Ajag Beureum

Cungungung...! Cungungung...! Kadenge sora ajag nu babaung. Sorana ngeusian sabudeureun lengkob nu sok biasa dijadikeun tempat pangagonan domba ku urang Ustrali.

Di antara lengkob nu kacida legana, patingrunggunuk rurungkunan, paselang jeung tatangkalan nu teu pati loba, lantaran sabagian eta tempat teh dipapaesan ku suburna jujukutan jeung saliara.

"Cilaka...!" gerendeng saurang lalaki, pangawakan jangkung badag tur bewos.

"Aya naon, Pah?" tanya mojang lenjang, nu pangawakanana jangkung leutik, pakulitan koneng umyang, panon cureuleuk, pipi ngadaun seureuh, irung weh kuwung-kuwungan.

"Ajag beureum jigana," gerendeng Si Bewos bari ngojengkang ka enggon, teu kungsi lila balik deui bari mawa bedil.

"Naha ajag teh ngaganggu wae nya, Pah?" omong nyi mojang, nu harita masih keneh diuk luhur korsi nyanghareupan meja, bari maca buku.

"Enya, Lis. Dasar sato, teu kaop ngambeu mangsa hayang we ngagarap." Si Bewos ngeusian bedil nu ngabogaan laras panjang ku pelor anu tungtungna sareukeut.

"Seueur domba nu janten korban geura," omong Elis, bari ngareret ka lebah bapana.

"Ngan nu jadi heran Papah, naon sababna eta ajag teh datangna saban bulan purnama? Oge sasaranana..." Si Bewos teu kebat nyaritana, sabab harita ngadenge di luar geus patingcorowok para patani ingon-ingon.

"Pah, di luar tos rame! Rupina ajag tos ngawitan ngaranjah," ucap Elis. Jung cengkat tina diukna.

"Enya, cilaka. Lis! Di buruan imah urang oge geus kadenge rageg jeung babaungna. Boa-boa ingon-ingon urang ge geus jadi sasaran," Si Bewos ngokangkeun bedilna, tuluy mukakeun panto lalaunan.

Breh, katenjo di buruan imah, ajag beureum ngaliud. Ret, harita ajag beureum anu pangbadagna mencrong ka lebah lawang panto, matana nu hurung buringas kawas-kawas arek narajang.

"Elis, gancang nyumput di kamar!" parentah Si Bewos.

Can oge sungutna balem, ajag beureum anu pangbadagna geus luncat manten nubruk panto anu melenge. Ajag lianna rajleng nyerang Si Bewos anu keur nodongkeun bedil.

"Kurang ajar, ajag teh!" Si Bewos teu bisa ngalelempeng laras bedil kana sasaran. Kalahka bedil teh dipake ngababukan ajag anu ngaronjangan turta nyangereng nembongkeun sihung bangun rek nyasaak dirina.

"Gggrrrr...!" ajag beureum anu pangbadagna geus aya di sajeroeun imah. Matana neuteup seukeut ka lebah Elis nu ngadedegdeg geugeumeueun. Tuluy nembongkeun sihungna anu rangeteng, letahna ngelel bari sakapeung ciduhna ngeclak.

"Halik! Nyingkah!" omong Elis bari beuki ngadegdeg.

"Gggrrrrr...!" ajag beureum kalahka ngadepong. Geus kitu luncat ngarontok Elis.

"Ampun!" Elis ngagoak anu saterusna ngagubrag nangkarak bengkang.

"Gggrrrr...!" cungungung ajag beureum babaung. Terus ngagabrug Elis anu nangkarak, letahna ngaletakan beungeut. Kadua suku hareupna ngadepong, marengan suku tukangna anu dipeyekehkeun lebah palangkakan Elis.

"Akhhhh...!" Elis babadug hayang ngaleupaskeun diri tina panindih ajag beureum. Bari beungeutna katara muringis, nyeri pacampur sieun. Les Elis kapiuhan, teu inget di bumi alam.

-=oOo=-

Sabulan satutasna kajadian...

Si Bewos sore eta keur ngelapan bedil di pakarangan imahna. Sakapeung tarangna sok katingali kerung, bangun aya nu keur dipikiran ku dirina.

"Weleh teu kaharti," manehna ngagerendeng. "Naha dina peuting harita ajag teh bet patinglaleos sanggeus ajag beureum nu pangbadagna kaluar ti imah aing. Nu lainna kawas nurut ka eta ajag, boa pamingpinna? Tapi naha aya pamingpinan kitu ari nu ngaran ajag?" Leng si Bewos ngahuleng deui.

"Pah, sanes nuju ngelapan bedil?" tanya anakna suara-seuri kawas nu boga kagumbira.

"Enya," walon Si Bewos pondok, matana neuteup Elis pacampur helok.

"Lis, naha kawas anu gumbira nyanghareupan purnama teh?" tanya Si Bewos. "Tara-tara ti sasari."

"Kedah hariwang kitu?" Elis malik nanya.

"Biasana oge sok tatan-tatan, caringcing pageuh kancing bisi gorombolan ajag beureum nyerang deui!" bapana nembrakeun kahariwang.

"Naon anu kedah dijanten kahariwang, Pah? Sanes ajag eta teu ngaganggu boh ka papah boh kana ingon-ingon urang," walon Elis, tenang.

"Heueuh...!" Si Bewos nyabakan tarang bangun nu jangar. "Naha nya tara-tara? Lain ingon-ingon anu tatangga urang mah pan loba nu jadi korban disasak ku ajag beureum."

"Muhun, saur Elis oge naon atuh anu kedah dijantenkeun kahariwang ku urang?" Elis ngojengkang ka kamarna ninggalkeun bapana anu olohok bari calangap.

"Teu ngarti aing mah! Naha Elis oge bet robah?" Jung Si Bewos cengkat tina diukna, sup ka patengahan tuluy ngagantungkeun bedil dina bilik nu dijeun tina kai. Gubrag manehna diuk satengah meubeutkeun bujurna kana luhur korsi. Uteukna muter mikiran nu kaalaman ku dirina jeung ku nu jadi anakna nu ngadak-ngadak robah saratus dalapan puluh darajat.

Langit belah ti kulon mimiti beureum, haseup bodas nu ayang-ayangan kacepretan warna jingga. Ciciren beurang arek ka ganti ku peuting. Jangjang peuting mimiti meber mancen gawe nepi ka isuk jedur.

Cungungung...! Cungungung...! Kadenge sora ajag babaung ngabageakeun maleman purnama. Elis nu ngabebengkang di kamar, ngagelenyu imut sorangan. Matana neuteup lalangit kamar.

Bray, katenjo aya taraje anu ditaretes ku inten permata lir jalan ka jomantara. Teu kungsi lila aya hiji lalaki kasep leumpang kalawan salse turun bari ngagelenyu. Dua leungeunna ranggah kawas hayang dipapag.

"Engkang...!" Elis haroshos bari cengkat, nyambut kadatangan jajaka anu ditunggu-tungguna ku rangkulan, bari sakapeung sok digalentoran.

"Geulis, jungjunan Engkang. Urang patepang deui...," manehna oge sarua ngabageakeun rangkulan Elis nu ngabagjakeun.

Nu kadenge iwal ti renghap-ranjugna ambekan, marengan ratugna jajantung lir tutunggulan. Duanana silih tembrakeun kabungah, saterusna lalayaran dina sagara kacinta, silih simbeuh ku kadeudeuh, silih rungrum ku kaasih, silih simbutan ku kasono.

"Hiaaatttt...! Nyingkah siah...!" Kadenge di saluareun imah sora Si Bewos nu ngusir mangpuluh ajag. Ngagimbung ngariung dirina bari nembongkeun sihungna anu rangeteng. Manehna sababaraha kali ngulangkeun bedil rek dipake ngagebug ajag nu rek ngaronom dirina.

Panto imahna we melenge, nu teu kungsi lila kaluar ajag beureum panggedena. Bareng jeung ngajlengna eta ajag, nu keur ngaronom Si Bewos oge rajleng naluturkeun, saterusna lus-les duka teuing ka mana.

Sakedapan mah Si Bewos ukur olohok ngembang kadu bari ngajingjing bedil. Ras inget ka nu jadi anakna sok sieun kumaha onam di jero imah.

"Cilaka...!" Langsung gura-giru muru ka imah, nubruk panto anu melenge.

"Elis...!" Manehna nitenan kaayaan di imah, tapi taya barang nu ruksak hiji oge.

Geblus ka kamar nu jadi anakna, kasampak keur diuk sisi dipan bari meresan buuk turta papakean anu kusut. Katara roman beungeutna bangun nu bungah. Si Bewos gogodeg. Ngojengkang deui kaluar ti jero kamar anakna, gubrag meubeutkeun awakna dina bangku panjang nu aya di rohangan tengah.

"Naha naon nu kungsi kajadian? Lain tadi ajag beureum teh kaluar ti imah? Aing boro hariwang Elis bisi kumaha onam. Tapi geuningan teu sakarakara." Tarangna beuki kerung.

-=oOo=-

Tujuh purnama geus kaliwat. Kaayaan para peternak domba teu ngarasa kaganggu ku kadatangan ajag beureum. Lantaran nepikeun ka harita teu kungsi norojol deui. Ngan hanjakal Si Bewos nu ngarasa helok, sabab nu jadi anakna kiwari geus kakandungan tujuh bulan.

Eta kaayaan teh positip sanggeus ngahaja dipariksa ka dokter kandungan. Puguh eta kajadian teh matak helok pikeun dirina. Iraha Elis patepung jeung lalaki?

Naha lain salilana oge aya di tempat peternakan jeung dirina? Waleh teu kapikiran ku Si Bewos. Ari rek tumanya ka nu jadi anak sok sieun kumaha onam. Manehna ngahuleng bari garo-garo teu ateul. (*)

---

Herdi Pamungkas