Guguritan

Guguritan asalna kecapna tina gurit. Mun seug dipapay leuwih jauh, kecap gurit teh asalna tina basa Sangsekerta grath, hartina nyusun karangan. Dina basa sunda aya istilah ngagurit atawa ngadangding. Ari hartina mah sarua bae nuduhkeun pagawean ngareka atawa nyusun karangan winangun dangding. Cindekna nu dimaksud guguritan teh nyaeta karangan ugeran anu kauger ku patokan pupuh.

Dina kasusastraan Sunda karangan ugeran anu kauger ku patokan pupuh teh lain guguritan wae, tapi aya nu disebut wawacan. Ari nungabedakeun guguritan jeung wawacan, nyaeta panjang pondokna eusi karangan. Guguritan mah paling panjang diwangun ku puluhan pada, sedengkeun wawacan mah karereanana diwangun ku ratusan malah rebuan pada.

Gelarna dina sastra Sunda, guguritan teh mangrupa sastra sampeuran, nyaeta ku ayana pangaruh tina kabudayaan Jawa.

Sabada Pajajaran runtag dina taun 1579, Pasundan kungsi diereh ku Mataram. Kailaharan bangsa nu diereh, sok tuturut munding kana kabiasaan bangsa nu ngerehna, kaasup dina sual kabudayaan.

Loba pisan kabudayaan kabudayaan Jawa anu mangaruhan kana kabudayaan Sunda. Adat istiadat, katatanagaraan, jeung tatakrama hirup kumbuh urang Sunda harita loba anu ngeunteung ka Jawa. Ti mimiti cara nyieun surat, ngagunakeun basa, nepi ka papakean loba anu nurutan kabiasaan urang Jawa.

Mangsa harita loba urang Sunda anu muka patalimarga ka Jawa, utamana ti golongan para menak. Lian ti perlu pikeun nguruskeun masalah katatanagaraan, oge rea urang Sunda anu ngadon sakarola ka Jawa. Di Jawana diantarana diajar perkara dangding, sabada mulang deui di lingkungan masarakat Sunda.

Rupa-rupa Guguritan

• Asmaranda
• Balakbak
• Dangdanggula
• Jurudemung
• Durma
• Gambuh
• Gurisa
• kinanti
• Ladrang
• Lambang
• Maskumambang
• Mijil
• Pangkur
• Pucung
• Magatru
• Sinom
• Wirangrong

Watek-watek Guguritan

• Asmaranda
  • Watekna silih asih silih pikanyaah atawa mepelingan. Unggal pada diwangun ku tujuh padalisan.
• Dangdanggula
  • Watekna bungah atawa agung. Unggal pada diwangun ku sapuluh padalisan.
• Jurudemung
  • Watekna kaduhung atawa hanjakal. Unggal pada diwangun ku lima padalisan.
• Durma
  • Watekna heuras atawa siap rek tarung. Unggal pada diwangun ku tujuh padalisan.
• Gurisa
  • Watekna pangangguran, lulucon, atawa tamba kesel. Unggal pada di wangun ku dalapan padalisan.
• Kinanti
  • Watekna mihareup atwa prihatin. Unggal pada diwangun ku genep padalisan.
• Ladrang
  • Watekna banyol pikaseurien. Unggal pada diwangun ku opat padalisan.
• Lambang
  • Watekna banyol atawa pikaseurieun. Unggal pada diwangun ku opat padalisan.
• Magatru
  • Watekna lulucon deukeut deukeut kana prihatin. Unggal pada diwangun ku lima padalisan.
• Maskumambang
  • Watekna prihatin, sasambat atawa nalangsa. Unggal pada diwangun ku opat padalisan.
• Mijil
  • Watekna sedih, susah atawa cilaka. Unggal pada diwangun ku genep padalisan.
• Pangkur
  • Watekna nafsu, lumampah atawa sadia rek perang. Unggal pada diwangun ku tujuh padalisan.
• Pucung
  • Watekna piwuruk, wawaran, atawa mepelingan. Unggal pada diwangun ku opat padalisan.
• Sinom
  • Watekna gumbira. Unggal pada diwangun ku salapan padalisan
• Wirangrong
  • Watekna era atawa wiring. Unggal pada diwangun ku genep padalisan. (*)

---

Taufik Faturohman