Ma Enah

"Geus datang Ma Enah teh, Ciwi?"

"Teu acan, Ibu."

"Ka mana atuh nya nini-nini teh. Moal teu nyahoeun mah, kitu?"

"Piraku Ibu, da abdi nu ngawartosanana oge sareng Ceu Iti. Nya Euceu? Pait pisan raraosan mah. Ti kamari da Ibu teu ayana teh. Ari saur Mang Odi mah ka ditu, ka Pasir cenah Ibu, ka Si Yoyoh meureun."

"Heueuh, enggeus, nu aya we heula ayeuna mah. Saha bae di dieu teh?"

"Abdi we Ibu, sareng ieu Ceu Iti, Emi, Enok, sareng itu we Ibu, Nyi Ubed," ceuk Nyi Ciwi nu harita mah jadi juru bicara kelompokna, kelompok anyaman tina awi.

"Enya atuh, sing hade we nya. Mun engke aya nu nanya, tong poho nu ceuk Ibu tea. Ka sarerea we ieu mah lain ka Ciwi wungkul. Sarerea kudu siap, ulah aga-eugeu ngajawabna mun aya nu nanya teh nya."

Nu dipapatahan arunggeuk.

"Geuning eta mah jiga nu kurang wedel pagawean teh, Enok?"

"Ah, Ibu. Malum we atuh nembe ge diajar dua dinten abdi mah ngadamel boboko teh," tembal Nyi Enok ditungtungan ku heheh.

Ibu Lurah ukur mesem. Terus ngaroris persiapan kelompok "Menjahit" jeung "Menyulam". Teu hariwang di kelompok ieu mah da aya Ibu Modisteu jeung Ibu Iis, guru Inpres nu loba momonesna. Nya kitu deui di kelompok "Makanan dan Minuman," di dinya aya Ibu Ulis nu ngaluluguanana. Terus Ibu Lurah ngaroris dapur umum katut tempat resepsina. Eh, da masalah konsumsi oge penting atuh, bisa jadi deuih konsumsi ge milu nangtukeun pangajen, Ibu Lurah apal kana hal eta mah.

Nilik kana kasiapanana mah sacara umum, Ibu Lurah teh sugema we. Nyawang pisukseseunana, moal misleuk. Ieu Pameran Pembangunan teh bakal sukses. Nu milu kana ieu pameran, lian ti ibu-ibu PKK teh aya oge ti kelompencapir, aya ti kelomtan, jeung unsur pemuda. Malah ti pihak swasta oge aya, pedah diakukeun kana hiji kelompok resmi atawa kadinesan.

Ti isuk mula, di sabudeureun Bale Desa teh geus rame. Tapi pameran, nu diayakeun di Bale Desa teh, acan dibuka. Engke, nurutkeun rencana, dibukana teh ku Ibu Bupati satutasna ngaresmikeun Desa Landeuh, nu mangrupa desa pamekaran ti Desa Tonggoh.

Kira-kira pukul sapuluh, tamu nu dianti-¬anti teh sumping. Mani ngabring, disarengan ku bapa-bapa Tripida Kecamatan. Mobilna ditunda di lebah warung Bi Iyam, da can nepi ka Bale Desa dibatuna teh, AMD-na kaburu rengse. Tapi ari motor mah dibarawa ka hareupeun Bale Desa, da bisa. Ondangan nu kana motor mah jeung nu rek ngadon lalajo.

Der we atuh acara resmi teh dimimitian. Sambutan-sambutan, nepi weh kana biantara Bapa Bupati. Biantara peresmian. Anu pokona mah, pangwangunan di sagala widang kudu dihangkeutkeun, sarta sakabeh rahayatna kudu nyukseskeun Pemilu. Tripida kacamatan jeung lurah-lurah anu hadir dina eta acara salaku ondangan, surti kana naon nu dimaksud kudu nyukseskeun Pemilu ku Bapa Bupati teh. Komo aya basa di ieu kacamatan teh hasil pemilu ti heula ge cenah panggorengna upama dibandingkeun jeung kacamatan lianna. Di dieu prestasi jeung prestiseu diuji, alus jeung henteuna baris nangtukeun pisan kana konditeu.

Tunda acara keprok jeung keprok, peresmian nu rek deukeut ka rengse, di arena pameran kabeh geus sayagi ngajaga stanna masing-masing. Malah aya nu keur hulang-huleng, kunyam-kunyem ngapalkeun pijawabeun engke mun aya nu nanya. Dina enas-enasna, kudu luyu jeung nu dibripingkeun tadi ku Pa Lurah jeung Ibu Lurah. Cenah kitu kuduna saur Pa Camat oge.

Torojol Ma Enah haruhah-harehoh.

"Ti mana bae atuh Ema mani karek nolol?"

"Alah nya eta Ciwi, Ema teh tas ti Pasir. Kamari aya nu neang, Si Dodo, cenah Si Yoyoh ngajuru."

"Enggeus ngajuruna teh Ema? Awewe, lalaki?"

"Alhamdulillah, awewe," jawab Ma Enah. "Alah, mani lungse awak teh. Teu sirikna notog-notogkeun maneh ti Pasir teh, sieun teu kaburu panggih jeung tamu agung. Geus asup ka dieu acan tamu agungna teh, Ciwi?"

"Acan Ema, sakeudeung deui meureun," tembal Ciwi, "Reureuh heula we atuh Ema. Pangnyokotkeun cai Nok, keur Ma Enah. Boro tadina mah geus sieun abdi teh. Kumaha engke mun aya nu nanyakeun cara-carana nyieun cetok? Teu paham abdi mah."

"Piraku Ciwi, sok teu umum maneh mah, aya tamu agung nanyakeun cara-carana nyieun cetok."

"Ih, ari Ema. Nya teu piraku, da can tangtu bisaeun atuh nyieun nu kararieu mah..."

"Buktina we geuning maneh ge teu bisa nyieun cetok, cacak lain pajabat," Nyi Ubed mairan.

"Ih, da acan nepi kana cetok pangajaranana oge nya, Ema. Karak nepi kana boboko."

"Ngaredul we maraneh mah!" ceuk Ma Enah, "Teu cara Ema bareto." Barabat atuh manehna nyaritakeun mangsa ngorana di Lembur Pasir. Bisa unyum-anyam teh, kitu we mimitina mah, bunta-bantu ka kolotna. Da geus prah di Lembur Pasir mah, ari rengse gawe di kebon teh sok nyieun anyaman. Aya boboko, dingkul, cetok, hihid, jeung sajabana. Lumayan keur ngabanjel-banjel pangabutuh sapopoe. Nu matak Lembur Pasir mah kasohor ku hasil anyamanana.

"Saprak pindah ka dieu we, saprak ngarangkep jeung akina Si Dodo, tara ngahagalkeun unyum-anyam teh. Nya ari kalan-kalan mah osok eta oge," ceuk Ma Enah, leguk nginum deui caina.

"Pokona mah Ema, engke upama aya nu nanyakeun nu kararitu mah, jawab ku Ema we nya!"

"Heug atuh Ciwi ari maneh teu bisa diandelkeun mah."

"Ih, lain kitu Ema, ambeh apdol we ieu mah. Ceuk abdi ge tadi, teu paham abdi mah, da lain urang Pasir."

Can ge garing nu ngalobrol di stan anyaman, nu disebut tamu agung ku Ma Enah teh lebet ka Bale Desa, sabadana Ibu Bupati ngagunting pita beureum bodas nu nganteng dina lawang. Diiring ku para ponggawa jeung bawahanana, ningalian pameran kalayan gemet. Nanya itu nanya ieu di unggal stan ka nu ngajagana. Cetrek burinyay, cetrek burinyay nu motretan. Malah aya oge nu mamanggul kamera video, rohangan jadi caang jeung bayeungyang ku lampuna nu dibawa ku nu sejen deui. Horeng nu tunya-tanya teh lain Bapa jeung Ibu Bupati wungkul. Nu sejen oge milu nembrong. Pa Lurah atawa Ibu Lurah sakapeung milu mairan.

Di stan makanan, rombongan teh rada lila oge. Da salian ti tataros teh bari nyarobian deuih, da dimanggakeun ku Ibu Lurah. Tuluyna mah aya nu mungkus oge.

Nya ari geus dibuka mah pengunjung teh pabaliut. Hansip riweuh ngajaga lolongkrang antara pengunjung sejenna jeung rombongan Pa Bupati.

Anjog weh rombongan tamu agung teh ka stan anyaman.

"Ieu teh sadayana hasil ibu-ibu PKK, Bu?"

"Sumuhun," walon Ibu Lurah anteb.

"Sae, sae."

Pa Bupati unggut-unggutan, imut tanda panuju. Laju rombongan teh lalajo nu keur ngadeluk nyieun boboko, nu teu anqgeus-anggeus. Cetrek burinyay anu motret. Kamera video jeung lampuna ge nyorot ka lebah dinya.

"Ibu, sadinten kenging sabaraha hiji ngadamel nu kieu?" ceuk salah saurang ti rombongan nanya ka Ma Enah, bari nunjuk kana cetok.

"Ah, nya teu tangtos atuh," ceuk Ma Enah. "Tiasa hiji, tiasa dua. Tapi kapungkur eta mah. Kapungkur mah Emana ge masih keneh ngora."

"Ari ayeuna, Ema?" nu nanya ngaemakeun.

"Ayeuna? Ah, ayeuna mah tos tara pirajeunan unyum-anyam. Ieu oge pedah we disuhunkeun ku Ibu Lurah."

"Ari ieu kenging saha atuh, Ema?"

"Duka atuh ieu mah. Meunang maraneh lain?" Ma Enah nanya ka nu keur ngadareluk nyieun boboko. Nu ditanya kalah ka beuki ngareluk. Sieun katutuluyan ditanya meureun, mangka karek nyieun boboko ge can bener-bener bisa. Mangka nu dipajang di dinya teh lain boboko wungkul. Aya hihid, ayakan, tolombong leutik, jeung cetok. Ari ukur ditanya cara nyieun parud mah, lah cetek.

"Kenging ibu-ibu PKK di dieu we," Ibu Modisteu nyambungan, nu aya di stan gigireun, "Ieu teh mangrupi hasil keurseus ketrampilan nu diayakeun ku ibu-ibu PKK, rutin, saminggu sakali, unggal dinten Minggu. Sapertos ieu we (bari nunjuk kana sulamanana), ieu teh sadayana ge hasil kagiatan PKK. Kaleresan abdi pisan anu ngalatihna oge." Abong lami di kota, mani pertentang nyariosna ge Ibu Modisteu mah.

Ibu Lurah kareret getihan deui. Basa Ma Enah katembong rek ngomong, dipolototan ku Ibu Lurah. Jadi teu kebat ngomongna, luk tungkul. Ma Enah karek inget, cenah ceuk minantuna, kamari aya piwarangan Pa Lurah Larideuh ka Desa Pasir, mawa hasil anyaman keur pameran.

Basa rombongan Pa Bupati tos kalaluar ti arena pameran, Ibu Modisteu ngagelendeng Ma Enah. Nu sejen oge milu nyambungan. Tangtu we, Ciwi jeung batur-baturna ge kaparet. Teu boga tanggung jawab, cenah. Tapi maranehanana teu bisa majar kumaha, rumasa salah meureun. Ngan Ma Enah anu teu ngarti keneh bae teh. Nya kitu deui basa diseukseukan ku Ibu Lurah. Teu ngarti, ceuk pikirna, apan aing mah nyarita teh saujratna. Teu boga niat rek ngabohongan ka tamu agung, komo boga niat hayang ngawiwirang ka Ibu Lurah mah. Teu, teu pisan-pisan. Untung, cenah, aya Ibu Modisteu. Cacak mun euweuh, teuing kumaha pijadieunana. Cohagna, dianggap pahlawan we harita mah Ibu Modisteu teh.

"Nu matak Ema ari diperedih gawe ku pamingpin teh ulah sok kaleked, ulah sok loba alesan. Ulah leuwih mentingkeun kapentingan pribadi, pentingkeun heula kapentingan sarerea. Kitu tah akibatna teh!" ceuk Ibu Lurah. Nu sejen ngahaminan. (*)

---

Budi Rahayu Tamsyah