Jelema Sabenerna

Aya hiji jelema teuing ku malarat. Cek babasan tea mah nyatu sore henteu isuk. Kahirupanana tina ngala kai. Ku walurat-waluratna, parabot usahana oge ngan baliung bae sahiji.

Dina hiji poe manehna nuar kai di jero leuweung, sisi talaga nu jero pisan, caina ngajumbleng pikakeueungeun. Dasar tariking cilaka, barang baliungna diheumbatkeun kana tangkal kai tea, polonyon bae locot tina perahna, kecemplung ragrag kana talaga. Manehna rampohpoy bawaning ku handeueul. Brek diuk bari ngahuleng semu bingung, mencrong kana lebah muragna baliung tea. Rek diteuleuman, lain teuleum-teuleumaneun, kawantu talaga sakitu jerona.

Curudcud cipanonna bijil, ku tina teu kuat nahan kasedih. Sabot keur kitu, teu kanyahoan jebul bae aya aki-aki nyampeurkeun. Janggotna bodas ngeplak kawas kapas, pipina kemong, sarta kulitna beresih. Aki-aki teh pok nanya, "Ku naon maneh bet ceurik, kawas anu susah-susah teuing?"

Barabat ku tukang ngala kai dicaritakeun satarabasna yen manehna keur sedih lantaran baliungna murag kana talaga, mangkaning teu boga deui parabot sejenna. Ceuk aki-aki, "Sing sabar tawekal bae atuh, ulah aral ku sakitu. Pamali! Keun ku aki dipangneuleumankeun!"

Sanggeus ngomong kitu aki-aki teh tuluy ancrub, lep teuleum. Teu lila rongheap deui hanjat bari ngajingjing baliung perak. Tuluy diasongkeun ka tukang ngala kai, bari ngomong, "Ieu baliung Ujang teh?"

Walon tukang ngala kai, "Euleuh geuning ieu mah baliung perak! Sanes Aki, nu kuring mah sanes ieu. Eta mah duka baliung saha. Moal enya jelema malarat gaduh baliung perak!"

Ku aki-aki teu dijawab, anggur lep teuleum deui. Si Aki mucunghul deui bari ngacungkeun baliung emas. "Sanes, Aki! Eta mah sanes baliung nu kuring. Duka nu saha."

Aki-aki teh lep deui teuleum cara tadi. Ngendek sajongjongan geus pucunghul deui bari ngacungkeun baliung biasa, rompang-rompang acan. "Ieu kitu baliung Ujang mah?"

"Leres eta, Aki!" ceuk tukang ngala kai teh. Leungeunna ngadegdeg bari nampanan baliung rompang, bakating ku atoh.

"Nuhun Aki, nuhun parantos mangneuleumankeun talaga nepi ka baliung kuring kapimilik deui. Aki teh sasat parantos numbu umur kuring. Naon atuh pamulang tarima kuring ka aki? Da puguh kuring mah apan sakieu buktina. Muga-muga bae Gusti Alloh ngaganjar kana kasaean Aki!"

Walon aki-aki, "Aki bungah nu taya hinggana ngadenge omongan Ujang bieu. Ari mungguh Aki mah leuwih bungah narimakeun ku basa nu utama, tinimbang dipulang ku dunya barana. Ieu baliung perak jeung emas kop mere, ganjaran keur jelema anu sabenerna, anu suci bersih, cadu ngaku barang batur, tara ngagasab banda nu lian. Jeung eta teh pikeun tanda yen Aki bungah dumeh geus bisa nulungan papada kaula."

Sajongjongan mah tukang ngala kai teh teu wanieun nampanan, olohok bae kawas nu kasima, ku tina atoh-atohna. Lila-lila baliung emas jeung perak teh ditampanan bari ngadegdeg. Segruk ceurik bari nyuuh ku gede-gedena kabungah. Barang manehna cengkat rek nganuhunkeun kadua kalian, aki-aki teh geus euweuh manten, geus leungit tanpa lebih ilang tanpa karana. (*)

---

Dicutat tina "Dongeng-dongeng Nini"