Sombong Kapaksa

Ceuk sakaol, ciri has urang Sunda teh nyaeta someah hade ka semah. Dina harti nu leuwih jembarna, urang Sunda mah ka sasaha ge teu weleh darehdeh, boh ka nu kakara wawuh komo ka nu geus loma mah. Ku kituna asa teu pantes lamun aya urang Sunda anu judes, kucem, jeung degig teh. Atuh mun aya urang Sunda anu tara pirajeunan nanya ka nu geus wawuh mun pareng panggih di jalan, bakal dipianeh, malah boa bakal dicap gede hulu.

Hiji poe sim kuring kungsi ngalaman teu hayang nanya ka sing saha bae anu pasangrok di jalan pasampangan, tur teu hayang ditanya sarta sangheuk nembalan pananya batur nu pareng imahna kaliwatan. Kahayang teh ngaderengdeng we ulah aya nu nalek ulah aya nu nakon saurang-urang acan. Paralun lain gede hulu lain degig, da osok eta oge uah-aeh ka nu geus wawuh mah. Harita mah pikiran teh bakat ku husu, sabab sim kuring keur ngalancarkeun diajar motor, da masih keneh sok geumpeur jeung geugeumeueun mun di hareupeun aya kendaraan sejen atawa aya nu leumpang teh. Matak mun pangangguran luak-lieuk heula teh sieun ngagaleong manten.

Padahal basa diajar di lapang sepak bola mah siga nu heueuh geus bisa, nu matak pindah ka komplek oge. Ngan edas jalan-jalan di perumahan mah geuning medanna leuwih beurat batan lapangan sepak bola. Di komplek mah kudu ekstra ati-ati. Teu kaur manggih pengkolan lajuna motor teh kudu dikendoran ari hayang salamet mah. Kudu ekstra rancingeus jeung ekstra konsentrasi. Nu matak lamun sim kuring pareng keur kukurilingan make motor di jalan-jalan deukeut imah keneh sok jadi ngadak-ngadak sombong. Da asa ujug-ujug jegjreg beuheung teh, teu beda ti beuheung robot. Sigana tatangga nu kungsi pasarandog di jalan jeung sim kuring bakal nyarangka, yen ayeuna mah sim kuring teh jadi degig, ana paamprok jeung maranehna jadi tara nanya, nyuruntul we, ceuk paribasa tea mah kawas badak Cihea. Da kungsi atuh, kuring ngaliwat ka imah guru ngaji nu sok mingpin pangajian ibu-ibu unggal malem Rebo, kaparengan anjeunna aya di buruan bumina, ku sim kuring teu ditanya. Atuda sakalieun ngalieuk teh asa araringgis keneh, paur tigebut atawa motor nabrak pager batur alatan sim kuringna balangah. Duka tah, anjeunna duka surti yen sim kuring teu nanya teh geugeumeueun keneh, duka teu terangeun.

Poe Minggu harita teh, isuk-isuk. Kaayaan jalan-jalan di komplek sepi keneh. Estu pikabetaheun mun dipake latihan make motor kukurilingan teh. Harita ge sim kuring langsung ngabiur ngurilingan perumahan. Di hiji jalan pasangrok jeung jelema nu sarua keur numpak motor tur kareret keur mencrong bari ngajak seuri. Tapi sim kuring teu boga waktu pikeun ngabales seurina, sabab motor sim kuring majuna ngaderengdeng. Ngan hate nyarita sorangan, cekeng, mun teu salah mah eta teh murid sim kuring bareto. Jadi eta nu bieu ngajak seuri teh alumni SMP 4 Cimahi. Malah ngaran eta budak anu ayeuna geus bujang teh mun teu salah mah Edi. Teu kungsi diwaro eta budak teh, diantep we. Na atuh pas nguriling deui manehna aya keneh, ngan ayeuna mah papaliwat. Kareret manehna ngahaja eureun heula, tuluy nanya bari rengkuh hormat. Kadenge manehna nanya kieu, "Dupi ieu teh leres kitu Ibu Popon?" cenah. Duh kayungyun ku rengkuhna. Tapi hanjakal manehna nanya kituna teh di lebah jalan anu nanjak, motor sim kuring teu bisa eureun heula, dina bayangan teh mun eureun heula ieu motor nu keur ditumpakan paur nyorosod ka tukang, najan aya erem. Tungtungna ku kuring dijawab satengah ngagorowok, cekeng, "Muhuunnn...! Lerees...ke sakedap...!" Bari tuluy sim kuring ngaderengdeng, niat teh rek malikkeun motor heula. Mun geus aya dina posisi anu merenah kakara rek disampeurkeun eta murid kuring bareto teh. Tapi basa diteang ka jalan nu tadi si murid teh geus teu katingali tapak-tapakna acan. Teuing tuluy ka mana tah budak teh. Teu burung jadi pikiran, sieun manehna salah sangka, sieun nyangka yen sim kuring teh ayeuna mah geus unggah adat, geus teu hayang malire kana pananya batur.

Geus kitu sim kuring ngaliwat ka imah Bu Haji Oom, tatangga sajajaran imah sim kuring pisan. Manehna keur aya di buruan, tuluy nanya, "Neng, tos tiasa ngabonceng teu acan?" Boro-boro hayang ngalieuk kuring teh, ngaderengdeng we, tapi sempet keneh ngajawab bari ngagorowok, "Teu acaaannn, punten abdi moal ngalieueueukk...!" Duka kumaha reaksina dijawab bari ngagorowok kitu teh, mangkaning kangaranan ngajawab pananya kolot, aya bahan disebut culanggung ku nu teu apal kana kaayaan sim kuring harita mah. Cindekna unggal nu nanya sim kuring ti buruan imahna sok dijawab ku ngagorowok bari teu ngalieuk.

Ari gok teh jeung tukang cau langganan, kalah nyarita kieu, "Ibu, bade ngersakeun atuh ieu cau sarae..." cenah. Ku kuring ukur diajak seuri. Basa sakali deui nguriling tuluy ngaliwat deui ka hareupeun si Emang Cau, nawarkeun deui manehna teh, "Mangga Ibu tinggalan heula geura ieu cau mani sarae kieu!" cenah. Beu! Komo dititah ngilikan heula cau, bet ditanya sabener-bener ku kolot ge kuring teh euweuh waktu keur nembalna. "Cicing Mang, keur diajar!" cekeng kapaksa digebes Si Emang teh, keuheul ku keukeuhna.

Jadi hayang geura ngaberengbeng ka jalan raya. Meureun di jalan raya mah moal aya nu wawuh. Ku lantaran teu warawuh, bakal bebas ngaderengdeng moal aya nu nanya. Kapan sok katingali di jalan raya mah kabeh arapi lain, pakia-kia, pahare-hare, aranteng lir keur aya di dunyana sewang-sewangan. Hanjakal can aya kawani, masih keneh ngarasa lewang ari kudu nyorang jalan raya mah. Ngan meureun salila panyakit geugeumeueun can leungit ti diri sim kuring mah, wayahna we kudu daek dicap sombong ku nu pareng papanggih di jalan bari warawuh. Hapunten ka sing saha bae nu kantos pendak di jalan anu ku sim kuring teu direret-reret acan, eta mah da sombong kapaksa. (*)

---

Popon Saadah