Sasakala Situ Bagendit

Di wewengkon Garut aya talaga nu ngaranna kawentar ka mana-mana, nyaeta Talaga Bagendit. Kacida kajojona teh. Saban poe Ahad tawa poe pakanci ramena teh luar biasa. Ti nu deukeut ti nu jauh jelema teh mungguh merul nu rek ngadon sukan-sukan, babakuna lalayaran.

Cek sasakala mah, cek dongeng nu sok didongengkeun deui, eta Talaga Bagendit asal muasalna kieu:

Baheula, geus rebuan taun ka tukang, aya hiji randa beunghar katelah Nyi Endit. Ieu teh saenyana mah nenehna, da ngaranna sajati mah Nyi Bagendit. Manehna teh kacida pisan kumedna. Geus taya nu bireuk deui kana kakumedanana. Salian ti pakacar-pakacarna mah tara aya nu lar sup ka imahna. Estuning lain babasan eta mah hirup nyorangan teh. Kajaba ti teu aya nu ngawawuhan, Nyi Endit teh memang jalma nunggul pinang, geus teu kadang teu warga, hirupna teh estuning nunggelis. Ari beungharna tea mah tetela. Beh kebonna beh sawahna, imahna ge panggedena di salembur eta mah. Turug-turug ngahaja mencilkeun maneh, ngababakan di tengah pasawahan nu upluk-aplak. Maksudna teu aya lian ku bawaning embung campur jeung babaturan, da sieun kasoro tea. Teu kitu mah atuh moal disebut medit.

Kacaturkeun keur usum panen. Di ditu di dieu ceuyah anu dibaruat. Ka sawah Nyi Endit ge rea nu gacong. Ari sarengse dibuat jeung sanggeus parena di ka leuitkeun, sakumaha tali paranti, Nyi Endit nyieun sedekah ngondang lebe jeung sawatara tatangga. Popolahna saniskara ku sorangan, teu aya nu ngabantuan. Barang geus tarapti, sakur nu mantuan ngakut tuluy diondang, ngariung tumpeng. Atuh nu ngariung teh nepi ka aya ratusna, tapi sadia tumpengna teu sabaraha, nepi ka ngan sakoteap geus beres bari tingkaretap keneh.

Keur meujeuhna balakecrakan, solongkrong aya aki-aki bongkok nu nyampeurkeun. Ku pribumi teu ditari teu ditakon, nya pok aki-aki waleh, yen teu kawawa ku lapar, sugan aya sih piwelas. Ana gantawang teh Nyi Endit bet nyarekan, nyeklek-nyeklekkeun, pajarkeun teh taya kaera, teu ngahutang gawe, menta bagean. Tungtungna nepi ka nundung, aki-aki dititah nyingkah. Cindekna mah geus lain picaritaeun.

Aki-aki indit bari jumarigjeung, bangun teu nangan. Memeh indit manehna ngomong kieu, "Sagala ge boh ka nu hade boh ka nu goreng, moal taya wawalesna." Ngomongna kitu teh bari kasaksian ku sakur nu aya di dinya.

Sarengsena, nu dalahar tuluy amit rek baralik. Kakara ge pating laleos, rug-reg ngarandeg, sabab aya nu tinggarero, "Caah! Caah!" cenah.

Henteu kanyahoan ti mana datangna cai, ngan leb bae pakarangan Nyi Endit teh geus kakeueum. Atuh kacida ributna, jalma-jalma geus teu inget ka diri batur, asal salamet dirina bae. Nyi Endit ge nya kitu, niat rek nyingkirkeun cai, tapi barang rek kaluar ti imahna, cai teh nepi ka lir ombak laut tinggaruling ka palebah Nyi Endit. Imahna terus kakeueum meh laput.

Nyi Endit angkleung-angkleungan, bari satungtung bisa mah teu weleh-weleh sasambat menta tulung. Tapi henteu kungsi lila jep bae jempe, sihoreng geus tikerelep. Imahna ge geus teu tembong. Sumawonna sawahna nu upluk-aplak geus aya di dasar cai. Lembur sakuriling bungking geus salin rupa jadi talaga, anu nepi ka ayeuna disebut Talaga Bagendit tea. (*)

---

Tina Lima Abad Sastra Sunda