Peucang jeung Buhaya

Jaman baheula di hiji leuweung, wanci tengah poe ereng-erengan, sakur sasatoan keur ngariuhan. Kacaritakeun peucang, manehna pohara ngarasa halabhabna. Koloyong peucang ka walungan nu parnahna teu anggang ti dinya. ,"Ah, rek ngalekik nginum saseubeuhna,," kitu ceuk pikirna. Karek ge dua-tilu leguk, gep teh sukuna aya nu ngegel. Peucang reuwas lain meumeueusan, tapi teu bisa ngejat lantaran sukuna pageuh kacakep. Boro-boro ngejat, ngajerete ge hese. Peucang jaba reuwas jaba nyeri, jaba kaduhung deui dirina teu ati-ati. Bakat ku halabhab tuda, sologoto ka cai padahal aya buhaya nu keur nangoh ngadodoho.

Tapi dasar peucang mah pinter. Sakolepat ge geus manggih akal sangkan dirina salamet. Sanajan sukuna karasa nyeri digegel ku buhaya nu huntuna sakitu ranggetengna, tapi peucang api-api teu ngarasae. Luk deui tungkul neruskeun nginum. "Aeh aeh..., geuning aya maneh, buhaya! Keur moyan nyah? Hampura nya kuring teu sopan, ngaliwat teu pupuntenan. Boa-boa bieu teh katincak irung? Hampura nya, teu kuat ku halabhab kuring teh," ceuk peucang.

Ngadenge omongan peucang, buhaya ngarasa heran. Naha peucang teh mani tenang, kawas nu teu ngarasaeun sukuna digegel.

"Tong ngadahar dahan kai atuh, buhaya! Moal ge ngeunah!" ceuk peucang.

"Mana dahan kai? Pan ieu mah suku maneh, Cang!" ceuk buhaya. Ngomongna rada ngosom da bari barang gegel.

"Emh...watir! Mun kuring boga hakaneun mah, meureun dibikeun ka maneh. Tapi naon atuh da kuring mah teu boga nanaon. Boga awak ge apan ieu sakieu leutikna. Jeung barina ge boga uruseun anak pamajikan. Mangkaning pamajikan kuring kamari anyar ngajuru deui, teuing opat teuing lima saborojolan teh," ceuk peucang.

"Cik atuh sing karunya ka kuring, Cang! Piraku kuring kudu paeh kalaparan. Cik atuhg menta suku maneh hiji mah, lumayan we tamba paeh langlayeuseun," buhaya ngomong mani lengas-lengis sangkan dipikarunya.

"Heug atuh ari maksa-maksa teuing mah, watir we kuring mah...ngan pek atuh lepehkeun heula etah dahan kai nu keur diheungheum teh, terus sungut maneh gegelkeun sing tarik, ngarah buntung sakaligus, da nyeri ari disegetan saeutik-saeutik mah," ceuk peucang. "Sok ayeuna mah geura calawak sing rubak...!" Peucang marentah bari panonna gular-gilir neangan dahan atawa awi nu sakira meujeuhna pikeun metakeun akalna.

Ari buhaya barang karasa kana sungutna aya nu asup, capluk weh nyapluk sataker tanaga da samarukna nu asup teh suku peucang sakumaha ceuk perjangjian tea. Atuh puguh we...ari capluk, ari ceb si haur teh nyeundak kana lalangit sungutna luhur handap, terus nyeceb hese dipukahkeunnana da kapaseuk ku regang nu rungseb dina saban bukuna. Sungut buhaya jadi samutut, rungkang ku regang haur. Kalah ku haben digubag-gabig, lila-lila mah haur teh nungtut marecat tina sungut buhaya. Tungtungna golomong weh lesot sapisan. Ari sot ari seot peucang lumpat teu sirikna tibuburanjat. Buhaya ngudag ka sisi cai, tapi peucang geus mangpret manten ka tonggoh, lain udag-udageun ku tukang nu biasa di cai.

Buhaya ngawakwak nyarekan jeung ngati-ngati. Ari peucang terus lumpat bari teu eureun-eureun seuseurian. (*)