Sasakala Banteng Aya Tandukan

Ceuk dongeng, baheula mah banteng teh teu boga tanduk. Nu tandukan mah kuda. Nya pangna banteng tandukan oge, eta teh pamere kuda. Kieu ceunah sasakalana mah.

Di leuweung nu aya di nagri Sepanyol, hirup sakumpulan kuda. Maranehanana mindeng diudag-udag ku kasieun jeung ku kahariwang. Rek teu kitu kumaha atuh, mun unggal poe maranehna dibeberik ku nu moro. Di baroro teh lain rek diala dagingna. Tapi pikeun diadukeun jeung manusa sakitan.

Dina hiji poe, sakabeh kuda ngayakeun riungan. Maranehna baradami pikeun neangan jalan sangkan bisa hirup tingtrim, teu dibeberik wae ku nu moro.

"Jalan nu panghadena, taya deui iwal ti urang kudu masrahkeun tanduk nu kacida dipikahayangna ku sato sejen. Lantaran panalungtikan, pangna urang diboro ku manusia teh pedah ngabogaan tanduk nu hade pikeun adukeuneun!" ceuk salah sahiji kuda. Nu sejen ngahaminan.

"Tapi, saha kira-kirana sato anu daek dipasrahan tanduk urang?" ceuk kuda bodas.

"Basa taeun mah banteng nu menta teh!" ceuk kuda belang.

"Tah, heueuh. Urang bikeun we ka banteng atuh!" ceuk sakabeh kuda mani reang.

Dina hiji waktu, maranehna arindit ka tegalan, rek nepungan kumpulan banteng. Sakabeh banteng lain deui barungaheunana dipasrahan tanduk teh. Puguh harayang ti baheula. Maranehna teu sadar, yen baris dijadikeun paneumbleuhan.

Diantara kuda, aya oge nu teu daek mikeun tandukna. Ngarasa lebareun meureun.

Teu salah tina panyangka, waktu nu moro daratang deui teh, nu dibaloro lain kuda, tapi banteng. Aya eta ge kuda nu dibeberik, nyaeta kuda nu teu daek mikeun tandukna tea.

Ti saprak harita, kuda nu geus taya tandukna teh bisa hirup kalayan tingtrim di eta leuweung, lantaran nu moro teh pindah jadi moroan banteng. Sedeng kuda nu teu daek mikeun tandukna tea, nasibna kacida matak watirna. Ku baturna teu dipalire, sabab geus ngalanggar hasil babadamian. Atuh ku banteng pon kitu keneh, da puguh lain bangsana.

Tah, kitu sasakalana banteng pangna boga tanduk teh. (*)