Ngondang Rajapati

"Modar siah..!" gorowok Cia Keng Hong. Pedangna ngarah beuheung musuh. Arjuna teu ngagiwar. Panarajang dipapag Pasopati.

Lima poe lima peuting nu tarung euweuh nu kasoran. Ahirna baroseneun sorangan. Keukeuh harirup deui sanajan awak geus dicacag diwalang-walang oge. Ajal teu daek mapag.

"Lieur aing! Meunggeus lah!" ceuk duanana meh bareng.

Manusa, sato, jeung mahluk sejenna euweuh nu paraeh. Awakna beuki kolot beuki karuat. Obat-obatan teu payu da euweuh nu gering. Tentara jeung pulisi ngecagkeun senjatana. Perang oge percumah, sakabeh senjata teu mampuh maehan musuh.

"Angka kematian nol dan angka kelahiran meningkat." Kitu laporan tiap kapala nagara.

Nagara beakeun lahan, dunya beuki heurin. Geus jutaan kali diayakeun saembara tarung, silih paehan.

"Sono hayang paeh!" Jalma patingcorowok. Imah gedong, kendaraan, jeung rajakaya meunang korupsi pada ninggalkeun.

"Uing hayang paeh!" harewos kokolot koruptor dina du'ana. Nganti-nganti Izroil nu keur ucang angge di tungtung jaman. (*)

---

Irman N Dimyatie