Enclave

Imah kolot kuring di pilemburan teu kaasup butut, sabab dijieunna tina batu, duduk jandela. Di hareup rajeg tangkal jeruk. Deukeut sumur, pagupon pinuh ku japati. Kur-wok-wok, kur-wok-wok. Kitu dedengean kuring keur budak. Di tukang, kandang hayam, ngupuk. Nu jajangkar di dinya, nu kumupu di dinya keneh, sumawonna nu nyileungleum. Campuh. Malah kandangna ge tara-tara acan ditutupkeun pantona. Sina ngemplong we. Padahal hayam jaman harita mah hargana mahal, sabab kaasup langka oge. Teu saminggu sakali kararaban dada mentokna. Umumna mah, goreng hayam teh kaluarna ari lebaran, kariaan atawa usum tetelo.

Rata-rata imah di lembur kuring mah tara ieuh dipager. Imah tatangga beulah girang, kitu. Imah tatangga beulah hilir, kitu. Padahal duanaan ge kaasup beunghar pikeun ukuran jaman harita mah.

Nu leuwih narik kaayaan imah Aki Arinta. Tara ieuh ditulakan. Plung-plong. Jigana teh, mun aya embe atawa kebo mirajeunan hayang nyemah, teu kudu punten-punten acan. Atuh Aki Arinta ge, paling ngan ukur "His, his, his!" cenah. Moal enya ari kudu molor saampar jeung sato mah. Kitu pokna teh.

Kungsi sorangan nanyakeun ka Aki Arinta harita. Naon sababna imahna tara ditulakan kawas kandang hayam kolot kuring. Ngajawana teh kalah malik nanya, "Naha make kudu ditulakan?" Ih lain ge jawaban ari malik nanya mah.

Imah Ki Punduh, hareupun imah kolot, dipager ku baluntas. Tapi sarua bae. Teu aya pantoan. Nu dipalar teh pucuk baluntasna. Keur lalab. Lain pungsina pikeun perlindungan.

Di lembur kuring (baheula) ge sarua aya hukum adat. "Ulah mipit teu amit, ulah ngala teu menta". Tapi dina kasus pucuk baluntas, eta pasal bisa teu ditolih. Ku kituna, saha bae oknum nu ngaliwat hareupun imah Ki Punduh, sarta nganggap perlu mipit pucuk baluntas (hususna keur ubar bau kelek), nya pit we mipit. Teu kudu amit, teu kudu menta, sanajan Ki Punduh ngabedega di papanggena.

Imah Kuwu Hurmat (masih keneh aki) kacida pasakana. Nya gedong, nya lega. Ku pangjeueung saliwat mah geueuman. Meureun di jerona aya dedemit. Tapi mun urang asup ka jero, teu sing pikasieuneun.

Imah manten kuwu teh memang dipager. Pagerna ge ku tembok. Tapi (tah ieu nu aneh teh) pager tembok teh teu luhur, kira-kira satuur kolot. Sanajan kuring sok rada hese naekanana (da sok hayang kukudaan), tapi ku budak ge prinsipna mah bisa kataekan. Komo deui ku kolot. Dilengkahan we.

Tangtu we, eta imah Kuwu Hurmat teh teu dipasieup ku "kandang monyet" sagala, da kuwu jeneng ge teu dikepung ku pangawal. Kuring kungsi oge nanya (bari sieun) ka eta Kuwu Hurmat (nu pernah aki teh). "Ku naon Aki teu dikawal?" Jawabna teh kalah malik nanya deui wae, "Naha make kudu dijaga, kawas ka bangsat wae ka Aki teh?" Ti harita tara tatanya deui. Ginggiapeun. Pamingpin mah sok nyentak.

Salulusna samen Sakola Desa, kuring kudu nuluykeun ka Sekolah Rakyat Laki-laki di kota pangdeukeutna. Sakola kuring alus, ceuk ukuran mana wae. Dipager awi, malahan dipantoan. Tapi teu dikonci. Malah mah koncina ge leungit boa, da jongos sakola nu sakitu tulatenna teh teu kungsi katenjo mamawa konci.

Naon sababna dipager jeung dipantoan? Jawabna teh, "Nya ari Ujang hayang sabangku jeung kebo mah, pek wae," tembal Ki Jongos Mitra bari ngaleos. Eta jawaban teh pikeun nerangkeun yen di kota kacamatan teh sok aya munding ngamuk alatan sieun dipeuncit jagal. Tapi kumaha wae oge, eta jawaban leuwih "rasional" manan jawaban Aki Arinta jeung Kuwu Hurmat.

Carita di luhur (nu mirip dongeng) nyaritakeun jaman keur budak. Ayeuna mah kuring geus kolot. Jaman geus robah. Lain wae tembong tina pakean, tapi oge tina arsitektur wangunan.

Geus puguh ari mobil mah. Mobil mewah ayeuna mah, kacana ge henteu transparan. Kudu we dipulas ku rupa-rupa warna. Teu saeutik nu meredong pisan. Ari ti jero bisa nempo, ari ti luar mah bororaah. Nyao wawuh, nyao musuh, sarua we teu kadeleh. "Kaca licik" ngaranna ge.

Kitu oge imah-imah nu rajeg di kota-kota atawa sisi-sisi kota. Lain wae kacana poek mongkleng, apan kudu wae dibenteng. Malah mah aya nu lima meter pisan luhurna ge. Hamo bisa noong-noong acan.

Wangunan-wangunan nu dikerem kawas pangberokan teh ngalambangkeun kacurigaan, kakuatan, kakawasaan, jeung harta nu leuwih luhur ti batur. Lantaran wangunan arsitektur mana wae ge ngarupakeun hasil konsep, ide jeung ajen (values) nu dipuhit ku jelema nu ngadegkeunana, moal boa jiwa jeung kabudayaanana nu diagemna ge teu jauh ti kitu. Nya eta kabudayaan eksklusip jeung elitis, nu misahkeun maneh tina kamiskinan masarakat sabudeureunana.

Hiji wilayah, ekonomi atawa kabudayaan sabudeureunana sok disebut enclave dina basa Laten atawa Perancis mah. Wilayah, ekonomi atawa kabudayaan enclave, ceuk sakedetan mah, kawas balik deui ka jaman "manusa guha", tapi motif jeung tujuanana beda.

Jigana mun Kuwu Hurmat aya keneh dikieuna, ku ningali wangunan enclave saperti kitu tinangtu anjeunna bakal nyarios, "Naha kudu digubed-gubed ku benteng, kawas nu gering wae?" (*)

---

Komarudin Sastradipoera