Nasib Roman Sunda Ngepop

Urang Sunda resep dongeng. Bukti nu tembresna mah dongeng dina radio. Antara taun 1970-an nepi ka 1990-an dunya dongeng dina radio ngabetot perhatian nu ngabarandunganana. Harita mah rea pisan radio nu nyiarkeun acara dongeng. Di Bandung, upamana, Radio Sangkuriang, Radio Garuda, jeung Radio Shinta nu sok nyiarkeunana. Atawa di wewengkon Sumedang, aya Radio Jussan jeung Radio Duta.

Wa Kepoh jeung Rachmat Dipraja mangrupa ikon-na. Duanana kakolomkeun juru dongeng radio nu pangkawentarna. Sorana teu weleh dianti-anti. Nu matak helok mah estu teu kawatesanan ku umur deuih pikeun ngabandungan hebatna gaya ngadongengna teh; kolot, budak, lalaki, awewe. Karereanana resep ngadarengekeun dongeng radio, siga jaman kiwari lalajo sinetron. Tapi ari nu nulis caritana mah tara pati dipalire, malah ampir kapopohokeun. Saperti Yat R, pangarang dongeng Si Rawing, anu kungsi ngageunjleungkeun tatar Sunda.

Carita-caritana memang matak tibelat. Aya dongeng silat nu ngalalakonkeun para jawara reujeung elmu kadugalanana, saperti Si Buntung Jago Tutugan. Tokoh utamana, Andi, ngabogaan pakarang mangrupa haur koneng. Sedengkeun musuh kabuyutanana, Karna, boga ajian batu karang. Tangtu rea keneh carita-carita sejenna ge. Boh genre carita silat, misteri, boh nu mangrupa romantika kahirupan. Model Gumilar, Jaka Santang, Nurelah, Neng Elah, Ir. Mardi, jeung sajabana ti eta.

Tapi anu jarang kasungsi atawa kasebut-sebut teh nyaeta sumber-sumber lalakonna. Sihoreng dongeng-dongeng Sunda dina radio teh aya gantar kakaitanana jeung pamedalan buku-buku roman pop Sunda dina mangsa 1960 - 1970-an. Harita mah buku-buku model kitu loba nu pada mikaresep. Jumlahna nepi ka mangratus judul. Ditambah teh deuih tiap judulna ge ngurung hiji nepi ka sawatara puluh seri. Contona Waliwis Bodas (Tjaringin, 1969) karya S. Sukandar nu jumlahna 45 jilid. Atawa Si Buraong (Wargina, 1971) karya K. Soekarna nu jumlahna nepi ka 43 jilid. Buktina, tina situs-situs di internet kacatet, upamana pabukon Universitas Kebangsaan Malaysia (UKM) ngoleksi roman Sunda saeutikna 270-an judul. Ditambah deui, model, pabukon KITLV nu ngumpulkeun ratusan judul.

Nu narulisna ge rea deuih. Cara A. Roestandi nu nulis seri Andjar (Pusaka Sunda, 1967). Atawa A. Tolib nu ngarang Pusaka nu Menta Wadal (Romanato, 1970). Atawa Juda Djaja jeung Djaka Tarumna (Laksana, 1970). Oge Tatang K.S nu ngarang Rusiah Euis Marlinah (Wargina, 1969). Ngan tangtu we nu fenomenal mah K. Soekarna jeung S. Sukandar. Duanana geus ngahasilkeun roman Sunda nu nepi ka kiwari masih dipikawanoh publik Sunda. K. Soekarna, upamana, kakoncara ku bukuna Sirod Djelema Gaib (Saputra, 1969). Ari S. Sukandar kawentar ku carita silatna Si Buntung Djago Tutugan (Tjaringin, 1969), nu remen jadi babon dongeng radio tur dijudulan sarua.

Di antara sakitu reana ngaran pangarang roman Sunda, aya sawatara pangarang nu sok make sandiasma (ngaran samaran). Cara Koko, Juda Djaja, atawa Supermen. Ngaran asli Koko jeung Juda Djaja nyaeta M.O Suratman, hiji kapten manten nu dumuk di Jalan Babakan Tarogong, Bandung.

Sedengkeun ngaran Supermen sihoreng sandiasmana S. Sukandar. Pang inyana make eta ngaran sabab hiji mangsa basa inyana rek masrahkeun naskah ka pamedal, inyana poho neundeun naskahna nu digantelkeun dina Vespa. Tapi naskah horeng geus hiber aya nu ngarampidan, ti dinya pisan inyana mimiti make ngaran Supermen.

Cek koropak pembaca (nu dimuat dina Sulit Ati Belang Bayah karya Wahyu Adam, 1972: 35-36) nepi ka taun 1972 aya sawatara pangarang nu masih aktif ngarang roman pop Sunda. Nyaeta Wahyu Adam, Ki Masram, Supermen, Juda Djaja, jeung Entang S. Maranehna sok ngarumpul di Perpustakaan Aneka nu aya di Jalan Pagarsih No. 179A Bandung sarta diluluguan ku M.O Suratman.

Tapi nepi ka kiwari, ceuk rasa mah tacan aya juru titen atawa kritikus nu nalungtik ngeunaan buku-buku model kitu. Boh ngeunaan genrena, kandungan sastrana, boh pangaruhna ka masarakat Sunda. Pangaruhna perelu disebut sabab bisa jadi masarakat Sunda mah mikawanoh sastra Sunda teh asalna tina buku-buku roman pop tea. Walhasil, lain tina karya-karya nu jadi kanon sastra Sunda, saperti Baruang Ka Nu Ngarora (D.K Ardiwinata), Mantri Jero (R. Memed Sastrahadiprawira), atawa Diarah Pati roman misteri karya Margasulaksana.

Nu jadi pasualan, kunaon pang nepi ka kajadian boom dina era harita? Bisa jadi aya sawatara sabab. Di antarana, pungsi agen jeung taman bacaan nu jadi rawayan sumebarna roman pop Sunda, gede pisan kontribusina. Buktina, mun seug pirajeunan nitenan buku-buku roman pop tea, di jerona pasti sok aya gambaran ngeunaan agen nu ngadistribusikeun buku-bukuna. Salian ti eta, di jerona teh biasana sok aya ngaran-ngaran taman bacaan nu nyadiakeun buku-buku roman pop Sunda. Cara, keur pamedal Romanato jeung Sinar Wulan agenna teh Toko Buku Nasional Suka Asih nu aya di Jalan Rd. Dewi Sartika 1H, Bandung. Jeung remen sok dibarengan ku ngaran jeung alamat taman bacaanna.

Bisa oge tina jihat nu maracana. Nu maraca roman pop Sunda, bawirasa, lain jalma-jalma anu resep hal-ihwal ngeunaan kasusastraan. Atawa teu miduli: naha roman pop Sunda teh karya sastra atawa lain. Nu penting mah sigana asal rame tur ngondang nguniangna rasa panasaran. Cindekna nu maraca roman pop Sunda mah jalma-jalma anu awam kana hal-ihwal kasusastraan.

Mungkin wae eta teh jadi sabab para kritikus sastra Sunda henteu nembongkeun katiten ku ayana eta roman-roman tea. Malah beh dituna nganggap yen taya mangpaat anu dipetik tina jalan macaan buku-buku samodel kitu. Sabab ceuk arinyana mah buku-buku nu pandena kitu teh ngan ngajarkeun kajumudan mikir jeung hal-hal anu cawokah. Padahal ceuk rasa mah, gagasan kritikus sastra Sunda nu milah-milah antara nu daria jeung pop nu jadi salah sahiji nu ngancurkeun tradisi roman pop Sunda.

Salian ti eta, bawirasa bedana antara sastra anu daria jeung sastra anu ngepop dina sastra Sunda mah ipis kacida. Malah rada hese ngabedakeunana. Oge sabenerna mah roman pop Sunda teh bisa dimangpaatkeun minangka media nu ngamumule basa Sunda. Sabab justru ku roman pop, sastra Sunda ngaronjat popularitasna nepi ka masarakat rea nu pada mikaresep.

Ku kituna, kiwari sigana waktu nu mustari pikeun ngumpulkeun (sok sanajan leuir) sarta ngayakeun panalungtikan kana roman pop Sunda. Ku jalan kitu, eta teh sarua hartina jeung ngahargaan sumanget jeung kreatifitas para pangarang roman pop Sunda. Sabab kumaha bae oge, roman-roman pop Sunda (sanajan salila ieu mah luput tina paniten para kritikus) geus ngilu ngeuyeuban sastra Sunda. (*)

---

Atep Kurnia