Dongeng Merak jeung Monyet

"Keur naon sia Cekroh, ugal-ugil kitu?" ceuk merak bikang ka monyet jalu.

"Geuning sia Kuncung! Ieu keur ngarabut tangkal cengek," walon monyet.

"Naha dirabut atuh sia mah?" ceuk merak nu ngaran Kuncung teh bari kerung.

"Kabita atuda mani meuhpeuy kieu!" monyet ngajawab bari ugal-ugil teu bisaeun.

"Montong dirabut tangkalna atuh, petikan we!"

"Wah leukleuk dipetikan mah!"

"Lebar, ih! Petikan we!"

"Leukleuk!"

"Lebar etah tangkalna, goreng patut!"

"Leukleuk, torek!"

"Dasar bagong!" merak keuheuleun pisan.

"Hebat nya, gagah perkasa!" monyet kalah siga nu bungah disebut bagong teh.

"Lain gagah perkasa, jorok deuleu! Gawe susungkur, kolomberan diuyupan!"

"Jorok ge jago, bagong mah, Si Tumang ge kamari nepi ka gagaikan digadil!"

"Petikan, petikan! Terus huap-huapkeun! Montong dirabut tangkalna! Rek digubug ka mana atuh barina ge, mani jeung tangkal-tangkalna!"

"Rek disingkurkeun di ditu tuh,di puncer caringin, ngarah jongjon ngahenggoyna."

"Lebar kembangna, siah! Teangeun isuk pageto!" merak keukeuh ngahuit.

"Wah ngurus teuing isuk pageto! Ayeuna we heula! Isuk pageto mah kumaha isuk pageto we. Ka lieur-lieur dipikiran ti ayeuna!" monyet neugtreug.

"Dasar ajag sia mah!" merak jengkel.

"Kesit, nya! Kelenci linghas ge sagabrug-sagabrug ku ajag mah!" monyet beukah irung, dipoyok siga ajag teh.

"Lain kesit..., hawek! Asal seubeuh sorangan!" ceuk merak.

"Na kudu miseubeuhan saha ari hirup?" monyet malik-malikkeun.

"Pek teuing sia sorangan nepi ka bentet oge, tapi sing inget ka batur atuh! Dirabut jeung tangkalna mah meureun batur moal kabagean!" ceuk merak.

"Ngurus teuing kadut batur! Sakadutna-sakadutna we!" monyet merekedeweng.

"Dasar oray!" merak moyok.

"Alus, awet ngora, nya! Bisa megar, kulitna limit wae, teu kenyod-kenyod!"

"Gede kadut, kacemekan, sagala dilegleg! Dibelaan nepi ka ngabungkiang hese usik-usik acan geuning! Lain awet ngora-awet ngora, siah!" ceuk merak.

"Alus sagala dilegleg ge! Cokleg, cokleg, tibatan ku batur manten!"

"Heueuh da sia mah mani ulah ku batur! Naon hakaneun aing jeung anak-incu jaga, ari cengek dirabutan jeung tangkal-tangkalna mah ku bangsa sia!" ceuk merak.

"Tuh geuning kanyahoan! Lantaran sia ge butuh, sawan-geureuh wae ka batur teh, ancun!"

"Teu kudu ngancunan! Da aing ge moal mungkir, memang butuh aing ge saanak incu! Ngan bangsa aing mah ukur papacok saperluna, tara diruksak jeung pawit-pawitna!"

"Geuslah jempe, Kuncung! Yeuh hayang mah ku aing dibere tilu siki, yeuh!"

"Teu hayang peperet! Becus keneh, barangsiar sorangan ge!" ceuk merak.

"Kilangkitu! Henjig atuh barangsiar, becus mah! Lain kalah ngagonggorokan batur!" ceuk monyet bari hayoh we dederegeng hayang nyabut tangkal cengek. Teu kadugaeun, da puguh hengker manehna mah.

"Eudeuk deuleu, teu kudu dititah ku sia!"

"Nam-nam atuh, lain kalah ngecebrek, gandeng!"

"Arek! Ngan eta atuh tangkal cengek tong dirabut! Tuh geuning, saremplak weh dahanna! Ambuing, lapur atuh, moal aya jangeun isuk!" merak wahwar-wehwer.

Tapi monyet mah hayoh we ugal-ugil, teu pisan miduli kanu garosingsat.

"Hayang dibintih sia teh ku aing, Cekroh? Dibocosan siah tah panon teh!"

"Heuy deuh, ngancam ti dituna mah, nyah?" monyet kalah ngeyehkeun.

"Nyaan sia teh hayang dibintih!" ceuk merak bari kokoer.

"Wani kitu ka aing?"

"Pira kunyuk!"

"Sok wani mah! Sakali ngagorowok ge aing, ngurunyung geura Bah Mandahong, ludeung sia nyanghareupan Bah Mandahong?"

"Bah Mandahong...?" merak culang-cileung. Hatena hemar-hemir. Wani soteh ka Si Cekroh, ari kudu ngayonan rajana mah, karareueung teuing.

"Sieun nyah, ku raja aing mah!" monyet ngeyeh.

"Naha bakal bela kitu, Bah Mandahong ka kunyuk regung pantar sia?"

"Aing teh kameumeutna, deuleu! Saha marukan nu sok nyiaran jeung nganteuran tuangeunana, pan nu kieu patut!" monyet nepak dada.

"Dasar anjing!" merak moyok.

"Naha make anjing?" ceuk monyet bari hare-hare dipoyok anjing teh.

"Tukang leletak! Tukang kupat-kepot! Tukang lundat-lendot!" Si Kuncung ngesek-ngesekkeun.

"Kuma sia we ah!" tembal monyet daek hanteu-hanteu.

"Da sia mah tara asup omong!" ceuk Si Kuncung ambek kapegung.

"Moal matak seubeuh, omong mah. Mending ge ieu yeuh, tangkal cengek...heup! Heueueup...! Duh, na pageuh-pageuh teuing ieu teh! Meulit kana batu kitu akarna, Kuncung?"

"Nyao!" merak ngabalieur miceun beungeut.

"Bantuan sok!" ceuk monyet.

"Najis!"

"Sok-sok!"

"Sangeuk!"

"Sok-sok lah, da geulis!"

"Japilus!" merak dus-dis.

"Hengen bantuan, ke diburuhan cengek sarawu!"

"Dasar peucang!" merak moyok.

"Pinter? Rea akal?" monyet atoh.

"Pangoloan! Panipuan!"

"Kudu kitu hirup mah, teu kitu mah moal meunang gegeleun!"

"Lain gegeleun, caplukeun!"

"Heu-euh lah! Sok-sok bantuan, engke dikawin!" monyet kalah ngoconan.

"Rujit! Amit-amit! Teu sudi abrig-abrigan, ngimpi ge diangir mandi aing mah!"

"Tong api-api lah, Yayang! Na teu hayang dipangnyieunkeun sayang ku Aa!"

"Aa...?" Kecrot merak nyiduh, ti tukang ti hareup.

"Beu, ambeu mani kitu Si Geulis! Na teu palay dipangdamelkeun sayang?"

"Buaya!" merak moyok.

"Mana kudu bogoh! Buhaya gagah kitu! Si Geulis engke jadi prameswarina!" monyet nyengir bari nguget-nguget tangkal cengek nu pasiksak, daunna murudul kaparol.

"Buru-buru lah bantuan, Kuncung!" ceuk monyet deui.

"Teu sudi! Pek we becus mah ku sorangan!" walon merak.

"Nyaeta, teu teu kaduga ku sorangan mah."

"Keuyeup apu, tayoh karegungna!" merak moyok.

"Lain keuyeup apu, beak tanaga atuda ti isuk-isuk ugil-ugilan!"

"Mun ngagugu mah ka aing, titadi ge geus kapupu deui cengekna. Lain kawas ayeuna, tangkalna ruksak, daunna murudul, kembangna marurag, cengekna teu kaala!" merak pertengtang nengterewelang.

"Heueuh nya...," monyet ngajimprek bakat ku cape. Tapi teu keudeu bari ngahuap-huapkeun cengek nu pabalatak dina taneuh.

"Hawek atuda sia mah! Jelema we badis!" ceuk merak. Kakeuheulna geus teu kaampeuh, nenjo tangkal cengek jadi ruksak kitu.

"Naon?" monyet ngagurubug siga nu kasundut buntut. Ceulina asa disebit.

"Jelema sia mah!" merak mindo.

"Sakali deui siah ngomong kitu!" monyet napsu pisan disebut siga jelema teh.

"Jelema! Jelema! Jelema!" merak ngahajakeun. Rumasa, tadi teh rada kalepasan nyebut jelema ka monyet, bakat ku teu kuat nahan kakeuheul. Tapi apa boleh buat da ciduh mah teu bisa diletak deui. Tarung, tarung, rek diayonan we, kagok borontok-kapalang belang, ceuk pikirna.

"Na kabina-bina teuing sia ngahina teh! Nepi ka ngajelema-jelema ka aing!" monyet cengkat bari cekrah-cekroh.

"Da heueuh sia mah boga kalakuan teh siga jelema!" ceuk merak bari tatan-tatan, bisi monyet narajang.

"Naha kumaha kitu aing teh?"

"Pikiran we ku sia!"

"Lain nitah mikir ka batur! Sia kudu tanggung jawab kana omongan sorangan!"

"Tuh da sia mah persis jelema, teu gableg pikiran! Ingkar tina kasatoan!"

"Terangkeun siah, goblog! Lebah naon aing saruana jeung jelema!"

"Hawek! Hayang seubeuh sorangan! Teu puas ngala buahna, dirabut jeung tangkalna, teu ngitung pikahareupeun! Lain jelema ari nu kitu laku?" ceuk merak.

"Kaleuleuwihi siah, pira tangkal sasiki nepi ka kolu mapandekeun aing ka jelema! Mun kitu aing teh ngabukbak leuweung!"

"Mun diantep mah sia ge bakal kitu!" ceuk merak.

"Kitu kumaha?"

"Bakal beuki siga jelema! Leuweung dibukbak, situ diurug, gunung dikali nepi ka ngalombang!" ceuk merak.

"Sagelo-gelona aing, moal nepi ka kitu, deuleu!"

"Wah, tanawuruh! Da jelema ge bareto-bareto mah tara kitu! Ngan sanggeus dimimitian bari taya nu ngahukum, beuki lila beuki nirca! Bangsa sia ge kana kitu teu digeureuh-geureuh ti ayeuna mah!" ceuk merak. Hatena beuki gilig rek ngabelaan sarakan tempat incu buyutna jaga kumelendang.

Lantaran kapeped omongan, sebrut weh monyet narajang. Maksudna rek ngerewes beuheung merak.

Orokaya merak ge teu cicingeun, gancang ngagiwar dina jurus merak ngibing. Plos...monyet nubruk angin! Solontod awakna milepas, geplak bujurna dikepret ku jangjang merak dina jurus ngirab jangjang. Atuh puguh we awak monyet teh siga nu ditotogkeun, sirahna melesat rek notog batu gede nu aya di dinya.

Untung monyet teu kasima, leungeunna ngarawel areuy nu ngambay lebah dinya, kek...guriwel muntang kana areuy. Kalayang awakna ngalayang dina jurus ayun ambing. Salamet, batu ngagilisir sajeungkal handapeun sukuna.

Monyet terus ayun-ayunan dina areuy, bulak-balik nyamberan merak, leungeunna roronjang. Tapi merak linghas pisan cungcat-cingcetna.

"Turun siah jelema, ari enya wani mah!" merak cocorowokan. "Sor kadieu, montong gugurayangan kitu, sirkeus-sirkeus lain sia teh!"

Cle monyet nincak deui taneuh. Peyekeh leumpang ngadeukeutan merak.

Gapruk merak ngabintih, monyet nyerewet, tarangna bared kagaris ku kuku merak. Untung tadi monyet rada ngelok, mun henteu, aya bahan bocos panonna katiruk. Merak oge teu kalis, bulu dadana ngabrul kajenggut ku leungeun monyet.

Der deui galungan, silih teumbrag, silih cakar, musuh lawan pada kesit.

Hate duanana geus gilig pikeun ajur tutumpuran.

Merak ngabelaan hirup-hurip anak incu jaga, monyet ngabelaan harga diri. Manehna bisa keneh sabar disebut bagong, disebut buhaya, disebut oray, disebut ajag, tapi ari disebut jelema mah teu suka tujuh-turunan. Hatena kasigeung dipapandekeun jeung mahluk nu pangaruksakna di alam dunya. Manehna katut bangsana geus ngalaman nyeri-peurih, pait-peuheur, jeung lara-balangsakna hirup, akibat panggawe manusa.

Kangaranan nu tarung, rek kadeseh rek ngadeseh, bocok mah moal henteu itu-ieu ge. Nyakitu merak jeung monyet ge, pada raget, pada bared, pada bocok. Mun terus mah teu mustahil kajadian awor, duanana pada-pada tatu parna, malahan misan pisan.

Untung kaburu jol maung.

"Hey! Geus, geus! Misah, misah! Pek, saha nu teu ngagugu, ku aing dikerekebna!" pokna bari nyeureudeug ka tengah pakalangan. Gerem, gerem, ngabarkeun sima maungna.

Puguh we duanana ge sieun ku raja sarerea mah. Gancang malundur.

"Naon pasalna ieu teh, nepi ka galungan kieu? Caritakeun ku saurang! Ku sia Kuncung! Awas, kudu sajalantrahna! Mun direkayasa, dipake cuci-mulut sia ku aing!"

Barabat ku merak dicaritakeun ti awal nepi ka ahir. Ditektek taya nu kaliwat.

Maung unggut-unggutan, terus nanya ka monyet, "Bener sakur caritaan Si Kuncung teh, Cekroh?"

"Leres!" ceuk monyet.

"Rumasa sia ngarabut tangkal cengek?"

"Da teu acan bret...!"

"Acan soteh teu becus! Cacak becus mah geus bret, nya!" maung nyengor.

"Rumaos..." monyet nyengir.

"Montong cengar-cengir, da teu kasep sia teh! Ari sia Kuncung, naha atuh mana sadaek-daek teuing nyarekan teh, nepi ka tega ngajelema-jelema ka papada sato?"

"Sadaya-daya, kalepasan, bawaning ku keuheul, nun!" walon merak mamandapan.

"Geus, sakali ieu sarerea moal dihukum ku aing. Tapi kudu jangji moal sakali-kali deui karitu laku!" ceuk maung bari mencrong seukeut kanu tas diadu. "Sia Cekroh, montong sok rubat-rabut kana tatangkalan, pan eta teh tempat hirup umat hewan! Sia Kuncung, cing diajar ulah goreng sungut teuing. Sakumaha keuheulna ge ka batur teh ulah nepi ka ngajelema-jelema. Sabab saha pisatoeunana nu teu nyeri hate disaruakeun jeung jelema, tukang ngaruksak alam dunya, ngarti sia?"

"Ngartos!" ceuk duanana mani rampak.

"Putus! Jig rek ka marana ayeuna?" ceuk maung.

"Abdi mah asa tos hoyong ngendog ieu teh, pami teu lepat mah ieu teh nu kadalapan," ceuk merak bari purat-perot muru sayangna. Saporocoteun, dibawa tarung atuda, uyuhan teu kaborojolan.

Di dinya kari duaan.

"Ari sia, Cekroh, rek ka mana ayeuna?" maung nanya ka monyet.

"Ah abdi mah bade neraskeun metikan cengek we, lebar" ceuk monyet bari terus dodongkoan mulungan cengek nu balatak dina taneuh. Nu narapel keneh dina tangkalna dipetikan. Sawareh dikeupeul, sawareh dikemil teu lada-ladaeun.

Ari maung terus depa di dinya. Beuteungna seubeuh ku anak uncal kumincir, beubeunangan cikeneh di tegal. (*)

---

Diropea tina majalah Cupumanik, April 2008