Jantung

Hujan ngaririncik basa Aisah datang ka imah indungna, bajuna rancucut. Nempo indungna keur diuk dina bale di dapur bari nyisig, Aisah langsung nyuuh kana lahunan indungna. Nyegruk ceurik kanyenyerian dina lahunan indungna. Awakna ngagibrig siga anu kabulusan. Bari pinuh ku kanyaah, ku indungna sirahna diusapan. Pok ngomong leuleuy, "Aya naon deui, Nyai?"

Aisah nenggak nempo paroman indungna bari cipanona merebes mili, bari nyaritana dareuda, "Kang Iwan mawa awewe deui ka kamar Nyai, Ema."

Indungna ngusapan buuk anakna bari teu weleh nembongkeun kasabaran.

"Lain kakarak sakali pan kituna teh, Nyai. Keun engke oge eureun sorangan. Anggap we jelema mabok. Ke oge aya eureunna."

Aisah unggeuk. "Enya Ema, sigana mah moal sakali-kali deui kikituanana teh."

Aisah nyuuh deui kana lahunan Indungna. Ret indungna ngareret kana kantong keresek hideung gede anu masih dikeukeuweuk ku anakna. Manehna nanya, "Mawa naon eta keur Ema, Nyai?"

Aisah cengkat. Pek eusi keresek dibukakeun. Aya nu dibungkus ku samping Sido Mukti urut make manehna basa ngadahup ka Iwan.

"Naon eta teh, Nyai?" indungna nanya bari neges-neges anu ngagoler hareupeunana.

"Jantung Kang Iwan, Ema..." (*)

---

Lies Tjandra Kancana