Sasakala Cau Manggala Aya Sikian

Jaman baheula, cau Manggala kamashur minangka cau pangeunah-ngeunahna. Pangpunjulna ti antara sakabeh cau. Amis, pelem, jeung seungit melenghir. Katambah bisa asak sorangan dina tangkalna, teu kudu hese meuyeum model cau sejenna.

Nya ku lantaran kitu, cau Manggala teu meunang samanea dipelak jeung didahar. Jaman harita, cau Manggala husus tuangeun Kangjeng Raja. Tong boroning somah, cacah kuricakan, dalah bangsa menak oge, anu lain kulawedet raja mah, teu meunang melak jeung ngadahar. Cau Manggala wungkul dipelak di kebon kagungan raja. Wungkul tuangeun raja. Saha nu ngarempak eta aturan, bakal ditibanan hukuman anu beurat kacida.

Kacaturkeun dina hiji mangsa, pangeusi nagara kaserang panyakit murus. Kolot-budak, awewe-lalaki, sakur nu katerap, taya nu manggapulia. Karasa sore paeh peuting, karasa isuk paeh beurang teh enyaan. Dukun lepus, paraji sakti, taya nu mampuh ngungkulan. Ubar jeung jampe pamake taya nu metu.

Ngan kulawedet raja anu salamet teh. Sarehat belelejag bae. Atuh basa para gegeden laporan, yen pangeusi nagri gempar ku panyakit murus, raja malik teu suka. Para gegeden diseukseukan, pajar mere laporan palsu. Bakat ku napsu-napsuna raja, sakur gegeden nu laporan diasupkeun ka panjara, sabab dianggap ngahianat jeung ngawiwirang wibawa raja.

"Mun enya ge rahayat gempar, kakeunaan panyakit, meureun kami oge kudu katepaan," kitu pamadegan raja.

Ku ayana eta kajadian, sakabeh pangeusi nagri, taya nu wani betus. Kanyeri jeung kapeurih maranehna, disaridem bae ku sorangan. Panyakit beuki mahabu. Nu maot beuki loba.

Barang kaayaan geus parna pisan, torojol aya hiji resi. Ngahaja lugay ti patapaanna, lantaran teu tega ningali kawaluratan rahayat. Dawuhan resi, "Piubareun panyakit murus teh nyaeta cau Manggala!"

Rahayat atoh teu atoh dibere piubareun teh. Atoh ku ayana pituduh. Teu atohna, sabab pada apal, apan cau Manggala mah teu meunang didahar ku rahayat. Lamun aya nu wani-wani ngarempak, hukuman pati bageanana.

Tapi teu burung rea nu nekad. Ceuk maranehna, "Ku panyakit murus urang teh paeh! Ngadahar cau Manggala sarua paeh! Pati-pati paeh oge teu panasaran ari geus diihtiaran mah! Hayu batur, urang ngarala cau Manggala piubareun!"

Der cau Manggala kagungan raja teh diranjah ku sarerea. Am didalahar. Enya bae matih. Panyakit murus dadak sagala cageur.

Barang kaemper-emper ka karaton, yen pelak cau aya nu ngaranjah, raja teu kinten werana. Laju marentah, sangkan nyarek nu jadi ulon-ulonna.

"Kaula nu tanggung jawab. Kaula sayaga narima hukuman ti raja." Sang Resi gancang nyerenkeun diri ka gulang-gulang, bisi utusan raja meubeut-meulit ka rahayat nu teu tuah teu dosa.

Putusan raja, resi ditibanan hukuman gantung di kebon cau.

"Samemeh nyawa kaula paragat, kaula hayang nyarita heula ka balarea," resi ngasongkeun panuhun, samemeh logojo nalikeun tambang.

"Cik pok omongkeun naon pamenta anjeun teh!" raja ngidinan.

Bari ngarawu keusik, terus diawurkeun ka lebah dapuran cau, resi sasauran, "Ti mimiti poe ieu, cau manggala lain ngan wungkul dahareun raja, tapi kum kadaharan balarea! Malah raja mah jadi moal beukieun, kajaba lamun salin jinis jadi cocodot!"

Tamat kasauran resi, sakedet netra, raja sakulawarga salin jinis jadi cocodot. Hiber tingkeleper bari ricit disarada. Ari sang resi teu kanyahoan ngiles, duka ka mana.

Ti harita, cau manggala jadi loba sikian. Tapi tetep pada mikaresep, kaasup ku cocodot tea. Atuh hasiatna, angger, bisa dipake ngubaran panyakit murus. (*)

---