Sisindiran

Kaayaan dina angkutan kota, kadang-kadang sok mancing pipaseaeun. Aya panumpang mayarna kurang, supir teh sok langsung hahaok. Kitu deui lamun supir ngebut sakarep ingsun, panumpang loba nu ngambek. Tina kaayaan kitu ahirna sok ngahudang napsu pigeluteun. Sanajan kaayaan dina angkutan kota kitu, tapi lamun panumpang jeung supir nyaritana make sisindiran mah moal kungsi ngondang pipaseaeun. Upamana bae aya supir ngebut, panumpang teu kudu ngambek, cukup ku sisindiran.

Melak suplir make huut
Dibawa ka Cicalengka
Ari nyupir ulah ngebut
Kumaha lamun cilaka?

Lantaran panumpang nyaritana make sisindiran, atuh supir teh moal kasigeung. Malah langsung ngajawab ku sisindiran deui.

Kacapanon dina jukut
Geus ruksak rek diomean
Ku naon abdi bet ngebut
Apan keur ngudag setoran

Tuh nya pan aman? Nyarita ku sisindiran mah ngalantarankeun kaayaan dina jero angkot jajauheun kana pigeluteun.

-=oOo=-

Sabada diterapkeun otonomi daerah, asa mindeng kajadian demonstrasi nya? Teu sirikna ampir unggal poe aya bae anu demo teh. Biasana kaayaan demo teh sok harengheng. Ngomong pacowong-cowong. Peureup pabuleud-buleud. Antukna sok nimbulkeun napsu nu ngagedur. Rombongan nu demo teh sok terus patelak pisik jeung patugas kaamanan. Hoyong demo aman? Cobian geura cocorowokanana nganggo sisindiran. Upama aya rombongan PKL demo ka Pa Walikota, pingpinan demo dina nepikeun aspirasi teh cukup make sisindiran samodel kieu:

Batu ali ti Cimindi
Ngajul gedang make gantar
Pa Wali tulungan abdi
Ngiring dagang di trotoar

Ngabandungan pingpinan nu demo nyaritana make sisindiran, Pa Walikota oge ngawalerna teh ku sisindiran deui. Saur Pa Wali:

Ti Cililin ka Sumedang
Surat kabar na karanjang
Lain Bapa nyarek dagang
Trotoar mah keur nu leumpang

Aya ku kayungyun nya mun enya teh nu demonstrasi saperti kitu.

-=oOo=-

Di tempat nu loba preman saperti di terminal, pigeluteun teh mani narampeu. Tapi lamun sarerea nyaritana make sisindiran mah, dijamin pigeluteun teh moal aya. Saperti aya jalma nu katincak sukuna ku preman, ari nyaritana ku sisindiran mah ahirna jadi misobat. Apan ceuk eta jalma teh:

Nginum arak matak weureu
Ditotor tinggal sakeclak
Mata sia henteu neuleu
Suku aing bet katincak

Sanajan pok-pokanana garihal, tapi ari nepikeunanan make sisindiran mah asa teu nyentug kana hate. Apan eta preman ge ngajawabna teh kieu:

Saninten buah saninten
Sukajadi pamoroan
Hapunten abdi hapunten
Suku abdi teu panonan

Cenah mah sabada hahampuraan teh eta preman langsung ngajak eta jalma dahar kupat tahu anu aya di jero terminal. Sagala ge jadi aman jeung tengtrem nya ku sisindiran mah. (*)

---

Taufik Faturochman