Si Kabayan Dicukur

Si Kabayan teh kandulan pisan. Ari kandulan teh pihartieunana jahe alias jago hees. Teu kaop nyangkere atawa nyarande sok ker wae kerek.

Sakali mangsa Si Kabayan teh dicukur. Dicukurna handapeun tangkal gede di sisi jalan. Ari tukang cukurna teh ruruntuk dalang. Tadina hayang jadi dalang tapi teu kataekan, kalah jadi tukang cukur. Teu wudu payu nyukurna mah da eta ari nyukur sok bari ngadalang.

Si Kabayan ti barang gek diuk dina korsi panyukuran geus lelenggutan wae nundutan. Saperti biasa tukang cukur teh ari ceg kana gunting jeung sisir sok tuluy we ngabuih, ngadalang. Pokna teh, "Tah kacaturkeun di Nagara Alengka, rajana jenengan Dasamuka. Ari dasa hartina sapuluh, ari muka eta hartosna beungeut atanapi raray."

Si Kabayan nu keur ngalenggut ngarasa kaganggu ku nu keur ngadalang. Bari heuay Si Kabayan ngomong, "Pondokkeun wae, Mang!"

Trek-trek tukang cukur teh ngaguntingan buuk Si Kabayan bari pok deui, "Ari geus kitu, eta Dasamuka teh bogoh ka Dewi Sinta, geureuhna Sri Rama."

"Pondokkeun wae, Mang!" ceuk Si Kabayan. Ngomongna selang-seling antara inget jeung heunteu bakating ku tunduh. Teu lila reup deui sare, lilir sakeudeung, tukang cukur teh angger keur ngadongeng keneh.

"Urang tunda Dewi Sinta nu keur di Alengka, sabab dipaling ku Rahwana. Caturkeun Sri Rama..." Si Kabayan asa kaganggu sarena terus ngomong bari lulungu, "Pondokkeun, Mang!" Terus reup deui peureum.

Trek...trek...tukang cukur ngaguntingan buuk Si Kabayan bari nuluykeun ngadongengna. Tiap Si Kabayan lilir, tukang cukur teh keur ngabuih keneh wae ngadalang, tapi ari leungeunna mah tetep teu eureun-eureun ngaguntingan buuk Si Kabayan. Si Kabayan keuheuleun pisan sabab sarena kaganggu ku sora tukang cukur, nu sakapeung sok ngagerem nurutan sora buta atawa ngajerit nurutan sora Dewi Sinta basa dipaling ku Rahwana.

Antukna Si Kabayan ngambek ka tukang cukur bari ngomong, "Ceuk aing ge pondokkeun...pondokkeun!"

Tukang cukur nembalan, "Dipondokkeun kumaha ieu geus lenang kieu...!"

Ari ret Si Kabayan kana eunteung enya wae sirahna geus gundul teu buuk salambar-lambar acan. Puguh wae Si Kabayan teh ambek, "Nu dipondokkeun teh dongeng maneh lain lain buuk aing...!" Si Kabayan morongos.

Tukang cukur nembalan bari nyentak, "Bongan sorangan, naha atuh sare wae batur digawe teh, lain nuhun diembohan ku dongeng teh!"

Ngadenge tukang cukur ngomong kitu, ngan hing wae Si Kabayan ceurik bakating ku handeueuleunana jaba basa balik ku barudak di poyokan bari diabring-abring, "Penjol...penjol...!" (*)