Sanghiang Rancage

Ti barang terang reh rancage teh hartina kreatif tea, sim uing mah teras reueus kana wewesen karuhun urang nu tos ngarang eta kecap, da dina basa Malayu mah teu aya, kalah nguyang tina basa deungeun. Hartosna, dina basa luluhurna Amir Hamzah, lampah kreatif teh teu kacatur, jalaran karuhunna rupina kirang rancage. Sedeng, dina basa Sunda mah, lian ti kecap rancage, apan make jeung aya kecap rucita, kecap binangkit sagala rupi, nu hartosna kinten-kinten sami mawon.

Tah, barang apal reh rancage diangge ngaran hadiah sastra ku Kang Ajip, sim uing bet rada haraneg oge. Naha bet rancage? Leres, rancage teh langkung nyoko kana sikep jiwa, kana "jeroan", cenah. Nanging, Rancage mah asa kirang genah kapirengna. Cek uing mah asa genah keneh Rucita, nu kakuping langkung jalingeur alias lincah. Binangkit nyari deuih, aya sari-sari rikat, semu singset. Ngan, rek usul teh da puguh leuir, da acarana parantos der tea. Batan panuju bari digugu, boa kalah matak disenghor ku nu kagungan hadasna.

Harita, ahir taun dalapan puluhan, sanajan teu pati resep mireng kecapna, ari hadiah sastrana mah Rancage teh teu burung jadi bukur catur sim uing saparakanca pami nuju ngadu bako. Ninggang kana paripaos oray sisit saba darat. Ngan bae, asa jajauheun kana kaleler, da puguh buku nu dipeunteunna teh. Sok sanaos gaduh carpon tujuh beca, teu kaerong saha nu baris medalkeunana. Aya eta ge pamedal nu ngeureuyeuh. Leukeun medalkeun buku-buku Sunda. Namung, lamun diabregan naskah ku uing saparakanca, tangtos kana kedah ngantri dugi ka lebaran monyet, alias biheung iraha teuing jadi bukuna.

Tungtungna, Rancage kapopohokeun, da sim uing harita teh nandangan bancang pakewuh; bet ngalaman pipisahan. Puang-piung di Bandung, bari katerap panyawat barusuh manah nu teu kinten parnana, make jeung hayang pondok umur sagala. Nanging da palias ari kedah notogkeun karep ka sumur mah, atanapi marud maneh upamina, tangtos kana nyeri naker. Kitu we, sim uing teh kalah ngadon humarurung beurang-peuting, langkung-langkung ti nu nuju nyeri huntu.

Nya ngadeker kana nyajak, bari nahan raheut manah nu teu weleh nyanyautan. Ngabedah-bedah bangbaluh. Panineungan, kapeurih, kakeuheul, kahanjakal, kasieun, jadi rupi-rupi puisi. Aya sajak nu amuk-amukan. Aya oge nu ngagukguk. Beubeunangan terus dikirim-kirimkeun ka koran Galura. Margi, dina eta koran alam harita, honor sasiki sajak teh singhoreng salawe rewu, kaetang badag, bisa numbu-numbu umur nu kawitna hoyong pondok.

Teu kirang ti Kang Abdullah Mustappa nu harita nyanggut kana sajak-sajak uing. Utamina kana Grand Prix. Boa resep nga-Rolling Stones anjeunna ge. Si Akang teh manjang bari luluasan ngalem sajak-sajak uing dina PR, dina Galura, diobrolkeun ka para pangarang bakal kayaning Hadi Aks. Boa teuing anjeunna teh ukur nyombo, da uing kapan nuju langlang-lingling tea. Nanging, rada-rada kalandongan barusuh teh. Kantenan, barang sawatara sajak dileler amplop hadiah sastra ti LBSS mah, janten asa rek manjangan deui hirup-hurip di pangarangan teh.

Ti taun 90 tug ka 92, puluh-puluh sajak uing pabalatak dina koran jeung majalah, ngajejel dina laci. Harita, mireng beja Geger Sunten seja medal-medalkeun buku. Giak naker uing ngadeupaan lincar. Dang Opik Faturohman, salaku tuan dalektur eta pamedal, puguh we panuju naker da rupina hawatoseun ningal uing nu beuki kucel binarung begung. Puluhan sajak dipilih diiker-iker. Ukur 56 siki sajak nu kapilih pibukueun. Bruh-breh pijuduleunana. Tungtungna, nya Blues Kere Lauk nu montel teh. Asa pas keur uing nu rengkung, nu garing badis digarang, nu teu weleh marudah, nu guligah diganggayong nanasiban.

Harita, katompernakeun taun 92, lian ti buku sim uing, Geger Sunten ge medalkeun buku-buku sanesna. Kayaning Buana nu Pinuh ku Mega, buku sajak tutungkusan Kang Yus Rusyana. Urang Naon di Cinaon, karya mutahir bari maloher yasana Kang Wahyu Wibisana. Di Lembur Bulan di Kubur, kenging Kang Dedy Windyagiri, sajak-sajak nu matak geunjleung sabada anjeunna ngampleng teu ngarang-ngarang. Bujangga petingan wungkul. Sasat dipiguru tiluanana oge. Acan buku-buku ti pamedal sejenna. Numawi, bororaah luman-lamun kana dileler Rancage, uyuhan ku medal oge.

Teu wudu uing kabur pangacian waktos Blues Kere Lauk dileler hadiah sastra Rancage dina taun 93. Nuju kabur pangacian, bet dipentog ku Kang Wahyu Wibisana. Ceuk anjeunna, rea panyajak sapandeurieun nu nurutan sajak uing. "Kudu digebragan, Godi! Ulah sina narurutan bae!" kitu kinten-kinten saur anjeunna harita. Nanging, dalah dikumaha atuh. Piraku ari kedah diontrogan mah ku uing, disentakan hiji-hiji. Teu tega. Batan nurut kumaha lamun kalah malik nyentak? Jeung, rumaos deuih sim uing ge, memeh bisa "ngere lauk", kungsi tuturut munding ka panyajak saheulaeun.

Jeung enyana deuih, ceuk sasaha, rea sajak meunang barudak ngora harita nu ngalap Blues Kere Lauk. Sigana, pedah sering dipedar ku Kang Abdullah Mustappa, ku Agus R. Sarjono, bari tuluy di-Rancage-an, malah kungsi dibaca digarawakkeun di Rumentang, rupina mah teras nyerep ka nu aranom. Tapi da asa teu sawios-wios dina sajak-sajak munggaran mah, kitu ieuh biasana. Palias soteh saupami ngepigon salalamina.

Tah, dina hiji waktos, basa keur nganjrek keneh di Bandung, uing dihiras ngajurian lomba maca puisi di Tasik. Teu ku hanteu, di Tasik, motor bet ditubruk gogog. Sim uing ngajurahroh, leungeun baloboran getih, lajeng dibebeyeng ka sekretariat lomba. Panita pahibut. Raheut gasik digulanggaper ku panitia istri, dicokelan keusik-keusikna. Kantenan, sim uing gegerewekan da puguh peurih kacida.

Na atuh, keur sumedeng aduglajer, bet disampeurkeun ku jajaka semu guladig, ngelek sajak sabebedan. "Hoyong diimpleng ku Kang Godi!" cenah geura, teu kira-kira. Hayang ambek. Tapi asa rada watir deuih. Kaciptana teh geus diajam ti anggalna, bakal uplek jeung sim uing. Bari sengar-sengir satengah reumbay cimata, kapaksa sim uing maca bari ngomentaran sajak-sajakna, nu teu jauh tina sangkaan, sarimbag jeung Blues Kere Lauk. Ayeuna mah eta panyajak bakalan teh tos janten pangarang moyan. Karya-karyana harade. Tebih ti tuturut munding. Moal, moal diucah-aceh ngaranna mah. Bilih Nazaruddin Azhar isineun.

Ngalaman di-Rancage deui teh dina taun 96. Judul bukuna Serat Sarwa Satwa. Kumpulan carpon nu ieu mah. Teu patos jeceh sapertos waktos kenging Rancage munggaran. Tiba reugreug pedah wanda carpon-carpon nu bareto mindeng dikekeak ku jenatna Kang Rustandi, bet kapeunteun ku Kang Ajip. Untung we kapungkur teh sim uing teu nurut kana piwuruk Kang Rustandi, mahaguruna Kang Usep Romli, nu keukeuh miwarang ngeureunan nyarpon nu saurna aabsuran, nu matak ngaruksak sastraning Sunda. Malah, carpon-carpon sim uing teh pseudo absurd, kitu numutkeun buku hasil panalungtikan sawatara dosen IKIP sapertos nu galehgeran. Sedeng, sanggem panganteur Serat Sarwa Satwa, kenging Agus R. Sarjono, carpon-carpon sim uing teh cenah lebet kana kolom surealis, nu teras dibantah ku Kang Ajip kuanjeun.

Duka, ah. Lieur. Sim uing mah mung ukur ngarang. Hasilna mah nyanggakeun ka para ahlina bae. Nu tos kantenan genah mah nya tunggang kareta api menakna, peuting-peuting ngageleser ti Bandung ka Yogjakarta, di gigireun umat-imut wanoja nu dipigandrung, miang bari silih keukeupan, seja nampi amplop katut piagem Rancage di UGM. Hajat badag di ditu teh. Rame pisan. Sim uing kahiras maca sajak Sunda di payuneun wong Ngayogyakerto. Jempling. Ngan pasti teu ngalartieun.

Horeng asa samar polah dina acara di lembur batur mah. Beda jeung di lembur sorangan. Di UGM mah meh taya nu nari nu nakon. Kitu we, ngadon irid-iridan jeung pada batur salembur, badis hayam panyambungan. Pasosore, di hotel, aya lauk jeung sanguna gular-goler di kamar urang Mangle. Nya dihenggoy we ku uing teh, batan ku ucing. Singhoreng eta lauk teh haturan Kang Ajip. Teu terang da teu dicirian. Tapi da lauk sesa sim ucing teh cenah mah teras dituang ku Kang Ajip. Duka leres, duka henteu. Apal duduk perkarana soteh sanggeus maca eta kajadian nu dimuat dina majalah Horison. Rupina, ku Bah Duduh dilaporkeun ka wartawan.

Taun ieu, Rancage ka tilu kali katampi ku Sandekala. Novel meunang kuru cileuh. Matak reuwas keur ngarangna da kungsi ngiles tina komputer. Lieuk beuheung nganti-nganti jadi buku ti taun 98 mula. Ngampleng, sok sanajan geus gunta-ganti pamedal. Bororaah mikir-mikir rek meunang hadiah sastra, nu puguh mah guligah nungguan medal. Rumaos meh-mehan aral kana ngarang basa Sunda. Rada sanggup nyerengeh deui teh saparantos novelna midang di toko-toko buku. Kantenan, serengeh teh tambih meber kana ceuli, sabada sakadang novel kagunturan ku Rancage deui bae.

Sanggeus maca novelna, Wawan Awang Sofwan, tukang tunil urang Panjalu, hariweusweus majar hayang magelarkeun Sandekala. Nya dimanggakeun bae, najan bari teu kacipta bakal dikumahakeun teuing. Kedah pasrah bade di bule di hideung. Sadaya-daya, teu langkung sang sutradara, da puguh sanes usumna pangarang bentik curuk ka tukang neater. Percaya ongkoh ka Jang Awang mah. Bubuhan anjeunna mah tos biasa ngadamel sandiwara tina carpon atawa novel. Malah kungsi ngagarap drama Nyai Ontosoroh tina novel Bumi Manusia.

Rengse pagelaran Sandekala di Rumentang, rupi-rupi nu ngomentar. Aya nu bangun panuju. Aya nu murukusunu. Nu kantos maos novelna bangun seueur kahareneg. Tangtos kana kitu. Sapuluh hulu nu maca, sapuluh ciciptan nu beda-beda. Barang dijuringkangkeun di panggung, bisa jadi teu luyu jeung lalamunan. Tunil tea kawatesanan ku rohang nu ngan ukur sagowok-gowokna. Mending nu can maca novelna. Lalajona bisa nyalse, teu riweuh ku ngabanding-bandingkeun.

Tah, dugi ka wangkid ieu teh jisim uing di-Rancage tos nista, maja, utama. Piraku taun hareup rek dileler deui bae? Boseneun meureun Kang Ajip-na ge najan uing boga novel pinobeleun. Jaba taun ieu mah tinangtos rea saingan, da cenah mah aya ratusna buku sunda nu rek medal diproyekkeun. Teu kacipta bade kumaha teuing meunteunna. Rupina kedah ngabenum juri sakompieun bae mah kangge nu ngawalan meunteun. Finalna ku Kang Ajip.

Nanging, tiasa bae Kang Ajip teh ujug-ujug ngaluarkeun aturan kieu: Buku nu asup proyek teu kaasup nu dipeunteun ku Rancage! Tah, kitu sae, Kang! Mung, tangtos bakal seueur pangarang marurang-maring, kayaning Hadi Aks, Dadan Sutisna, Dhipa Galuh Purba, Nazaruddin Azhar, Sarabunis Mubarok, Toni Lesmana saparakanca. Mangkaning pendekar wungkul, ti golongan pemburu hadiah sastra.

Pamungkas, bilih taun payun novel atanapi buku puisi sim uing bade di-Rancage-an deui, mugia Kang Ajip henteu unggut kalinduan, ulah gedag ka anginan. Sambat we ngaran sim uing, Kang! Lalayang miwah amplopna seja ditampi ku astakalih.

Lauk hiu tuang tomat
Thank you so much... (*)

---

Godi Suwarna