Papatong

Lamun seug inget ka anu jadi adi, remen sok hayang seuri sorangan. Abong pajabat teras Pemda meureun. Kajaba ka saluhureun, sigana mah lamun ka sahandapeun ana panggih terus diajak sasalaman tea, kapan bari hayuh weh mere parentah itu-ieu ka Sekretaris Bagian boh keur inyana benum Sudin. Enya seseringna laju mah anu nyalongkrong tea malundur teuing ku gimir. Beda deui lamun seug jeung Walikota komo ka setap Gupernuran mah, teu sirikna sapatuna oge diletakan sangkan herang gagenclang. Hayang naon diaya-ayakeun. Hayang awewe anu bisa dibeuli oge hayu.

Teuing pedah ngaku keneh ka anu jadi lanceuk, hiji waktu panggih di acara halal bil halal kantor Walikota. Kitu der paadu hareup, solongkrong ngajak sasalaman bari anu kawas hayang teu hayang. Kitu diwalon, aeh geuning cukup ku napelkeun ujung ramo terus beungeutna ngaleos. Hehe teu beda jeung cara papatong cecewok weh. Wew...! (*)

---

Eman Rais