Jang Ukon

Jang Ukon teh hiji jalma anu asup kana ulekan proses sajarah. Tapi lantaran ngan ukur jadi obyek, Jang Ukon ngan bisa hirup wungkul. Hartina, ceuk Profesor Paulo tea mah, manehna teh teu boga eksistensi dina sajarah. Sakumaha tiap jalma nu ngilu nuturkeun sajarah, manehna "jadi jalma sabar tawekal tapi pinuh waspada sarta leber wawanen". Kasabaranana tembong dina paromanna nu hideung kapoe, beresih lantaran mindeng diusap ku cai wudu. Kawaspadaanana nonggerak dina panonna, atra dina kumisna nu jiga tanduk munding dongkol, gaya kaayeunakeun di pakotaan.

Saha atuh jang Ukon teh? Sabenerna mah wawuh jeung manehna teh ngan satengah jam (ge kurang). Tapi dina tilu puluh menit nu kacida heureutna teh, Jang Ukon nu suranyeh teh sanggup ngagambarkeun dirina, ebreh tembong kabeh.

Geus sapoe sapeuting kuring milu kana kapal laut anclang-anclangan dina jaladri. Malah isuk-isuk mah sagara nu sakitu "ngalempreh" mepende teh ngadak-ngadak motah ampul-ampulan. Saha nu teu reuwas. Kajurung ku kareuwas ieu kuring hayang manggihan kapten kapal. Saenyana mah teu saurang oge meunang asup ka jero kabin kapal nu pinuh ku alat-alat jeung parabot nu ceuk kuring mah kacida ruwetna. Nu kasampak teh lain kapten tapi Juru Mudi kapal, Jang Ukon. Kuring ngawangkong jeung inyana bari ngadengekeun keplokna laut, ngagelebugna angin rongkah.

Sakumaha matros-matros umumna, Jang Ukon boga sipat balaka, ngomong tara make aling-aling, satarabasna. Jang Ukon lahir di Sumedang, Sunda tulen. Boga anak sababaraha urang. Digawe geus dua puluh lima taun di laut, meunang tilu kali tilelep lantaran kalebuh deukeut Taiwan, Jepang, jeung Queebeck, Kanada. Waktu di deukeut Jepang mah, kitu ceuk pangakuanana, laut ngadak-ngadak beulah ngewag (magarkeun teh jiga Laut Merah, waktu Nabi Musa bade meuntas). Atuh gebru weh kapal teh karem kasedot laut. Teu tembong deui nepi ka ayeuna ge.

Nyaritana kitu teh estu jiga teu aya kasieun karempan, pijajauheun kana bangbaungeun. Jiga urang tijalikeuh di galengan sawah we. Jamak wae atuh, cenah. Kawani nu luar biasa, ceuk kuring. Lain wani paeh, tapi bener-bener wani hirup, hiji kawani nu beuki surud kabawa ku modernisasi.

Ti mana manehna meunang wawanen kawas kitu? Padahal mah apan manehna teh turunan bulu taneuh pituin urang Sumedang nu jauh ka situ-situ acan. Ngadenge kecap "laut" ge jigana kakara ti biwir guruna di SD. Da sigana teh dunya ge datar we jiga tegalan pipir imahna. Kitu sawangan pikiran manehna nu cupet harita.

"Ari urang Sunda seueur nu didamel di laut?" tanya kuring.

"Seueur pisan!" tembalna bari memener kamudi, diputerkeun ka kenca saeutik, sabab rek ngadupak jala pamayang nu ngarambang ayang-ayangan.

"Naon margina urang Sunda seueur nu resep jadi pelaut?" kuring nanya mindo.

Juru mudi teh ngajawab tandes, "Resep tuda di laut mah!"

Resep di laut? Sakieu sepi pikakeueungeunana? Kumaha mun aya jurig Die Lorelei, si enon denok nu sok ngahariring di luhur gunung sisi Kali Rijn, tuluy mikat bari ngagupayan sangkan matros-matros teh nemahan pati, kapalna neumbrag karang nyohcor beulah ditu? Atawa The Flying Dutchman, kapal kosong angkleung-angkleungan di tengah sagara Atlantik, sakumaha nu kaunggel dina opera tilu babak yasana Wagner, Der Fliegende Hollaender? Apan kacatur ganasna putri ayu Nyai Roro Kidul nu ngageugeuh jaladri nu sakitu upluk-aplakna? Leuwih ti kitu, apan kahirupan di laut teh pinuh ku kakerasan, loba nu begalan nyawa? Jalma-jalmana kalasar lantaran hirup sasat dina congo pati nu datangna teu nyaho di wanci.

Ari urang Sunda, apan sakitu lemesna? Agraris, heureut deuleu, kurung batok, elehan, epes meer, pundungan.

-=oOo=-

Ku lantaran manggihan hiji kanyataan nu tojaiah sarta hese neangan pijawabeunana, hal anu aheng ieu teh ditanyakeun ka saurang ahli dina widangna. Jawabna teh sauted, "manehna digawe di laut lantaran kabawa ku batur-baturna nu geus ti heula hasil boga posisi nu alus."

Sorangan tetep skeptis kana eta jawaban nu teu gembleng teh. Apan cenah primordialisme urang Sunda mah geus leeh kabawa ku jaman. Ti baheula keneh! Tungtungna kuring neangan jawaban nu ngan saukur keur nyenangkeun maneh, yen urang Sunda teh boga mobilitas nu kuat, henteu kurung batok, mibanda kasanggupan pikeun adaptasi nu leuleus liat kana unggal situasi, henteu kabeh elehan, lain keuyeup leuleus, sanajan sakapeung sok silih tengkas.

Ceuk saha urang Sunda teu boga tradisi laut? Ceuk kuring mah, saeutikna, Jang Ukon, Si Juru Mudi nu gagah (nu basa Sundana encer, teu dicaruk ku basa deungeun) bisa ngajawab nu leuwih orisinal batan para ahli di mana bae. Jung Ki Sunda, beber layar! (*)

---

Komarudin Sastradipoera