Cimata Nyakclak di Lapang Bubat

Bogoh pisan ka Dyah Pitaloka teh. Ku kituna, euweuh deui jalan lian ti mateni Prabu Hayam Wuruk. Naon hakna make hayang ka putri kakasih urang Sunda bari teu boga pisan tata karma laki-rabi? Sakitu raja nagara nu cenah pangdigjayana.

Tuh tingali, cipanonna merebey. Duh, kalahka beuki nambahan endah.

Jadi inget basa Ki Patih Madu datang ka Nagri Sunda, minangka utusan Majapahit ngadeuheus Prabu Linggabuana. Kungsi Ki Patih madu olohok basa kakara ningali Dyah Pitaloka. Komo basa samping Dyah Pitaloka nyingkab saeutik katebak angin ti panto hareup. Katenjo bitis Dyah Pitaloka cahayaan, moncorong koneng matak serab. Ki Patih Madu bingung, ti mana asalna cahaya teh? Da cahaya panon poe mah teu nepi ka paseban. Enya kitu tina bitis Dyah Pitaloka sorangan?

Enya, ti mana deui, gerentes Ki Patih Madu.

Ngadadak manehna inget kana hiji kajadian dina sajarah, nu geus jadi legenda, tur kawentar ka mana-mana. Harita, panon Ken Arok serab ningali cahaya koneng emas nu ngagurilap tina bitis Ken Dedes, pamajikan Akuwu Tumapel, Tunggul Ametung. Bitis Ken Dedes katingali basa sampingna tikait kana kareta. Bitis nu cahayaan teh jadi ciciren yen Ken Dedes teh hiji nareswari, istri utama, calon prameswari raja agung.

Teu salah deui, gerentes Ki Patih Madu, Dyah Pitaloka ge enya adimukyaning istri, wanoja utama, pijadieun prameswari maharaja Majapahit Wilwatikta.

Dyah Pitaloka estuning sarua endahna jeung bulan purnama tanggal tujuh Suklapaksa.

Salila ieu mah Ki Patih Madu ngan nyaho aya dua wanoja panggeulisna di tatar Nusantara, nya eta Ken Dedes, nu tuluy katelah Pradnyaparamitha, jeung Sri Pramodawardhani, putri Raja Samarattungga di Mataram.

Ayeuna, Ki Patih Madu moal bisa mungkir, aya deui hiji wanoja anu geulisna saimbang jeung Pramodawardhani atawa Pradnyamaramitha.

Wanoja ti tatar Sunda, Dyah Pitaloka Ratna Citraresmi.

Tapi, duh, piraku wanoja utama bet datang ka Majapahit ukur jadi upeti?

Teu rido.

Hayam Wuruk kudu perlaya. Atawa Gajah Mada heula kitu? Apan Ki Mahapatih ieu pisan anu saenyana boga pokal mah.

Tuh geura tingali, masih keneh dibaju panganten, Dyah Pitaloka ukur diuk ngeluk di pasanggrahan Bubat. Dikabaya sutra bodas ti Nagri Hindu, sampingna soklat ngora ti Nagara Gede Sarumban. Jamang emasna masih keneh dipasang dina rambutna. Mutiara susun tilu can dileupas tina beuheungna. Roncean kembang malati ngagantung keneh tina gelungna.

Deudeuh, geulis, kakasih para pohaci, sakitu tebihna angkat ti Kawali, turun gunung unggah gunung, meuntas Laut Jawa anu sakitu legana, sumping ukur jadi upeti, teu cios ngarendeng sareng raja agung Nusantara.

Cipanon herang ngamalir hiji-hiji, meuntas pipina. Clak, clak, kana kabaya bodas.

Para pangasuh tingsalegruk teu bisa nahan kasedih. Teu ngarti kajadian naon anu saenyana tumiba ka dununganana. Naha langit mencrang nu pinuh ku rasa gumbira bet ujug-ujug ceudeum ku cimata?

"Leres Eulis teh teu janten nikah?" Ambu Pangasuh nanya. Asa aya nu ngaganjel dina tikorona.

Dyah Pitaloka unggeuk. Teuteupna lempeng, bangun nu hayang mubus dingding kayu pasanggrahan.

"Naha?"

"Enya, naha? Ieu mah sakadar papasten ti Hyang Tunggal," jawab Dyah Pitaloka lalaunan. Sarua karasa aya nu ngaganjel dina tikorona.

Hate Dyah Pitaloka asa disiksikan ku tungtung keris.

Enya kitu manehna sedih ku lantaran teu jadi kawin? Boa enya.

Tapi aya deui nu matak leuwih pikasediheun.

Dyah Pitaloka ngarasa sedih dumeh teu bisa jadi simpay anu ngaraketkeun sagala harepan ngajadi hiji. Lir tali anu ngabeungkeut nyere jadi sapu. Manehna teu bisa ngawujudkeun harepan nu jadi indung, Nay Ratna Lara Lisning, nu hayang sang putri ngasaan kabagjaan minangka wanoja sajati, wanoja anu satia ka salaki jiga Dewi Satyawati. Dyah Pitaloka ge ngarasa teu bisa ngawujudkeun kahayang nu jadi bapa, Prabu Maharaja Linggabuana, sangkan jadi tihang utama nu bisa mawa Nagri Sunda mingkin mencrang cahayana. Enya, manehna ngarasa teu bisa jadi tali anu ngabeungkeut dua nagri anu salila ieu pajauh, padahal saenyana mah padudulur keneh, nya Nagri Sunda jeung Wilwatikta.

Atuh manehna ge sedih ku lantaran teu bisa ngawujudkeun harepan diri sangkan jadi wanoja mandiri, bisa nangtukeun takdir sorangan, teu jiga Dayang Sumbi nu embung turun sakadar nyokot taropong, atawa Purbasari nu pasrah dikitu-kieu ku Purbararang.

Enya kitu sagala impianana bakal jadi kanyataan?

Panon poe beulah, jaladri beureum ku getih. Impian nu sababaraha kali datang basa manehna rek indit ti Kawali.

Enya kitu eta teh jadi pertanda bakal aya mamala nu bakal tumiba ka nagri Sunda? Enya kitu bakal aya lautan getih? Emh, bagja jeung cilaka mah ukur dipisahkeun ku waktu anu ngan sakiceupan.

Ngadadak Dyah Pitaloka inget kana kecap-kecap karuhun dina naskah Patikrama Galunggung nu kungsi dibaca.

Hana nguni hana mangke
Tan hana nguni tan hana mangke
Aya ma beuheula aya tu ayeuna
Hanteu ma beuheula hanteu tu ayeuna
Hana tunggak hana watang
Tan hana tunggak tan hana watang
Hana ma tunggulna aya tu cakangna

Enya kitu salila ieu manehna geus teu ngagugu cecekelan hirup karuhun nu ditepikeun ku Prabu Darmasiksa nyalira? Enya kita manehna geus poho kana poe kamari basa ngalengkah asup ka poe isukan? Naha enya manehna teu kungsi ngeunteung kana waktu nu geus kaliwat ngarah boga teuteup nu seukeut tur hate nu teger pikeun nyanghareupan waktu nu rek datang?

Ramo Dyah Pitaloka ngusapan samping nu masih keneh seungit malati. Ngadadak dina gambar turih wajit teh kacipta beungeut indungna, Lara Lisning, nu ditinggal di Nagri Sunda demi ngasuh si adi, Anggalarang alias Prabu Anom Wastukancana.

Beungeut ampir tengah tuwuh nu masih keneh geulis teh angger imut, bangun anu keur mere harepan pikeun jalan ka hareup. Duh, Ibu, saleresna mah abdi ge hoyong tiasa sapertos Ibu nu teu kantos seepeun harepan. Hoyong saleresna mah abdi tiasa imut sapertos imut Ibu. Imut anu salamina nimbulkeun harepan.

Lalaunan leungeun Dyah Pitaloka ngaragamang kana pucuk gelung. Gap kana gagang patrem anu masih keneh nyeceb dina gelung. Lalaunan, patrem dilesotkeun.

Ayeuna patrem geus aya dina dampal leungeun. Kacida endahna patrem teh.

Panjangna teu leuwih ti sajeungkal ramo lencop Dyah Pitaloka. Lempeng, lancip, herang. Pulasna koneng semu perak. Tangtu dijieunna tina campuran bahan pilihan. Campuran antara wesi kuning, waja, jeung nikelna tangtu geus beunang ngitung. Nu matak hasilna ge tingali. Pamorna endah kabina-bina. Aya titik-titik di sababaraha tempat nu katingali leuwih herang.

Gagangna dijieun tina gading gajah. Pulasna meh sarua jeung kulit Dyah Pitaloka. Aya ukiran-ukiran garis lengkung jeung buleudan. Dina unggal buleudan ditempelan batu permata hejo semu bulao.

Ningali patrem dina dampal leungeunna, ras Dyah Pitaloka inget ka nu jadi paman, Mangkubumi Bunisora Suradipati. Tangtu moal tanpa alesan Paman Bunisora mekelan patrem minangka hadiah basa memeh papisah. Paman Bunisora mah apan geus kaceluk minangka jelema anu boga kakuatan batin anu linuwih, lain jelema samanea, bisa ngarasakeun hal anu bakal tumiba di Wilwatikta. Paman Bunisora mah teu mere perhiasan nanaon, komo anu saukur endah wungkul. Nu dibikeun teh kaendahan anu ngandung kayakinan. Kayakinan pikeun ngabela kahormatan.

Ras Dyah Pitaloka inget kana piwuruk Paman Bunisora, sapoe samemeh manehna miang ka Wilwatikta. "Wanoja Sunda teh kudu kawas patrem. Lain ngan sakadar endah, atawa ukur jadi papaes lalaki. Wanoja Sunda kudu seukeut pikir tur bisa ngajaga kahormatan diri."

Ceg dampal Dyah Pitaloka nyekel pageuh patrem. Tapi teu lila dileupaskeun deui. Ceg deui, leupas deui. Kitu we sababaraha kali mah.

Asa-asa. Cangcaya. Kawas panggal leupas tina tali. Muter nguriling. Teu nyaho di mana bakal eureunna. Bisa jadi di jero kurilingan keneh. Bisa oge di luareunana. Naha enya mun patrem geus lugas, geus kacanggeum ku leungeun, manehna geus kaluar tina wates anu ngurilingan?

Ayeuna gelung geus leupas. Buuk ditalian saayana. Sesana mah diantepkeun we ngarumbay nepi kana tonggong.

Tuh pan, endah pisan, kawas curug walungan Cikawali.

"Eulis bade gentos raksukan?" Ambu Pangasuh nanya deui.

"Moal," jawab Dyah Pitaloka, laun, tapi karasa aya kakuatan anu teger lir batu cadas.

Ambu Pangasuh neuteup dununganana sajongjongan. Para pangasuh tiluan masih keneh dibaju kabaya. Kabaya pangalusna. Duh Gusti, para pangasuh teh maturan Dyah Pitaloka kalawan hate pinuh ku rasa gumbira. Lain gumbira pedah datang ka nagri pang digjayana sa-Nusantara. Tapi gumbira kulantaran bisa ngiringkeun sang putri minangka simbul Nagri Sunda.

Duh, saenyana mah hayang Dyah Pitaloka ge ganti baju. Ngalaan baju panganten anu sakitu endahna, ku baju biasa anu ringkes tur basajan.

Ngan anehna, dina kaayaan kitu, ras manehna inget kana dongeng basa Dewi Drupadi dipaksa ngaleupaskeun sampingna ku si durjana Dursasana, ngarah meunang kaera di hareupeun dulur-dulur Korawa jeung Pandawa. Dyah Pitaloka ge ayeuna sarua dipaksa ku kaayaan, kudu ngaleupaskeun baju pangantenna. Ngan Dyah Pitaloka mah embung meunang kaera jiga Drupadi.

Di luar pasanggrahan, geus eak-eakan para satria Nagri Sunda. Piraku manehna ngan bisa nyakclak cimata.

Dyah Pitaloka hayang tetep bisa ngabuktikeun yen manehna datang ka Majaphit teh lain rek nimbulkeun mamala, tapi geus ti dituna boga niat anu mulya. Ku kituna, najan dina dada mah ngagolak hayang ngajanggelek jadi Srikandi, manehna tetep keukeuh mending jadi Drupadi. Paling copelna, tandang mah kudu kawas Srikandi najan dibaju jiga Drupadi.

Basa Dyah Pitaloka mukakeun panto pasanggarahan, kabeh panon neuteup manehna.

Jep jempe kabeh.

Panon poe ge lir nu kasima ku Dyah Pitaloka, neuteup sang putri nu masih keneh dibaju panganten tapi buuk ngarumbay, sarta leungeun nyekel pageuh patrem pusaka.

Dyah Pitaloka dongko hareupeun Prabu Maharaja.

"Upami kenging widi, abdi hoyong ngiringan, Rama," pokna.

Prabu Linggabuana neuteup Dyah Pitaloka. Hate pinuh ku rasa reueus. Tapi teu lila, teuteupna kahalangan ku cimata. Clak, murag kana jukut. Clak deui, kaseuseup ku taneuh batur, taneuh Majapahit.

Bari angger cipanon ngarakacak, Prabu Linggabuana ngeukeupan Dyah Pitaloka. "Restu ti Rama, Eulis. Sok bajuang, demi kahormatan nagri."

Ger deui para satria Sunda sarurak.

Bedog, kujang, panah, jeung pedang tingaracung ka langit.

-=oOo=-

Duh, Citraresmi, putri jungjunan, kadeudeuh kuring, saenyana gampang pisan mateni Gajah Mada, Hayam Wuruk, atawa sakabeh prajurit Majapahit. Minangka juru pantun, naon hesena mateni salasahiji tokoh, kaasup raja agung. Tapi aya nu nyangkaruk dina hate kuring. Naha kuring kudu ngarobah takdir?

Ku kituna, prung geura tarung para satria. Urang geus boga takdir sewang-sewangan, boh Prabu Linggabuana, Gajah Mada, Hayam Wuruk, Dyah Pitaloka, Nagri Sunda sakumna, kitu deui kuring sorangan, salaku juru pantun. Teundeun di handeuleum hieum, tunda di hanjuang siang.

Cag! (*)

---

Hermawan Aksan