Si Onod Muhit Suling Sakti

Nohonan hiji sarat bangun nu pamohalan, Si Onod leuleuweungan neangan tamiang nu geus diliangan ku bangbara. Weleh teu manggihan. Meuting hadapeun dapuran awi.

"Emh, karunya teuing jalu..." ceuk hiji sora.

Si Onod ngagurinjal, bari gigisik. Hemeng. Bet aya di saung eurih.

"Meungeus, tong geruh, tah suling teh geus anggeus, jung geura mulang!" tembal Si Aki bari ngasongkeun suling. "Omat ulah ditiup sagawayah. Sing tahan godaanana," pokna deui. Les ngiles.

-=oOo=-

"Tah, kabeneran euy! Ari silaing Nod, kamana wae? Wayahna isuk mah urang manggung. Juragan Darma ngawinkeun Neng Eulis," ceuk Sudin.

Onod ngajenghok. Breh Eulis kapibeungeut. Inget waktu nyangsaya dina dadana. Eulis digusur ku kolotna. Karasa keneh waktu popongkol nyayang dina pundukna. Tembong dina juru panonna aya nu nyangkrung.

Gamelan degung ngagembrung luhur panggung. Jerit suling nyirep sakur nu haladir. Mencrong ka nu keur nyuling. Sangeus tamat hiji lagu. Kapireng aya nu nginghak di pelaminan. Geunjleung. (*)

---

Yuharno Uyuh