Heuay
Hanjakalna, kuring bogoh pisan ka pamajikan teh. Sakitu manehna sababaraha kali nyieun kasalahan oge, dihampura deui, dihampura deui. Ka dieunakeun beuki ngagalaksak. Keun perkara beuki nganjuk ka warung mah. Eta ku remenna nu nagih ka imah, bari jeung nu ditagihna tara nyampak. Nyumput. Rupa-rupa. Aya ti koperasi keliling. Ibu-ibu arisan. Aya oge ti kelompok usaha nu sok nganjuk-nganjukkeun sembako. Tara kabeneran amprok atawa kapoconghok deuih. Kawas nu apal jadwal.
Tungtungna jorojoy niat ngawarah, bisi jadi panyakit. Bahan nyarekanana disiapkeun. Mun manehna ngurunyung balik nyumput, rek dicarekan bebeakan. Teu gampang. Nu matak diajar heula. Lajag-lejeg di patengahan bari gogorowokan, "Naha iraha atuh robahna kalakuan maneh teh? Mun kieu carana mah akang geus teu kuat. Urang pisah bae. Percumah..."
"Keur acara drama di mana, Kang?" aya nu nanya di lawang panto kamar. Gebeg. Manehna gigisik bari heuay.
"Mani ngaganggu ka nu keur sare beurang...!" bari asup deui ka kamar. (*)
Rudi Riadi
Reviewed by Rupa Sundapura
on
18.10
Rating:
