Mang Ohi Ka Bukit Jalil

Geus dicita-citakeun ti anggalna, lamun Timnas Indonesia abus Final piala AFF Suzuki, Mang Ohi cacarekanan rek ngajugjug ka kandang lawan, rek lalajo maen bal langsung ka Stadion Bukit Jalil di Malaysia. Lamun urang kampung anu sejen, nalika keur babak penyisihan teh gawena lalajo bola bari eak-eakan, beda jeung Mang Ohi, manehna mah ngadekul babanda jeung kukumpul duit keur meuli tiket final. Bisnis deblo jeung gegetuk ditngkatkeun produksina. Anu biasana nyieun deblo jeung gegetuk teh ngan ngandelkeun lima kilo sampeu, ti saprak aya maen bal piala AFF mah ditaekkeun jadi 100 kilo sampeu.

Jaba ti eta, diversifikasi usaha dilakukeun. Lain ngan nyieun feblo jeung gegetuk wungkul, oge make nyieun comro, misro, ancemon, kolek sampeu, tik-tik, bolu sampeu, jeung lantak sampeu. Malah ku motekar-motekarna Mang Ohi, ngaran kadaharan anu dijieun tina sampeu teh ku manehna mah dialih basakeun, nurutan kamajuan jaman jeung kudu nyaluyukeun maneh jeung AFTA ceunah. Comro diganti jadi comerosavva, misro diganti jadi missroftcassava, ancemon diganti jadi ant che mount, kolek sampeu diganti jadi collectifhui, tiktik jadi tic of cassava, lantak sampeu diganti jadi land track hui. Ngan ari deblo jeung gegetuk mah angger, majar sieun kawalat ceunah kaluar tina tetekon teh. Teu wani ari kudu ngarobah deblo jadi the blous mah atawa gegetuk jadi gaga of touch.

Kios oge anu asalna teu boga ngaran ayeuna mah geus dibere ngaran. Malah salametanna oge manggil Haji Idik sagala. Ngaran kiosna sarua disaluyukeun jeung kamajuan jaman, nyaeta Deblo and Gegetuk Shoping Centre. Keur mancing anu balanja, mang Ohi ngahaja meuli TV LCD Samsung 30 inch. Malahan waktu semi final mah, manehna make masang infokus sagala hareupeun kiosna. Keur ngabungahkeun kanu balanja, mang Ohi ge nyadiakeun layanan WiFi gratisan. Atuh, ampir unggal peuting semah timana-mana daratang. Bandros Atta jeung Sekoteng Singapur kalindih. Ayeuna mah lolobana ngumpul di kios Mang Ohi. Bari internetan dibarengan ku ngadahar deblo miwah gegetuk.

Sabulan ti saprak muka diversifikasi usaha, bati tina dagang deblo jeung gegetuk teh geus lumayan mahi keur botram ka Bukit Jalil.

"Doakeun, dewek rek lalajo maen bal teh di Bukit Jalil," ceuk mang Ohi ka anak-anakna. "Paspor geus boga, visa kunjungan kari nyokot. Tong salempang, bekel mah mawa, pan aya ieu Citi-Bank Visa," pokna bari ngiwir-ngiwir kartu digital.

"Aeh poho, ari iPad Apple dewek mana?" pokna deui bari cungas-cingeus.

"Haaar...pan ku si ema. Tuh si ema keur twitteran, Bah!"

"Aeh...geus boga kitu si ema akun Twitter?" tanya Mang Ohi.

"Euh...ari abah, apanan ti saprak meuli iPhone 4 si ema teh geus ngopepang ayeuna mah. Sagala dibuka. Ceuk pangakuan anjeunna mah malah geus boga blog oge, Bah!"

"Heug alus atuh tah nini-nini teh, tandana dunia tereh kiamat," ceuk Mang Ohi bari nepak sirah.

-=oOo=-

Mang Ohi geus aya di Bukit Jalil jeung para suporter anu sejenna. Beunguetna dipulas ku warna beureum jeung bodas. Malahan baju dibuka sagala, bari dina dada digambaran mnuk garuda. Bari eak-eakan ngalagu Garuda Di Dadaku.

Gorowok manehna ngomong, "Ayoo El Loco Gonzales gundulin dan lenangin sajahh Si Upin dan Ipin!"

Kurang tarik, manehna gewewek nyokot megapon, "Garuda di dadaku, garuda kebanggaanku. Ayo Timnas sikat abis tim Malasiyeeeeuuu sampai gundul!"

Atuh lieuk para suporter ngaralieuk nenjo kalakuan Mang Ohi anu lain tinu lain. Sabot ger-geran bari ajrag-ajragan, kringggg...hapena disada.

"Halooo...! Aya naon, Ma?" ceunah.

"Oh...ga apa-apa, pasang sajah infokusnya di hareupeun kios. Lamun Timnas meunah biarin para pengunjungna sina nyarokot deblo jeung gegetuk. Keun bae diskon we 50%."

"Kumaha, Ma?" Mang Ohi dungduk-dengdek.

"Ya, beli lagi ka pasar atuh sampeu mah, pake aja ATM abah. Ya, cukup lah 3 ton sampeu juga untuk stok mah!"

Maen bal geus dimimitian. "Hajar blehhhhh...!!!!" ceuk sora ti gigireun Mang Ohi. Barang dilieuk, Mang Ohi nyidik-nyidik. "Aeh...geuning sia, Kemed!" ceuk mang Ohi ngagorowok pacampur jeung awuhan sora anu eak-eakan di Stadion Bukit Jalil.

Anu disebut Kemed ngalieuk. Neges-neges. Kacamata hideungna dibuka.

"Aehhh...geuning silaing, Ohi...! Ohi...? Ohi, nya?"

"Heueuh...aing Ohi, Kemed! Beuh...hade maneh Kemed, geus jadi jalma beunghar sia nya, nepika bisa lalajo maen bal sagala."

"Puguh kuring mah keur katalangsara. Jadi TKI ilegal dewek teh Ohi!"

"Beu...karunya. Kumaha caritana maneh bisa lalajo kadieu?"

"Engke we ku dewek dibejer beaskeunna mah, ayeuna mah urang lalajo heula. Ayooo Bambang sikat Irfan Bachdim!"

"Salah kehed!"

"Ah, dewek teu apal saha-sahana pamen Malasiyeuu mah, Hi!"

Beres lalajo, Indonesia meunang 8-2. Atuh kabeh oge suporter di Indonesia eak-eakan bakating ku bungah. MAng Ohi jeung si Kemed mah malah ajol-ajolan dina korsi.

"Ari silaing naha make jadi TKI ilegal?" tanya Mang Ohi bari cacamuilan ngadahar Nasi Belacan.

"Puguh kuring teh katipu ku agen gejul."

"Kumaha arek balik maneh?"

"Ah moal...! Kuring mah geus betah di dieu. Sanajan abur-aburan oge teu hese geuning neangan pagawean, teu cara di lembur, meni hese pisan apan neangan duit teh."

"Ah, teu kitu kabeh siah. Dewek oge bati tina dagang deblo jeung gegetuk bisa ulin ka dieu. Eta mah kumaha manusana we."

"Anu benerrrrrrrrr...ah masaaaaaa???" tanya si Kemed bari nyiwit Mang Ohi.

"Husss na ari silaing bari cuwat-ciwit sagala...," pokna bari gegebes.

"Ya iya lah...Ohi dilawan!"

Saprak uplek ngobrol, beledug aya sora meni tarik pisan.

"Police...police!" Pok dua urang Pulisi Malaysie.Anu aya di eta warung/kedai arabus kana kolong meja.

"Ohi...abus kehed!" Mang Ohi culang-cileung sorangan.

"Awak cakap!"

"Heuheu...majar dewek cakep ceunah, Kemed!" harewos Mang Ohi ka Si Kemed anu nyumput dina kolong meja.

"Siape awak ni...pake-pake baju macem ni?"

"Aing teu ngartiii, keheeeeeddddd!" Mang Ohi antukna kesel oge ka eta Pulisi.

"Wah, awak cakap ape. Nak bise kah cakap sopan sikit!"

"Teuiing siahh aaah...!" pokna bari ngaleos.

"Kemed...sanghareupan ku sia!"

"Hey...awak tak sopan betul. Mari lah bentar. Saye nak cakap sama awak!"

"Gandeng gejulll...!" ceuk mang Ohi bari jebeng. Kusiwel manehna ngabijilkeun dompet.

"Gandeng siah, ieu tah oleh-oleh ti aing!" pokna bari ngiwir-ngiwir duit dua lembar, 50 ringgitan.

"Hehe....baik budi benar awak ni. Semoga sahaja dibales dengan pahla na setimpal!"

"Aminnnnnnnnn...!" ceuk kabeh anu aya di handapeun meja.

"Eitt...suare dari mana tuh sumbernya?" Ayeuna pulisi Malaysia anu culang-cileung.

"Kemed! Gancang sia lumpat bisi katewak!" harewos mang Ohi bari nagog. "Meungpeung nu garelo teh keur balangah."

"Beretek Si Kemed lumpat, kaluar ti eta kedai.

"Eit sape tuh yang lari?" ceuk pulisi.

"Kerbooo, sateh!"

"Alah mane ada lah, kerbo di kedai. Hahahahah...teruk betul awak ini!"

"Geus gandeng siah ah, ieu tah ditambahan deui ku dewek!" Duit langsung disabet ku eta pulisi.

"Hmm...awak benat-benar orang beriman. Baik betul awak ini. Tak mengerti dicakap namun ahlak awak betul betul baek."

"Betul...betul...betul...!" ceuk anu aya di kolong meja, kabeh kompak.

Teu kudu dititah, eta dua pulisi kaluar ti kedai. Mang Ohi lurat-leret, neangan Si Kemed. Barang leungeun ngodok kana saku, manehna ngarenjag.

"Bedus teh...paspor jeung visa aing dijabel ku Ai Kemed. Euhh...geuning hape jeung sagala rupana digares oge tah ku si wewelek. Awas siah Kemed, diincer ku aing mah nepika mana oge!" pokna bari kekerot.

Ti harita, Mang Ohi teu bisa balik ka Indonesia da paspor jeung visana dipaok ku Si Kemed. Sapuluh taun lilana Mang Ohi kukulibekan neangan Si Kemed. Ngider kaditu ka dieu. Gawe di Malaysia sakasampeurna. Unggal beres gajihan, manehna pasti ngulibek deui, neangan Si Kemed anu nepi ka harita can kapanggih laratanana.

"Kemeeeeddddd...! Dihajar sia ku aing!" gorowok Mang Ohi dina hiji poe nalika nenjo aya hiji jalma anu keur nyupiran mobil make kacamata hideung. Habek-habek, mobil digebugan ku kai, jekok-jekok anu aya dina eta jero mobil di teunggeulan. Atuh rob jalma ngarumpul. Awewe mah ting jarerit.

"Eitt...ada apa awak pukul-pukul ni orang sampai babak belur begini?" ceuk salah saurang pulisi. Mang Ohi neges-neges, inget kana pangalaman sapuluh taun ka tukang waktu di kedai tea.

"Gandeeeenggggg...!!!" ceuk mang Ohi bari nyekek jalma anu disangkana Si Kemed.

Mang Ohi antukna dibawa ka bui. Dikerem di penjara Malaysia. Unggal peuting manehna ngan bati ngomong sorangan bari ngeupeulkeun peureup. "Kemed...! Awas siah, hutang pati dibayar pati, hutang paspor dibayar paspor. Ayeuna aing dipenjara, ngan isuk jaganing geto moal burung diteangan siah ku aing nepika kapanggih deui," ceuk Mang Ohi. Jung manehna nangtung, tap leungeun nyekel kana beusi.

"Ainggg hayanggg nyatuuu, lapaaarrrr...!!!"

Gobengbrang panakol beusi dialungkeun ka hareupeun Mang Ohi. (*)

Kang Warsa