"

"Heug...!" ceuk kuring.

Reup kuring peureum, gereyem maca "Kalimah Kalih", sakumaha pituah Demang Kalangburang, nu diharewoskeun ka kuring basa rek indit tadi. Ari bray, beunta rarasaan asa ngimpi, da geuning kuring teh bet aya di tabet Haurpugur. Ari ret ka tukang, lagadar-lagadar...sadua-dua sagede-gede catang jambe jalajaweran, gulusur-gulusur kaditukeun, oray laki! Ceuk hate, meureun eta teh Balaketa jeung Balaketu tea.

"Ti dinya mah kuring gagancangan indit kaluar ti tabet Haurpugur, da geus reupreupan jeung pras-pris hujan. Tepi ka sawah wetaneun lembur, breg hujan teh kawas nu dicicikeun bae. Kuring ngiuhan di saung Ki Marma. Dur isa, hujan teh kakara raat. Ari nepi ka dieu, ku Ki Nata dijurig-jurig!"

Janari leutik, nu tas tarahlil kakara baralik. (*)

Sambungan ti Bagean 2

---

Ki Umbara

T A M A T