Ganjaran Ka Nu Hade Hate

Aya ekek nu hirup di hiji leuweung. Matuhna dina parungpung kai anu kacida gedena. Unggal poe eta ekek teh sok nyiar hakaneun, pangpangna siki jagong, di leuweung sabudeureunana. Lamun manggih kebon jagong, manehna gumbira pisan, nya bisa ngadahar saseubeuhna, nya bisa mawa siki jagong kana sayangna. Dibelaan pulang anting ti sayang ka kebon. Maksudna taya lian rek nyengcelengan siki jagong keur sasadiaan dina usum paceklik.

Bakat ku leukeun, lila-lila parungpung teh pinuh ku siki jagong. Nenjo siki jagong sakitu reana, ekek teh gede hate. Teu hariwang najan nyanghareupan usum paceklik oge, da boga sasadiaan dahareun.

Nya nepi ka mangsana paceklik. Harita teh usum katiga entak-entakan. Hawa pohara panasna, tatangkalan rea nu kalempohan, jukut gararing di mana-mana. Dina kaayaan kitu, ekek teh pohara apikna kana dahareun. Jagong simpenan teh diawet-awet sangkan mahi nepi ka usum ceuyah deui.

Dina hiji poe, jol aya jelema, ngadon ngiuhan handapeun tangkal nu dipake pamatuhan ku ekek tea. Lungse pisan bangunna eta jelema teh, da leumpangna oge semu rarampeolan. "Duh, mani cape-cape teuing. Jaba ieu beuteung geus sababaraha poe teu kaasupan dahareun," ceuk eta jelema ngomong sorangan.

Ngadenge kitu ekek teh karunyaeun, hayang nulungan ka eta jalma nu kalaparan. Geleber kana parungpungna, cok macok siki jagong. Tuluy dipuragkeun ka lebah jelema nu keur nyarande. Eta jelema teh curinghak reuwaseun dumeh aya siki jagong murag tina tangkal kai. Ceuk pikirna, meureun bawa manuk. Bakat ku lapar, siki jagong teh dicokot, dihuapkeun. Dicapek, diteureuy harita keneh.

Nempo polah jelema kitu, ekek teh beuki karunyaeun bae. Clik muragkeun deui sasiki. Kop dicokot deui, am dihuapkeun. Ngan kitu jeung kitu bae, clik...kop...am, clik...kop...am.

Sareana ge simpenan ekek. Saleutikna ge beuteung jelema. Antukna simpenan ekek teh beak pisan. Ari jelema tea jadi jagjag sarta kuat nuluykeun lalampahanana.

Saleosna jelema, ekek teh jadi bingung pedah manehna ayeuna teu bogaeun dahareun. Tapi teu lila bingungna teh. Malah tuluyna mah ngarasa bungah dumeh bisa nulungan jelema nu sasatna rek maot sahoseun.

Sakali mangsa, leuweung pamatuhan ekek teh kahuruan. Usum halodo kitu, seuneu teh babari pisan ngagedeanana. Kacida legana leuweung nu kahuruan teh. Tatangkalan tarutung, sasatoan loba nu paraeh. Ari ekek kabeneran keur nyaba jauh harita teh. Balik ti panyabaan pohara kagetna nenjo leuweung bungbang, ngan kari tunggul galituk. Harideung sesa kahuru. Tapi aneh pisan, ari tangkal kai pamatuhan ekek tea mah teu nanaon. Angger bae kitu, daunna oge teu perang-perang acan.

Bari pohara kagetna, ekek teh asup kana parungpung pamatuhanana. Tetela imahna beleger, teu kahuru kawas nu sejen. Padahal tatangkalan kenca katuhueunana mah ledis ku seuneu. Salila-lila ekek teh ngahuleng, tumarima kana kamurahan Pangeran. Tapi manehna ngarakacak, rus-ras ka tatanggana anu meunang musibat sakitu peuheurna. (*)

---

Ahmad Hadi