Bagong
Teu nyalahan omongan Abah teh. Di lebah lengkob nu baheula disebut Monas, kaciri jarapah keur anteng ngagayem pucuk sengon. Di punclut munara, nu emasna geus diganti ku hulu roket, orangutan kakalacatan. Zebra pating arangkleung, dituturkeun ku rombongan banteng jeung bison. Bagong ngagimbung di handapeun caringin. Aya puluhna. Kurang leuwih lima ratus meter ti dinya, pasukan darat katingali geus siap-siap.
Teu diengkekeun deui, leungeun neken kenop laser. Belesat, belesat. Cahaya pating jorelat. Di handap opat bagong ngagolepak. Nu lainna ti buburisat lumpat ka lebah rungkun kaliandra.
Laser ngajorelat deui. Dua bagong langsung kalentab, golepak. Kojor saharita ngadon meulah rumput gajah. Kuring mere kode ka pilot sangkan eunteup luhureun mahoni. Pasukan darat geus rikat ngadeukeutan, ngangkutan bagong kana treuk. Laju dititah ngaler, ka lebah urut Istana Nagara.
"Wah, palih dinya mah seueur pisan, Pa," sora Kamsuy dina radio.
Teu ditolih. Laser geus neueul kana tonggong bagong nu pating kurumuy ti lawang istana. (*)
Maman Gantra
Reviewed by Rupa Sundapura
on
16.32
Rating:
