Katinggang Dulang Emas

Cidulangdaling teh ngaran tempat pamandian nu aya di Cigalontang. Sabenerna mah eta pamandian teh ngaranna lain Cidulangdaling, tapi Cigaru anu robah ngaranna jadi Cidulangdaling. Asal muasalna ngaran Cidulangdaling teh nyaeta tina carita kolot jaman baheula anu eusi caritana nyaeta hiji dulang emas nu ragrag kana taneuh, nepi ka eta taneuh teh legok.

Caritana teh kieu geura:

Aya hiji putri anu keur leuleumpangan ngurilingan kampung. Bari ningalian kaayaan kampung teh manehna bari ngangakeup dulang emas. Di tengah jalan eta putri teh papanggih jeung hiji jajaka anu miharep eta putri teh jadi bojona. Eta putri dipaksa sangkan milu ka eta jajaka. Putri teh nolak kana pangajak eta jajaka. Tapi jajaka keukeuh ngajak ka putri sangkan daek dipihukum jadi pamajikanana. Eta putri teh keukeuh embungeun sarta manehna lumpat kalunta-lunta bari ngangakeup dulang emas tea.

Si Jajaka tea terus nuturkeun eta putri. Bakat ku sieun, eta putri teh lumpatna sakaparan-paran sarta teu karasa manehna anjog ka tempat anu gawir, manehna terus lumpat da sieun ku si jajaka tea. Barang tepi ka sisi gawir, manehna salamet teu tigurawes ka gawir, ngan dulang emasna leupas tina akeupanana sarta ragrag ka gawir ninggang kana taneuh anu aya cinyusuan. Bakat ku tarik ragragna eta dulang emas teh tilem ka jero taneuh anu aya caian tea. Taneuh tapak dulang ragrag legok ngabentuk dulang.

Ti saprak kajadian eta, si putri jeung si jajaka tea teu katenjo ngulampreng deui ka eta lembur. Duka ka mana sarta masyarakat teu apaleun saha sabenerna eta putri jeung jajaka teh. Dulang anu ragrag tea teu kapanggih raratanana deuih.

Ku ayana eta kajadian masyarakat eta tempat ngalandi yen tempat pamandian anu katinggang dulang teh ngaranna jadi pamandian Dulangdaling tug tepi ka kiwari. (*)

---

Fitri Robiatul Solehah (Galura)