Titinggi Ula-Ali

Samemeh arindit ka pangajian, mun pareng pasosore hade poena, barudak awewe nu umurna rata-rata 8 nepi ka 11 taun arulin heula. Itung-itung ngadagoan bedug magrib. Sampingna nu sok diparake dina ngaji, ditareundeun heula ditumpukkeun dina bale-bale. Ari tiungna atawa karembong mah teu ditunda, tapi dibeubeurkeun, kawas nu rek ngarigel.

Tungtung karembong anu ngarumbayna pada nyarekel, manjang atawa ngantay ti hareup nepi ka tukang, kawas kareta api atawa titinggi.

Ikoh nangtung panghareupna, jadi hulu atawa lokomotipna mun dina kareta api tea mah. Disambung ku Ursih, anu kadua nyekel karembong Ikoh. Ursih disebutna beuheung. Uta, Enen, Eni, Kokom jadi awakna, ari Onah nu pangpandeurina jadi buntutna.

"Geus sadia ieu teh?" cek hulu nanya ka sarerea.

"Enggeus!" tembal sarerea. Tuluy papageuh-pageuh nyarekel karembong tea. Brek rada darongko. Dimimitian atawa diluluguan ku hulu.

"Yu urang mimitian maju!" cek hulu. Majuna rada ongko-ongkoan. Bulat-beulit, arula-arileu, ngurilingan buruan, bari raeng karakawihan,

Titinggi ula-uli
papagan urang Kawali
pais tipung digulaan diteundeun
di catang hawu diteang
enyut bilatung...

Kira-kira geus meunang 3-4 kuriling, top hulu teh nyokot dangdaunan atawa rokrak, dibikeun ka beuheung bari ngomong, (antayan mah tetep maju keneh, henteu cicing), "Ieu mihape hayam!" Ditampanan ku beuheung, beuheung mikeun ka awak, mapay tug nepi ka buntutna, silih pihapekeun. Ari Omah, buntutna, teu kabagean pikeun mihapekeunana, ngan belewer bae dangdaunan atawa rokrak teh dialungkeun.

Hulu nanyakeun ka beuheung, "Di mana hayam aing?"

"Dipihapekeun!" tembal beuheung.

Beuheung mapay nanyakeun ka awak, awak nanya ka buntut.

Buntut nembalan, "Euweuh, dihakan heulang!"

Hulu ambek, tuluy ngudag-ngudag buntut sina neangan nu leungit. Ari geus kapanggih, bagilir, si buntut kudu jadi hulu titinggi, ari hulu jadi beuheung. Kitu bae meunang sababaraha balikan nepi ka pada kagiliran jadi hulu atawa buntut.

"Tah euy, Si Jali geus adan di munara masjid!" cek Ikoh bari top kana samping nu ditunda dina bale-bale tea, ditaluturkeun ku babaturanana rek pada beberesih. (*)

---

Akub Sumarna