Batu Nu Bisa Ceurik

Kacaturkeun jaman baheula, di hiji desa atawa lembur di sisi gunung nu aya di wewengkon Kalimantan, aya hiji awewe randa nu hirup babarengan jeung saurang anakna - awewe - nu umurna geus mangkat rumaja atawa sawawa. Eta budak awewe teh kacida geulisna, da cacak lamun cicingna di kota mah tinangtu geus jadi pamajikan sudagar kaya atawa kaum bangsawan. Sok sanajan geulis rupana, eta budak awewe teh ngabogaan sipat anu goreng, adigung, jeung kacida pisan ngedulna.

Biasana lamun indungna indit ka kota rek ngiangkeun hasil tatanen jeung suluh, anakna teh tara diajak, sok sina cicing we nungguan imah. Tapi dina hiji poe mah anakna teh diajak, ngarah apal kayaan kota sarta ngarah nyaho kawas kumaha ripuhna nu jadi indung dina sual pangabutuh sapopoe. Puguh we anakna ngarasa bungah naker diajakan ka kota teh, da puguh arang langka nyaba. Manehna tuluy dangdan sateker kebek, ngarah katingal leuwih geulis.

Pasusubuh arindit ti imahna teh, laleumpang. Inditna ngakeup suluh bari angkaribung ngajingjing sarta nyunyuhun karanjang nu dieusian ku hasil tatanen jualeun ka pasar. Ari anakna mah leumpang ti heula, ngagandeuang teu barangbawa nanaon pisan. Dangdananana ginding, make papakeanana nu wareuteuh. Sabalikna ari indungna mah make papakeanana teh estuning basajan pisan, make papakean nu biasa dipake gawe sapopoena.

Di jalan di pasampangan, unggal panggih jeung jelema teu weleh wae maruji kana kageulisan budak awewe tea bari puk-pok naranyakeun ka indungna.

"Leuh, aya ku geulis eta Si Nyai! Tuang putra eta teh, Bu?" ceuk nu nanya. Samemeh pok indungna ngajawab kaburu dipiheulaan ku anakna. "Oh, sanes! Abdi mah sanes putrana, tapi dununganana! Ieu teh pakacar abdi!" ceuk budakna teh bari nuduhkeun indungna.

Kitu jeung kitu we, unggal aya nu nanyakeun ngeunaan indungna, si budak awewe teh sok ngajawab yen anu ditukangeun manehna teh pakacarna atawa babuna, lain indungna.

"Aya ku teungteuingan Nyai, ka indung ngakukeun babu! Ieuh, najan hade-goreng oge apanan Ema teh indung hidep!" ceuk indungna.

"Da era atuh, Ema! Moal enya ari kuring sakieu gindingna, ku batur pada nyarebut geulis, sedengkeun ari indung sorangan meuni sakitu rudinna! Era atuda ngakukeunana ge," tembal anakna bari kuraweud, jamotrot.

Di satengahing jalan indung jeung anak parea-rea omong, pacental-cental. Ahirna bakating ku nyeri hate dihina ku anakna, pok we indungna teh nyarita kieu. "Nya enggeus atuh Nyai, ari sakirana maneh bedegong sarta gurat batu mah, embung ngakukeun yen Ema indung maneh, ti semet ayeuna keneh maneh mah bakal jadi batu...!" ceuk indungna.

Rengse indungna nyarita kitu, dadak sakala langit ujug-ujug angkeub. Gelap pating beledag. Si budak awewe anu doraka ti indungna kabentar ku gelap. Awakna tutung, sarta harita keneh robah jadi batu.

Eta batu teh ngaluarkeun cai, nu dipercaya cenah eta teh cipanon budak awewe tea anu keur ceurik lantaran ngarasa kaduhung. Nepi ka kiwari eta batu teh nelah disarebut "batu menangis". (*)

---

Agus B. Irawan (Mangle No. 2303)